اذا كان طيرك كبير في السن ويجعر وما تعرف تتعامل معاه ادخل وجرب

[3obd]

السلام عليكم ورحمة الله وبركاته
كيف الحال انشاء الله كويسين
انا اليوم جايبلكم طريقة مجربة ونجحت معاية بنسبة مية بالمية
ذحين كلنا عارفين ان الطيور الكبيرة جدا اللي عيونها صفرا يجيبوها بعض المحلات بكميات كبيرة واسعار رخيصة جدا يعني مثلا عندنا بالسعودية يكون سعر الطير ابو عين صفرا مهما كان حجمة من 500 الى 600 ريال وعادتا محد يشتريها الا للتفريخ طيب.
وانتو كمان عارفين انه الطيور هذي على طول تجعر من يوم ما تقرب عليها الى ما تبعد وهيه بصوت واحد عععععععععععععععععععععععععععغغغغغغغغغغغغغغغغغغغغغغغغغغغغغغغغغغغععععععععع
طبعا الواحد لمن يسمع هذا الصوت الحلو يقول ايش هذا مين يشتريها؟؟
انا عن نفسي كنت زمان اقول كذا وبصراحة اللي يقول كذا معاه حق لأنه اساسا صعب التعامل معاها
وعلى فكرة لمن تكون كل الطيور في قفص واحد كبير بالمحلات تكون اكثر عدوانية ولكن اذا انفصلت عن بعض او اشتريت واحد وحطيته بالبيت بيخف جعيره بنسبة قليلة ولكن يضل ذلك الصوت الشجي يعلو كلما اقتربت من القفص
أنا عن نفسي مرة اشتريت اثنين وكنت ناويهم ذكر وانثى والحمدلله حالفني الحظ وطلعو ذكر وانثى
وكنت كل ما اقرب من القفص اسمع الجعير يصحي النايم ويصنج الصاحي
وبعدين باقلكم على شغلة انه الذكر هو اللي يجعر وبس والانثى دايما صوتها يكون واطيي جدااا لا يكاد يسمع وتندس ورا الذكر
طيب معليش طولت عليكم لكن ما فيه فايدة اعرف نفسي كثير كلام
اليكم الطريقة :
خلي الطير لوحده في غرفة يعني ما يكون فيها بني آدم وبتسألني اذا فيها طيور بأقلك الطيور مع هذي الحالة اللي يمر فيها الطير هذا بتكون نوع من انواع المساعدة النفسية له من باب
(اللي يشوف مصيبةغيره تهون عليه مصيبته)
وقفل الباب واطلع وخليه من ساعة الى ساعتين أما انا بالنسبة لي والحمدلله حاط كاميرا
مراقبة بغرفة (العمليات )<<<<<< غرفة الترويض والتدريب <<<<<<<
اقعد اراقب الطير الى ان يحس بالراحة ويهدأ شوية ويبدأ يمشط ريشه ويلعب فيه وهنا تبدأ المغامرة
جيب قماش ابيض كبير يغطي جسمك بالكامل او اي لون بس ما يكون اسود
وجهز شوية أكل زي الفاكهة مثلا وحطها بعود ساتي
وحط عليها شوية سم فيراان خخخخخخخخخخ امزح
والبس القماش زي الاشباح اللي بافلام كرتون
وانتبه لا يبان من جسمك ولا شي يعني حتى رجولك خليها ورا القماش وامسك العود اللي فيه الفاكهة من ورا القماش بيدك وادخل الغرفة وامشي بشويش وخلي حركتك بطيئة جدا واذا عندك طير والف حاول تروح عنده اول وتأكله شويه قبل ما تروح للطير المتوحش الجديد
وبعدين روح للطير المتوحش بتلاقيه يقلب راسه ويطالع مو عارف ايش الشي هذا اللي قدامه وقرب بشويش وقرب منه الاكل في البداية ما راح ياكل بالطبع لكنه صدقني ما راح يجعر او انه تلاقي فيه صوت خفييييييف جدا
وكرر الحركة كذا مرة على كذا يوم الى ان تلاقيه اكل او حتى صار يتجاهل وجودك جنب القفص وهذا بحد ذاته تقدم كبير وعلى فكرة خلال هذي الايام لازم لمن تحطله اكل وموية حطله وانته متغطي
وحاول محد يقرب عليه نهائيا وشوية شوية حاول تبين من جسمك جزء بسيط وعيد نفس الحركة
الى ان تحاول تبين جسمك باكمله وبكذا تلاقي الطير كل ما قربت حتى وانته مو متغطي يبطل يجعر والخوف يتلاشى ويرجع كأنه فرخ صغيييير بس الكلام ما اعتقد انه يتكلم ولكن التصفير وتقليد الاصوات مثل الجرس والتصفيق وزي كذا يعني الاصوات البسيطة بس.
البعض ما راح يتقبل الكلام اللي كتبته ويقول انه كله كلام فاضي ولعب عيال على قول اخوانا المصريين لكن الكلام اللي كتبته يعتمد على حاجتين :-
الأولى:انه هذا الكلام جربته تجربه شخصيه ومع طيرين
الثاني : انه ما احد فكر ليش هذي الطيور تخاف من الانسان هل هو خوف فطري ام انه بسبب؟
طبعا اكيد بسبب ألا وهو انه هذي الطيور في الاساس هي طيور برية يعني عاشت في الغابات وما عمرها تعاملت مع الانسان وكل ما لديها عن الانسان انه صياد او يود ايذائها واغلبكم لا يعرف طرق صيد هذه الطيور بعضها يصل للوحشية وانه نسبة واحد من خمسة من هذي الطيور يموت اما اثناء عملية الصيد او عملية النقل او سوء التغذية اللي يتعرضون لها اثناء مرحلة وجودهم لدى الصياد.
هذا كله وما تبغون هذه الطيور تتعقد وتجعر وغير كذا انه ممكن بعض الازواج اللي يمسكها الصياد مع بعض يموت واحد منها امام الاخر وهذا يعقد الامر اكثر واكثر
عشان كذا في النهاية الطير ما يعرف الانسان الا كصياد وقاتل فقط ولا تعرفه كصديق حنون يقوم على تربيتها والاعتناء بها بشكل يكاد يكون الاقرب الى الاعتناء بأطفالنا
والطير لمن يشوف الانسان متغطي بالقماش ما يعرف انه انسان
ولكن يشوف التصرف اللي بدر منه وهو انه هذا الكائن الغريب احسن الي ولم يؤذيني وقدم لي الاكل ويرغب في التودد الي !!!!
فهذا يدي الطير رد فعل ايجابي جدا تجاه هذا الكائن اللي في الآخر بيكتشف انه الانسان
وسبب انك ما تلبس قماش اسود عشان لا يكون شبيه بععباية الحريم اللي يكون الطير شافهم كثثيييير في المحلات ماتعرف عليهم واخذ انطباع سيء عنهم
ومعليش على الإطالة وكثرة الكلام
وصلى الله على سيدنا محمد وعلى آله وصحبه وسلم
ملاحظة:
يمنع النقل الكلام هذا ما كتبته الا لهذا المنتدى الغالي ولا يستحقه الا هذا المنتدى فقط.
وشكرا