قبل .. و بعد.. !!

[كاسكوكيه]

السلام عليكم و الرحمه

أخبااااااااااركم؟!

طبعن.. شامبيه .. الي ما يعرف.. بيعرفه.. بس حبيت أني أراويكم حاله.. كيف كان و كيف صار..

بدايته معاي كانت في شهر 9 .. من سنة 2008 .. كان عمره 7 شهور.. كانت لي محاولات كبيره انه يتوالف معاي و الحمد لله.. بس من شهر خلاني أمسح على راسه

و هاي صورته بعد شهر أو شهرين من وصل بيتنا و نوّر حياتي..



و طبعن يوم بدا الشتا.. بدا ريشه يطيح.. بس ما لاحظت عليه شي من النتف.. وكنت أشله معاي المدرسه و أوديه الدوام عشان ما يتم وقت طويل اروحه..

بس من فتره الشتا للحين.. و ريشه مب طايع يطلع.. هالفتره أحاول اني اهتم فيه قد ما أقدر.. و طول اليوم أكلمه...

نقلته في غرفتيه... حتى أنام و المكيف موطيتنه عشان ما يبرد .. و قمت أحط له ألعاب .. و أغصان في القفص.. كل يوم أغير له جو... مرات في الصاله و مرات في غرفتيه و مرات في الحديقه يسمع باقي العصافير..

والله حتى أمي تقول لي.. الببغا تتفديه بروحج وأنا لا << مسكين يا شامبيه يغارون منك

و دايمن أكلمه واصفر له.. عشان لو كان سبب سقوط الريش نفسي يحس بتغيير.. طبعن اعطيه دوا وصفه البيطري..


بس البارحه انصدمت.. طول اليوم رافع ريله .. و قاعد يسحب الريش الي بين ريوله

حاول امسكه و اطلعه نمشي برا بس يوم رديته نفس الشي

الحين انا اقدر أقول لكم انه الموضوع مش بس تبديل ريش.. لانه ينتفه بالقو.. صوت الريش وهوه يجلعه من جسمه عور لي قلبي

طبعن هاي صورته بعد ايام الشتا..





بس لاحظت شي عليه.. الريش الي بين ريوله.. يوم يسحبه... أنتبهت انه فيه ريش يديد طالع.. هل معنات هالشي انه يحاول يطلع الريش اليديد؟؟!

مادري يمكن يحفز الريش الجديم عشان يطيح





طبعن يستحي شامبيه ما قدرت أصور المساحه كامله





مادري لو واضح قصدي ولا لا.. ع العموم

اريد أراويكم كم شي أسويه لشامبيه.. من ديكورات للقفص.. لحركات لتحفيز الذكاء عنده.. و ما شاء الله عليه ذكي.. مرات

أول شي.. يبت له كم غصن و قصّيتهم عشان يكونون قصاار.. و ربطهم بغصن ناعم ثاني.. عشان يكون كل شي في هالقطعه طبيعي و ما يضره




وبعدها علقتها في القفص.. طبعن هذا أول يوم .. و بعد أسبوع ما تم شي .. و مكان هالقطعه صار فاضي




و الشي الثاني .. سويت له مثل ما تقولون علاقه للورق الملون.. عشان يقعد يلعب فيها و يقطع القصاصات الي معلقه...

أول شي قصيت ورق ملون مربعات و بعدين شكّيتهم في خيط صوف.. و علقتهن في القفص..



















طبعن شامبيه قفصه عدّال شبريتيه.. عشان يتم قريب مني.. و هذي صورة القفص.. << أعرف المفروض يكون أكبر من جيه




فيه ألعاب.. أو حركات نقدر نسويها لببغاواتنا عشان نحفز عندهم حب الاستطلاع و التفكير

و انا شفت فيديو لحركه.. المهم.. نحط الحبوب الي ياكلها الببغاء في كيس.. طبعن يفضل أنه يكون كيس من ورق... بس انا حطيت بلاستيك ع السريع أجرب.. و نلفها زين و نخليها قريبه من الببغاء..

بس شرط نخليه يجوف و نحن نحط الحب فيها.. عشان يعرف و يحاول.. مستحيل يحاول و هوه مب فارقه عنده الكيس و الي فيه

طبعن شامبيه ما شاء الله على طول راح للكيس و حاول يفتحها.. اول ما فتحها عطيته حبتين مكافأه.. و بعدها رجعته ياكل بطاطا..










ادعوا لشامبيه يصح .. والله شكله يقطع القلب ..

انا احاول اني اهتم فيه بشكل أكبر,,,

بسألكم... ممكن الاهتمام الزايد يشكل مشاكل نفسيه للببغاء..؟؟ ويساهم في تفاقم حالة النتف؟؟