قصة مرعبة توها حادثة لي :S

[K-O-H]

السلام عليكم ورحمة الله وبركاته

أنا أكتب ولازلت مرتعش

عندي زوج منتج وتوه منتج الانتاج الثالث حيث أنتج 4فراخ

المهم ياجماعة الخير انه الذكر فحل والزوج قوي جداااااااا بلا أي منازع

عاد فيه ببغاء أزرق درة يعني مثلهم جالس يصارخ 24ساعة مسوي فيها قوي ومن يشوفهم مايسكت ومحتج


عاد أنا خلاص قهرني وين ماأروح أسمع صريخه

قلت بحطه معهم 5دقايق بالكثير

والا الذكر ينطح فيه ويعض في ريشه بشراسه كانت أهم نقطة لي انه ماتحصل اصابات أو رجله مثلا تنعض

والازرق جبان خايف ومايقاوم بالضرب أبد بل بالهروب


عموماً تطور الوضع وأنا غفلت والا دخل الى بيت التفريخ وقتها وقف قلبي مع الفراخ

طلعوه علطول

جيت بشيله خلاص

والا دخل مرة ثانية

وهاذي المرة دخل معاه الزوج وجلسو يضربو فيه وأنا قعدت أطلع أصوت وأطقطق على البيت لعلا وعسى يطلعون مثل ماتطلع الحيات من الجحور

خلاص وقتها أسمع مذابح في الظلام قلت لابالله راحو كلهم في بيت الموت

بعدها دخلت عصا... وطلع الذكر يصارخ وحصل له عض أقصد ذكر الاخضر اللي من الزوج مب الازرق

وحرصت على عدم دخول الذكر مرة أخرى المهلك والمحاول الى الدخول

الانثى شابصه مع الذكر الازرق عض أقسم لكم بالله الانثى ذي شراسته تعض حتى يد انسان صدقوني ياجماعة وراح أحط لكم مقطع لمدى شراستها

جلسو يتذابحون دقيقة كامله وأنا مب عارف وأحاول أفككهم بس أخاف أقع ضحية بعد !

بعدها جلست أضرب الانثى بالعصا قامت شبصت فيها وسحبتها لخارج بيت التفريخ الى القفص

وقفلت على الزوج وتركت الذكر العدو الازرق داخل مع الفراخ !

الحين الفراخ في وضع خطير

أنا شفت الذكر مقلوب على ظهره من التعب وشوي يشوف الموت
فـ ماتوقعت انه راح ينتقم في الفراخ

فتحت أعلى بيت التفريخ اللي هو الباب

أخذ نفسه وقعد يحاول ينط يطلع

20ثانية وقدر يطلع ودخلته قفصه علطول وهو ماقدر يطير مني جلس على ظهره خايف


رحت للفراخ وشفت الوضع المؤسف لقيت بقعة دم أعلى رقبة أحد الفراخ والظاهر كان أكبرهم يعني أقواهم

مدري الدم من أظافيرهم والا من المتهاوشين صار فيه

عموماً كانو محتاجين نفس ومساعده وعلطول سمحت للزوج بالدخول للمساعده ولو اني أعرف انه الذكر يقتل الفراخ اذا حدث التماس مع بشر أو عدو يعني


ودعواتكم بعدم موت الفرخ وان شاء الله الدم مب منه

وماراح أكررها ثانية ولتكن عظة للجميع انها مب مثل هواش بشر تقدر تفرق الاثنين لا ذول كلهم أطراف حادة واللي مافهم كيف يعني يشبصون في بعض ممكن أحط لكم مقطع بس بالعربي يعني يلصقون مع بعض كل واحد يمسك رجايل الثاني بقوة ويعض فيه

في النهاية شفت الانثى في ظفرها دم والذكر الازرق والله شكله جسمه كله دم

والله يسامحني ان شاء الله

ان شاء الله محد يموت

[الآسطورهـ]

وعليكم السلام ورحمة الله وبركاته

معروفه الدرر بشراستها

خاصةً اذا كان عندها فروخ !!

بس زيـن انك اعتبرت <~ شكلك تقول اول وآخر مره اسويها

وإن شاء الله الفرخ مافيه إلا الخير

تحياتي لك ..

[ابوميسون]

وعليكم السلام وورجمه الله وبركاته
الحمد لله على السلامه وفعلا تشوف شي غريب
لانه عندها اطفال ومبدائها الدفاع حتى الموت
لكن جت سليمه ان شاءالله وشكرا لك وتقبل مروري

[NAHHAS]

انشالله عليه العافيه ....ودير بالك مره تانيه...

[K-O-H]

مشكورين عالمرور وتستاهلو برفع لكم غداً مقاطع تشوفو بيها الزوج وشراسته وهو أقوى زوج درة بلا منازع مثل ماذكرت

الانثى هاذي شرسة جداً والله خطيرة تعرف هاذي ماتنحاش منك حتى لو ماعدنها فراخ بل تعضك حتى الجعير ماتطلعه الا اذا طفشت منك تبي تضربك تعض في الحديد ترويك مدى الشراسة راح أرويكم هجومها على الكاميرا كيف وترى لها سوابق انها تذابحت مع انثى أخرى وتناطحت معها

لكن والله العظيم وقت مايشبصون في بعض ...باليد المجردة ماتقدر تفصلهم بدون ماتطلع مسبح دم صدقوني وقتها مايخافون منك

+اتضح انه الدم من الفرخ لكنه مقاوم لحد الآن والله يستر ومشكورين عالمرور


----ترى وقتها كنت قاعد ألعب call of duty mw2 في الـ ps3 وعصبني صريخ الذكر وصار اللي صار !---

[foo_fee]

يارب محد يسويها مره تانيه

[Parrota]

ان شاء الله ما يموتو ولا واحد بآذن الله ليش ما تروش الازرق عشان يخف دم شوي
و ان شاء الله ما يموتو ولا آحد منهم بس تحمل تعيدها قصة حزينة

[hani_666_1]

اسالك بالله عندك مخ

[almer]

(عندي زوج منتج وتوه منتج الانتاج الثالث حيث أنتج 4فراخ)

(قلت بحطه معهم 5دقايق بالكثير)

الجمل اللى بين الاقواس من موضوعك قمة التناقض
السطر الاول يدل على انك خبير والسطر الثانى يدل على انك غشيم بالطيور.

بس والله ساعات الفراغ يخلى الواحد يتهور لووووول لاتعيدها ويروح تعبك بلاش

[K-O-H]

والله يا أخواني أنا كنت محب للدرة المطوقة وعندي زوجين منتجين حالياً وذكر أزرق بالغ مزعج و فرخ مابعته عمره 9شهور مدرب وناطق


بس أنا كرهت الدرة انها تكون لك مروضة وتخونك في أي وقت

شرسة جداً تعضك رغم تعبك عليها

كل هذا تفريغ نفسي يعني ! أنا اللي قاهرني انه الذكر الازرق هذا حش رجايل ببغاء مروض عمره 8سنوات معاي منذ أن كان فرخ

رغم انه عمر الازرق سنة بس

+الببغاء الازرق مزعج ومعوق الرقبة وسعره انصبت فيه وهاذي اللي قاهرني كل يوم أمر عليه ودي أبيعه بـ 300 على الاقل تكون الخسارة 100ريال بغض النظر عن توفير الحبوب والفواكه

عموماً شكله عمره مابيفهم شي اسمه كما تدين تدان اللي هو الذكر الازرق فـ أبيعه بخسارة ولا اني أكسب ذنوب زياده اللي سويته حرام والحمدلله الفرخ بعده عايش


بالنسبة للببغاء الاز ق رجع طبيعي طلع الدم في الجناع والرجل جهة التحجيل بس


ولتكن عبرة لمن يعتبر