الرمادي والله بهذلني ياناس

[رفيع الشان]

السلام عليكم ورحمة الله وبركاته

والله ياخواني ان الكاسكو اللي عندي بهذلني عمره تقريباً 8 شهور وشريته وعمره شهرين وبديت امل منه لانه يرفع ضغطي وانا مو ناقص


اولاً عندي مايتكلم واذا خليته عند احد يقولي انه يتلكم ويقوللي كلمات اقولها انا في البيت ؟ وعندي يغبغب يعني يهذري مادري ايش يقول


ثانياً طفشني في الاكل ماياكل الا حب شمسي ولا ياكل اي شي ثاني ابداًأضطر اني اغره بالابره وفيها سيريلاك كل يوم عن يوم


ثالثاُ ريشه اذاني في البيت قام يتطاير واغلب وقته ينتف في ريشه وراسه تحت في صدره ولا في ظهره واحس ان فيه بلا لأن واحد من الشباب قالي يمكن فيه قمل


رابعاً ومو راضي يخليني اروشه لو ايش يجن جنونه لو جا عليه قطرة ماء وهذي كلها عاديه


خامساً هو اليف جداً جداً يعني مايعرف حتى يعض لو اسوي فيه اللي اسوي مايعضني واذا قربت يدي منه مايهرب بلعكس احسه يقرب مني بس فيه خوف يعني مو مرتاح كأن اعصابه مشدوده


مادري العيب فيني ولا فيه


والله اكتب الموضوع هذا وانا محتار ومادري ايش الحل

دلوني اللي عنده خبر

[الجااارح]

أخوي الكريم / رفيع الشان

وعليكم السلام ورحمة الله وبركاته ،،،،،

اول شيء مبروك عليك الشهر وشهر مبارك عليك والله يتقبل منك الطاعات ولا يحرمك من اجره أنت ومن يقرى الكلام .....

وحياك الله يا اخوي معانا وانشاء الله تستفيد منا وتفيدنا عما قريب ونشوفك تكتب من خلال خبرتك احلى المواضيع فأهلا وسهلا فيك يالغالي .....


شرف كبير ارد عليك اول واحد وخصوصا في اول مواضيعك يالغالي

بس الله يكون في عونك راح اكتب لك الين ما تعاف القراية وانت ما شاء ما خليت كلمة الا وقلتها في طيرك تفضل بقراية التفاصيل :

الكاسكو اللي عندي بهذلني عمره تقريباً 8 شهور وشريته وعمره شهرين وبديت امل منه لانه يرفع ضغطي وانا مو ناقص

افا عليك بس احد يمل من طير رباه وهو في صغر سنة وكلامك ذا كلام شخص قليل الصبر الصبر زين وانا اخوووووك يا زين الصبر وصابه رب العالمين فصبر يا صاحبي عليه ولا تمل منه ابد ...

اولاً عندي مايتكلم واذا خليته عند احد يقولي انه يتلكم ويقوللي كلمات اقولها انا في البيت ؟ وعندي يغبغب يعني يهذري مادري ايش يقول

بوادر خير وبركه الكلام اللي تقوله يا صاحبي ما شاء الله يتكلم الطير وهو في هذا العمر شيء جميل ورائع واما عن الببغبه اللي تقولها يمكن الطير لقط له كلمة من التلفزيون ولا سمعك تقولها ولقطها وانت ما عرفت تميزها بس حاول انك تفهمها ولا تقرب منها وكررها عليه الين ما ينطقها صح لأن الطير في بداية الكلام صعب تميز اللي يقوله واضف على ذلك حتى لو كان مدرب ففي البداية ينطق الكلمة بشكل مو واضح ولكن الحمد لله ان طيرك يتكلم وشيء جميل وحلو ....

ثانياً طفشني في الاكل ماياكل الا حب شمسي ولا ياكل اي شي ثاني ابداًأضطر اني اغره بالابره وفيها سيريلاك كل يوم عن يوم

لا يا صاحبي خلاص ولى زمان الابر في السن ذا خلاص الحين الطير صار اكبر من الابر وعلى فكره ان ما تعود اليوم على الاكل بكره انشاء الله ياكل الفواكه والخضروات والحبوب المشكله اهم شيء شيل حكاية الابر والسريلاك من راسك الحين وانت عطه الحبوب المشكله وشويت فواكه ولو ما تقبلها لا تطفش وتتأيس راح يجي له انشاء الله اليوم اللي ياكل فيه ما لذ وطاب ملاحظة هامة جداً :انصحك بالابتعاد عن فكرة التجويع تجوع الطير وتجبره على اكل معين ما انصحك فيها ابد .....

ثالثاُ ريشه اذاني في البيت قام يتطاير واغلب وقته ينتف في ريشه وراسه تحت في صدره ولا في ظهره واحس ان فيه بلا لأن واحد من الشباب قالي يمكن فيه قمل

اللي قالك انه فيه قمل ما كذب وهو اعطاك احتمال فقط من بين عشرات الاحتمالات اللي هي :

ان الطير يمكن يكون حاس بالوحدة والملل فأقرب شيء يسويه انه ينتف ريشه .
الحشرات زي ما قال الرجال ويمكن وجود حشرات وتسبب له نتف الريش .
ان الطير كان مدرب من قبل شخص وباعه وتسبب له حالة نفسية وطبعا الاحتمال هذا بعيد عنك تمام البعد كونك شاريه فرخ .....
الاهمال في الترويش ...

الحل :
عطه العاب وهي تنباع في المحلات المختصة بالطيور
روشه باستمرار
في منظف ينباع في الصيدليات وطارد للحشرات روح به عند بيطري وهو راح يعطيك العلاج اللازم

رابعاً ومو راضي يخليني اروشه لو ايش يجن جنونه لو جا عليه قطرة ماء وهذي كلها عاديه

اكبر احتمال احطه قدامي عشان نتف ريشه هو السبب هذا عدم الترويش يا رجل خاف الله مو بكيف الطير
انت خذه في البداية راح تكون عليه صعبه ويخاف زي ما قلت خذه للحمام الله يكرمك وروشه تحت الدش بس ما تخلي الدش صبه قوي لا وسط وفي الاسبوع مرتين على فكره اقل شيء ....

ومع مرور الوقت راح تشوفه احلى شيء يونسه الترويش

خامساً هو اليف جداً جداً يعني مايعرف حتى يعض لو اسوي فيه اللي اسوي مايعضني واذا قربت يدي منه مايهرب بلعكس احسه يقرب مني بس فيه خوف يعني مو مرتاح كأن اعصابه مشدوده

الحمد لله جات منك المرة ذي وقلت والف يعني ما يبغاله الا شويت صبر فقط لا اقل ولا اكثر وانشاء الله العادة ذي راح تروح منه نهاااااائي بإذن الله ... بس فرغ نفسك له وخلك معاك اقل شيء ربع ساعة في اليوم ...

مادري العيب فيني ولا فيه

محشوم وعداك العيب وانا اخوك وفيك الخير والبركه ......

والله اكتب الموضوع هذا وانا محتار ومادري ايش الحل

اعاد العلم جاك وان شفت فيه قصور ما يردك الا لسانك واتكلم وانشاء الله اجيبك باللي اقدر عليك ...

واخيرا انتهينا وكيف عيونك بعد القرايه وبإنتظار سادسا وسابعا وثامنا ...... الخ

مع تمنياتي لك بالتوفيق والنجاح ،،،،،،،

[---سلفر---]

ما قصر الجارح رد عليك رد امشي عليه

وراح اتشوف النتا ئج اخوكم ---سلفر---

[رفيع الشان]

الله يعطيك العافيه اخوي الجارح على هذا الرد والله ماقصرت

والله صرت اروشه بأستمرار بالبخاخ ارش عليه ماء

وشريت له حب مشكل في علبه خضرا وفواكه مجففه

وطالت اعماركم جميع صرت افكه من اقفص وافكر اني اشتريله ستاند

ولكن صر الاحظ عليه في الليل اذا كان نايم يهز راسه يعني ينفضه عن كل دقيقه ودقيقه واجنحته يهزها بسرعه مره اليمين ومره اليسار كأنه شي يقرصه


ان شاء الله تروح بعد الترويش بأستمرار



واكرر شكر لكم جمعيعاً