أمازون بلوناب أو بلوكراون ؟

[BIN ABDUL AZIZ]

بسم الله الرحمن الرحيم

السلام عليكم و رحمة الله و بركاته

اخواني الأعزاء هذي اول مرة في حياتي اشارك في منتدى طيور

و كذلك هذي اول مرة اقتني فيها طائر

لدي أمازون عمره اربع اشهر اشتريته من اسبوع ، و طبعاً غصب لحد ما تعود علي و اليوم فقط قدرت احطه على ايدي و اكسب ثقته .

قضيتي هي التالي :

انا اشتريته على انه بلوناب امازون ،،،
اليوم و انا مار بسوق الطيور اكتشفت ان اللي عندي بلوكراون و ليس بلوناب ، طبعاً انقهرت و قلت حق صاحب المحل اللي شتريت منه اني اليوم برجع عليه البلوكراون و آخذ بلوناب ،،،

لكن الحين قلت اسألكم من واقع خبرتكم هل افضل اني ارجعه و آخذ بلوناب ام ان هناك ليس بفرق بينهم ؟ وهي هناك ميزات في الكراون قد افتقدها في البلوناب ؟ لأني ما ابغي انخدع مرة ثانية مع صاحب المحل

[monybat]

طبعا الفرق كبير بين السما والارض

اليلوناب يعتبر من الطيور المتحدثة رسمي ويكون المركز الاول على مستوى الطيور في الكلام
اليلوكروان يعتبر المركز الرابع والبعض يقول انه الثالث لكن ما هو متعارف عليه انه الرابع في مستوى الكلام

السعر يختلف يعني بالكويت يلوكروان تحصلة من 180 دينار الي 280 دينار اقصى حد ليه

اليلوناب من 750 دينار وانت طالع الي 1000 او 1200 واذا عنده كلام اكثر زاد سعره نتمنى مشاركتنا بالصور كي نتمكن من مساعدتك
بالتوفيق

[the_gostman]

كما افادك مشرفنا الغالي..

الافضل ترجع الطير وتأخذ لك يلو ناب ..فهناك فرق كبيـــر بينهم..

ابحث في اليوتيوب وشوف الطائرين كيف يتكلمون..وأكيد رح يعجبك اليلوناب لذكاءه الخارق وحفظه للجمل الطويله.

بالتوفيق
أخوك رمزي

[BIN ABDUL AZIZ]

توني طالع من سوق الطيور

من قرادة حظي البلوناب الاخير انباع و كان عمره 6 شهور ، المشكلة اللي مواجهتني الحين ان عنده دبل يلوهد و عمره 4 شهور و خفت انخدع مرة ثانية ، و شفت عنده يلوكراون عمره سنة و نص و يتكلم جمل طويلة السلام عليكم و تعال حبيبي و بسم الله الرحمن الرحيم ، يمكن شوي اقنعني بمستقبل اليلوكراون وهو مصر اني اخلي طيري معاي و ما استبدله ، المشكلة اني اخاف انه مسوي لي غسيل مخ و ابتلش بالطير ، البلوناب اللي في المحلات الثانية اعمارها كبيرة و انا ابغي طير اربيه و هو صغير لاني ابغيه يتوالف مع كل اهل البيت

[the_gostman]

أخي الكريم..

استبدل طائرك بالدبل يلو هد امازون فعمره صغير ورح يتعود على العائله..وهو ببغاء متكلم باااااااارع جداً وذكي جداً.

بالتوفيق
أخوك رمزي

[monybat]

الدبل يلو هيد
رائع ايضا اليلو كروان جيد ويتكلم بس اهم شي لا يخدعك بالفلوس ويغشك
بالتوفيق

[ولد دار زايد]

اخوي في مثل عندنا يقول (محد يقول دبسي حامض)

لا تتوقع التاجر يقولك هذا أحسن ولا هذا لانه اللي يهمه فلوسك وبس
واسمح لي اذا عطاك يلوكروان بسعر يلو ناب فهو نصب عليك بقوة
لان غير فرق السما و الارض بالقدرات في فرق بالفلوس فوق 4000_5000 درهم

أنصحك ترجع الطير وتأخذ فلوسك وتتعامل مع تاجر ثاني لان هذا صار غير موثوق أبدا
وأتمنى تحط صور للطير اللي تبيه قبل ما تشتريه

تحياتي

[طاهر عبدالعال]

أهم شئ أنه ماعطاك اليلوكراون بثمن اليلوناب هذه النقطة الجوهرية لأن فى فرق بالسعر وأكيد اليلوناب أفضل من اليلوكراون هذا شئ مسلم بيه لكن كطائر اليلوكراون طائر ممتاز بالكلام والولافة عن تجربة ويحفظ جمل وكل شئ

[BIN ABDUL AZIZ]

السلام عليكم

أبشركم يا شباب رجعت البلوكراون على المحل و قابلت صاحب المحل يمدحونه بحريني ، و شرت من عنده يلوناب سعره 12،500 لكن بعد المكاسر خذته ب 12000 ريال قطري
عمره خمس شهور و على قولته خلص من السيريلاك و سمعته يقول السلام عليكم و يقول ان الطير جاله من بريطانيا ، و اليوم بإذن الله تعالى بنزل لكم الصور و طبعاً ما استغني عن نصايحكم

عطاني حبوب سمرة قالي عطها للطير بمقدار عشر حبات باليوم بس مادري هي شنهي ، اما الأكل ابغي نصايحكم لاني ما ابغي الطير يسمن و كذلك ما ينقصه عنصر غذائي

[BIN ABDUL AZIZ]

ما شاء الله تبارك الرحمن