ياربي لك الحمد .. لقيت عريس لـ قطتي لكن فيه مُشكله عويصه =( !!

[توزر]

السلام عليكم

أسعد الله أوقاتكم بـ الخير والمسرّات ق1

قطتي أنثى عمرها 9 شهور وشوي طبعها خوّافه بـ شكل مو طبيعي !
من صغرها كانت كذا أي صوت تخاف منه وأي حركه مُفاجئه تخاف منها .. وتخاف كثير كثير كثير من القطط
وتجلس تبخ عليهم وتركض زي المجنونه !!

المهم .. ابششركم اني اشتريت قط وراح يوصلّي اليوم ان شاء الله وما أدري كيف اخلّيها تتعوّد عليه ؟
لأنها زي مَ قلت لكم خوفها مو طبيعي واذا خافت عصّبت واذا عصّبت وخّروا عنها


وششاكره لكم ..

[الدلع]

وعليكم السلام ورحمة الله وبركاته
حياك الله

حلو لقيتي .. على الأقل ترتاحين نفسيا وزين انك شريتيه على أساس ما تكونين ملزمة بترجيعه بعد 4 أيام أو اسبوع ويمكن ما يحصل التلقيح في ذا الفترة .. بس بصراحة عندي تحفّظ شديد على تزويج البسة في ذا السن الصغير محافظة على صحتها لأن أفضل شي لها من سنه وفوق فلو كان بإمكانك تأخرين التزاوج 3 شهور زيادة يكون أحسن ولكن ما أغفل الإشكال الموجود مع الوالدة بسببها والبلوى الي مسويتها في البيت وذا الشي ما يرضيني
شوفي يا طويلة العمر أبعطيك حل لسالفة وشلون تعرفينهم على بعض مع إن الحال من بعضه من ناحية إن بستي خوّافة بالحيل وتخاف من ضلالها ومدري وشلون بيكون حالها يوم اجيب البس عندنا
أتمنى يكون البس عمره كبير يعني سنة ونص أو سنتين ويكون جرب التزاوج قبل كذا حتى ما تطيحين في مشكلة جديدة تخص طريقة التزاوج .
في البداية لا تعرضينهم على بعض يعني كل واحد حطيه في مكان وجيبي صندوق رمل ثاني وصحن أكل وشرب للبس الجديد ولما يستخدم الرمل خذي كمية منه ( يعني مستخدم ) وحطيه في علبه بلاستيك أو أي شي ما تبونه واتركيه عند بستك وكذلك صحن الأكل والشرب بعد ما ياكل ويشرب اتركيه عندها وخليها تشمشم الين تقول بس لحد ما تتعود على ريحته ورجعي الصحن ولا ترجعين الرمل وبتلقينها كل شوي تروح وترجع على الرمل تشمه وبيجيك من الحب جانب وبتقعد تشمشم فيك لو كنتِ لامسة البس الجديد واتركيهم على هالحال يومين وبعدين اعرضيهم على بعض بعد ما تكون ريحة البس علقت في بيتكم وتعودت عليها بستك وان شاء الله ما يكون الاكل خير مع انه ما راح تخلى السالفة من البخ
ترك ريحة البس الجديد تسهل عملية تعارف البس القديم مع الجديد وهذا الشي صار مع بستيني وما خذوا غير اسبوع وصاروا سمن على عسل
وفيه ناس تستخدم طريقة مسح البس الجديد بفوطة وبعدين مسح البس القديم بنفس الفوطة حتى يتعود على ريحته .
لكن أحب أنبهك إلى شغلة مهمة وهي ان البسة بعد ما تولد بالسلامة بتطلب من جديد فلا تستسلمين لها وانتظري أربع شهور حتى تفطم الكيتن وترتاح وما يأثر حملها الجديد على صحتها ويمكن لما تطلب قبل 4 شهور تعدم البيت وهنا بيجي سؤال مهم وهو :
يا ترا البس الي شريتيه للتزاوج وش بتسوين فيه .. بتبيعينه وانتِ محتاجته للتزاوج القادم
فكري زين لأنه صعبة كل مرة تشترين وتبيعين بسبب التزاوج
يعني إذا كان في نيتك البيع فعلا لهذا البس بعد اتمام عملية التزاوج ( وان شاء الله يجيب سعره ) فالمرة الجاية احرصي تجيبين لها بس متأكدة من خلوه من الأمراض من أحد تعرفينه أو مستعد يتركه عندك من اسبوع لـ 10 أيام لأن حالة بستك ما ينفع معها انك ترسلينها خارج البيت للتزاوج
أو انك بتضطرين لأمور ثانية مثل التعقيم أو ابرة التأخير فقوسي قبل ما تغوصين واحسبي للمستقبل ألف حساب لأن تربية البسس مسئولية كبيرة وكلنا لازم ندفع ضريبة العشق لذا الكائنات المحبوبة
بالتوفيق اختي

[باغيرا]

وعليكم اسلام ورحمة الله وبركاته
طيب الحمدلله انك لقيتي قط
يلا الف الف الف مبروك
وهالموضوع راح يفيدك باذن الله
http://www.2zoo.com/vb/showthread.ph...=1#post1462278

[توزر]

" الـدلع "

مَ أدري كيف أشكرك يَ قلبي :$
بججد أفدتيني كثير كثير كثير ربّي يسسعدك :$ :$

بس لـ الأسف صاحب القط كلّمته اليوم عَ أساس نتّفق على مكان استلم القط فيه وقالي انو جاه التهاب
فِـ الاذن !!

كل مافُرجت رجعت وتعسّرت والحمد لله عَ كل حال بس !!


-


" باغيرا "

ألف شكر لك ..