قطتي أصبحت متوحشة الحل ؟؟؟

[شقاوة قطاوة]

السلام عليكم ورحمة الله وبركاته..وكل عام وانتم بخير جميعاً بمناسبة قدوم شهر رمضان الكريم
أنا عندي قطة شيرازي ع صغارها الاربعة كانت قطة حبوبة ومسالمة جدآ وتتحمل ازعاج البزورة ولها عندي قرابة الشهر وكل امورها كانت ماشية زي الحلاوة ,عاد تعرفون بمناسبة قدوم رمضان اشترينا غنم والقطة حقتي من شافت الغنم الله لايوريكم تجننت وصارت واحدة سيماوية وبس تصايح وتطاردنا تبغى تعضنا للاسف عضت ولدي وبنتي وانا مو مخليني اتحملها الإ عشانها ام حست بالخوف ع عيالها بالله تكفون ايش الحل معاها ماترضى احد يلمسها الا زوجي وحتى انا الي كنت اهتم فيها صارت تفح بوجهي انا بعدت عنها البزورة وماشافتهم الا اليوم الصبح وبرضو راحت تجري ورى ولدي وعضته انا الان محتارة فيها كلنا نحبها وحتى عيالي الي تأذو منها باقي يحبونها هيا وعيالها , هل ممكن ترجع تهدأ زي الاول وايش الحل معاها على شان ترجع زي اول وهل اقدر اشيل انيابها أو تضرها سواء في الأكل أو وقت البيع فيما بعد

أرجو مساعدتي ياأهل الخبره .

[دلوعةقطوتي]

وعليكم السلام ورحمه الله وبركاته
وانتي بصحه وسلامه
بعديها عن الخواريف لاتشوفهم وخليها بغرفه لحالها هي واولادها وزيدي اهتمام فيها لاتلمسيها مباشره بس حاولي تحسسيها بالامان وجيبي شي تحبه تريت او دراي فوود واعطيها من يدك وحاولي تلمسي راسها وتكلمي معاها بصوت هاديء
لما تعض قولي لها بصوت عالي شوي لا مره على مره تتأدب هي اللي فيها خوف وعصبيه
تجيهم فترات يعصبون ويعضون احيانا للفت الانتباه
اما تشيل انيابها حرام كيف بتاكل
حاولي تلهيها كمان بالعاب الكور او الفار واعطيها العاب صغيره تعضهم وان شاءالله فتره وترجع زي اول

[هشوووم]

مدام زعلتوها با الخواريف <<< طيب الخرفان << هذي وشفيها
لابد تذبحون واحد وتذوق منه عشان تبرد خطرها وتحس بلأمان من حقها تخاف وتخاف على عيالها برضوه اعملي بنصايح الأخت دلوعة قطوتي ون شاالله يزين الأمر ونتضر منك باقي الموضوع والأخبار
تحياااتي
إلك

[شقاوة قطاوة]

ربي يسعد قلوبكم على ردودكم بس معلش بغلبكم معايا شوية ,
بالنسبة لغرفة لحالها هذا الي انا سويته من ليلتها عزلتها هي وصغارها اما الخواريف والله من ليلتها ذبحناها وانتهينا منهم بس المشكلة قطتي مازالت تفح فينا وتطاردنا بالبيت وانا الليلة كان نصيبي من المطاردة عضتني واذا ناديت عليها او بعدتها ماتسمع مني بس تطاوع زوجي وتتقبلو من بيننا وتاكل من يده وتخليه يجيها يمسح عليها والله مرة متغيرة ولا احس انها بترضى حتى عيالها انحرمنا منهم ما عاد لعبنا معاهم , اما هيا ماقد لعبت بشي كيف اجيب لها العاب وهي ماتلعب اصلا مو فاضية بس تبغى تعضنا وتصدر اصوات بصراحة تخوف وتبغى تقفز الحل ياجماعة والله انا احبها ولا ابغى اخسرها المشكلة انا الي كنت بس اهتم فيها واداريها مو زوجي

[شمسة]

القطاوة دايما خونة مهما ربيتيهم بس خوونة احنا ياما ربينا قطاوة من الشارع وأكلناهم ونيمناهم عل فراشنا بس هربوا منا تخلصي منها وخلي عيالها معاج واذا كانت غالية بيعيها تستفيدين من الفلوس عشان تشترين منهم أغراض حق رمضان هههههه

[شقاوة قطاوة]

هلأ بالأخت شمسة والله يالغالية انا مو محتاجة أغراض لرمضان الحمدلله الامور طيبة من الله أنا محتاجة حل لقطتي لآن الغلط منا مو منها هي ماتنلاام أم وخافت على عيالها وياريت أهل الخبرة ينصحوني ويساعدوني لاني والله العظيم للأن ما ارتحت خايفة عليها وشايلة همها وزعلانة عليها وحتى بزورتي منقهرين على الي حصل فياليت الاقي حل عندكم

[vampire-TW]

وعليكم السلام ورحمه الله وبركاته
قطتك خايفة

نضرا لوجود اطراف دخلاء بالبيت

و هي بهذه الحالة تكون جد خايفة و متوترة و ما تعرف فيها اي احد لا مالكها ولا ...

و مابالك انوا عندها كيتنز ..

ضروري انك حسسيها بلامان

و لو تضعيها بغرفة مع اولادها يكون افضل

و تقربي منها تدريجيا حتى تتطمنلك

موفقه

[bobobebe]

أنا أظن انه ريحه الغنم تكون فيكم. يمكن انتم ما تشموها بس هي تشمها علشان كذا بتعضكم

هذا رأيي و إن شاء الله الخبراء راح يفيدونك *

[mkdsh]

اتركوها ولا تجونها الين تهدا .,


وان شاء الله تتحسن .,

اتوقع اسبوع كذا ثم ترجع طيبيعيه

اهم شي لاتجونها ولا تقربونها .

[شقاوة قطاوة]

والله أنا من ليلتها حطيتها بغرفة لحالها هي وصغارها وندخل أنا وزوجي عليها بشويش عشان ماتخاف احط لها اكل واغير الليتر حقها وامسحها وأدلعها شوية وزوجي يأخذها بحضنه ويشيلها ويمشي فيها بالبيت ويخليها تشوف انه مافي شي تخاف منه سبحان الله بحضنه ومعاه مرتاحة لكن انا وبزورتي ماتبغاااااااااااااانا بالمرررة أنا تجيني تأكل من يدي جبن ولا دراي فوود بس او اذا حطيت لها بصحنها تاكل وبس وتجلس بس تطالعني باين حاااقدة وصارت من اقل حركة او صوت تتلفت سبحان الله تغير فظيع في طباعها والله ماكانت كذا حتى لدرجة صارت تلاحظ الوان ملابسنا يعني موسوسة من اي شي , اما بالنسبة لريحة الغنم الغنم دخلت مدخل البيت بس حد صلاة المغرب عشان يوديها للمطبخ والله ماطولت عندي واحنى كلنا غيرنا ملابسنا وتحممنا لاننا فكرنا بذا الشي والله حتى المدخل غسلته بكلوركس عشان ريحتها يعني مافي امل تقول ان ريحتنا غنم هذا واحنى ما لمسناها بالاصل الغنم , طيب وبعدين اذا انا تركتها لوحدها وماشافتنا مو يمكن تتعود على كذا يصير ماتبغانا ابد ؟!
معلش يا جماعة عارفة اني غثيتكم بس والله متورطة معاها لدرجة زوجي فكر يبيعها وانا والله مو هاينة عليا