ارجو من الجميع حل مشكلتي مع الطير والطبيب المعالج ... ضروري !!!

[سفير الببغاء]

السلام عليكم ورحمة الله وبركاته

كيفكم جميعاً اخوان واخوات
مشكلتي جدا محيره وللاسف احترت بين الطير وبين طيبة الدكتور المعالج

بأختصار المشكله

شرية فرخ امزوني محجل ب 3500 ريال حجل اصلي
قبل اسبوع تقريباً والطير بصراحه غير اليف يعني العض الله لا يوريكم
شي مو طبيعي ولا يطلع على اليد المهم انه ياكل من اليد احياناً
ماعلينا في هذا كله نجي لزبدة الكلام
جاء ببالي قلت اوديه على مكان يقص جناحه ويبرد اضافره ومنقاره
قلت مافيه الا (( ...... )) بدون ذكر اسم المحل علما بانه مشهور في جده
وفعلاً رحت للطبيب ماكان عنده احد وشرحته له الموضوع من والى
قال ابشر ان ابرد منقاره واضافره واضبطها لك قلت خلاص توكلنا على الله
المهم طلعت انا برى الغرفه قلت عشان الطير لا يشوفني وياخذ فكره عني
ويكرهني زياده عن اووول وشويه بدا الصوت العالي والجعير وشي الله لا يوريكم
اختلط صوت المبرد بصوت الطير يعني قووة الازعاج من الطير انا قلت شي عادي
لانه اول مره تسوي الحركه هذي لانها اول تجربه لي قلت عادي الطير خايف بس

وشوي الا والطبيب يقول خلاص الطير جاهز تفضل
جاي اطالع في الطير الا فيه حاله يرثى لها بصراحه
تفاجئت وانصدمت والله العظيم
اول شي : الطير ينزف من رجله والدم ينقط في صحن القفص
استغربت اقول للطبيب ايش الدم هذا قال عادي بس مع الحركه بس
نزف شوي قلت كيف عادي شوف واحد من اظفاره مخلوع من الاصباع وماسك شي بسيط بس
قال مو مشكله بداويه الحين بعطيه مهدي يوقف الدم وفعلا وقف الدم
بس مامشت معايه الحركه لان العياده بدأ يجيها زباين قلت مو مشكله اروح البيت
واذا صار شي امر عليك بكره اعطني الفاتوره احاسب
قال الطبيب لا والله ماتحاسب المره هذي خلها عليه استغربت من كلامه
اصريت انا الا احاسب قال لا وطلع معاي الى السياره وودعني وقال خلاص احنا اخوان

قلت اوك يعطيك العافيه وان اشءالله الطير مافيه اي شي وتطمنت
ورجعت البيت وتفاجئت بالطير الا ويطلع صوت تجعير الم شديد كانه يعاني من شي
اتضح مسككين انه مايقدر يوقف الا برجل وحده بس يعني اا نزل الرجل الثانيه تألم
قلت يمكن بس مع الالم وبكره يخف ويرجع طبيعي .. هذا الكلام كله صار بعد العشاء
يوم الجمعه الماضي يعني اليوم كمل ثلاث ايام تقريبا
اليوم الثاني صحيت الصباح شيكت على الطير الا والطير مو العاده لا حركه ولا شي
جالس على العصا اللي بداخل القفص وشيكت على الاكل والله لا اكل ولا شي
خليته الى العصر قلت يمكن ماحس بالجوع اا جاع بياكل
الا والمسكين حتى الاكل مو قادر ياكل حبة الشمس او الفصفص مايقدر يكسرها
كل مااكل وحده طاحت عليه وكل مايجي ياكل مايقدر يكسرها اتضح انه حتى المنقار برده
الى اخر شي يعني رجع الطير كانه ( غر ) لازم ااكله انا بيدي سيرلاك والا بالابره
وهذا الشي اللي صار فعلا طلع جوعان وجالي أأكله سيرلاك وخبز ممطحون

العصر رجعت للطبيب وقلت له السالفه قال خليه وتعال بعد يومين خذه
رحت اليوم اخذه قال خلاص الطير كويس استلمه
شيكت عليه وقلت اتاكد من الظفر اللي كان بس معلق على وشك ويطيح
لقيته مو فيه قلت للطبيب وين اظفره قال شلته وكم يوم ويطلع قلت ايييييييييه طيب
والاكل قال خلاص بدى ياكل قلت اتاكد عنده قبل لا اشيله
وجربت العاده ياكل من يدي ونفس المشكله اعطيه حبة الشمس ويحاول فيها وتطيح منه
مو قادر يكسرها عشان ياكلها
طيب اقول للطيب طيب هذا الطير كان بكامل صحته وعافيته وكلفني 3500 ريال
ولو تسال صاحب المحل عندكم اقل شي فرخ زي هذا تبيعونه 5000 ريال
والظاهر اللي من جده يعرفون المحل اللي اقصده ياليت بدون ذكر اسماء يااخوان

هذا الحديث الاخير دار بيني وبين الطبيب اليوم بعد العشاء ياليت تنصفوني لاني محتار
الطبيب
كم كلفك الطير
انا
كلفني 3500 ريال
الطبيب
طيب خلاص يوم 25 ميلادي استلم الراتب تمر عليه اعطيك المبلغ
انا
يادكتور انا ماقصد من الشي هذا كله اني اسيئ لك او اني اظلمك او اني اتبلى عليك
انا عارف انه مالك ذنب في اللي حصل كله كل اللي ابغاه ان طيري يرجع زي اول وبس
الطبيب
والله اللي اقدر اسويه لك بالطير مافيه حل ثاني الطير قدامك
انا
شوف يادكتور انت عارف اني ماوصلتها للاداره عشان حقي مايضيع وعشان
مااقطع رزقك نهائياً والله ثم والله انا ماجيتك الا من بعد ماسالت هنا وهنا لحد مانصحوني
اجي الى عيادتك واستفيد من خبرتك خدمه مقابل اجر وتاخذ حقك عليه وزياده ..

قال مو مشكله حصل خير وتاسف الدكتور على اللي حصل
وتركت الطير عنده وموعدي معاه يوم 25 بعد ثلاث ايام

وهذي قصتي يااخوان وماحبيت اختصرها عشان تحكمون في شي ينصفني انا
وانا صاحب حق ولا تظلمون الطبيب لانه مو قاصد والله يشهد على كلامي
لانه في العياده ماكان فيه غيري انا وهوه

سامحوني طولت عليكم
بس تكفون ابغى حل مقنع للطرفين
انا خسارتي 3500 ريال وخايف الطير يموت عندي اذا استلمته
والطبيب يمكن يكون راتبه قيمة الطير واظلمه فيها لاني لو استلمت فلوسي بترك الطير له

اخوكم

[شايب حائل]

اخوي دكتور بيطري قص جناح وبرد منقار واظافر انها تخوف انا وديته مره للبيطري بس يوم شفته يجعر كنسلت والحمدلله هو كيذا كويس ليتك خليته على حاله بس ياخي انا انصحك انك تاخذ منه تعويض لانك على حق وهو اذا مو قد الشغله ليش يسويها انت مثل طبيب اسنان رحت له وجلس يكسر ويبني في ظرسي شوي قال اخوي انا اسف الصراحه انا ما اعرف له وابي احولك للمستشفى لازم عمليه في الفك والله كثير نصحوني اقدم شكوى للشؤؤن الصحيه بس اني قلت قطع الاعناق ولا قطع الارزاق ملاحظه اخوي المفروض تعلن اسمه على شان الاخوان يتجنبوه على شان ما يغلطو غلطتك

[بندولة حب]

والله يااخوي قصتك مؤلمه وحسبي الله على هاالبيطريين الواحد يسوي فاهم

وياليتهم يوقفون هاالمهزله اللي يسونها

والتجارب على هاالمساكين

وانت مو اول ضحيه

ولو جينى للأظافر مو مشكله تتشافى بسرعه بس المصيبه المنقار بطيئ نموه

وانصحك تسوي مثل ماقالك تخليه عنده وتاخذ فلوسك واهم شي يكون فيه اوراق تثبتها عليه

لو يحاول يجحدك

وربي يعوضك

اما اذا كان عندك استعداد انك تعتني باالطير كانه فرخ صغير وتولفه عن طريق الغر المنتظم لانها بتكون وجبته الأساسيه

السريلاك
فأنت مخير

وانا مع الرأي الاول

ومثل هاالدكاتره لابد ياخذون درس وماينسكت عليهم

[سماوي الجبه]

والله للاسف بعض الناس تروح للخطاء يعني الطير ليش تقطع اضافره ومنقاره الخطاء منك ،، لكن ماعندي لك حل غير انك تغر الطير لغايه مايرجع مثل ماكان ،،

[فلونه]

لا حول ولا قوة الا بالله

الله يكون بعونك

والله اللي محزني في الحكايه كلها الطير مسكين

من رأيي عشان لا تضلمه لانه ممكن يكون خطأ تحرك كثيرر

وبرده بزياده لانه كلنا خطائين وتحصل مننا اخطاء مو قصد مننا

عشان كذا

اقلك رأيي

تخليه يعطيك تعويض باي مبلغ وانته اللي تحدده

لانه حتى في المستشفيات

لو اخطأ طبيب في مريض

اكيد راح يعوضونه ويدفعوله مبلغ تعويض عن الخطأ اللي صار

لانه بدون قصد سواء كان عن جهل او خطأ بدون قصد منه

والله يشافيلك طيرك ويتربى بعزك

وخبرنا ايش اخباره اول باول

[7baieb]

مرحبا فيك اخوي سفير الببغاء وحياك الله

وفعلا ما خاب من استشار

والله يكون في عونك لأنك بقصتك هذي انت متظرر

في رأيي إذا بتسامح الدكتور وهو الافضل عند الله فتناسى الموضوع والله يعينك على الصبر في متابعة طيرك والاجتهاد معاه ليعود مثل ما كان ولا ترجع لهذا الطبيب وعوضك على الله

اما اذا تبغى حقك فعلا فاتبع الطرق الرسمية في ذلك واترك المجاملة لان الرزق من الله وليس لمخلوق ان يقطع او يوصل رزق احد...... فعليك بالادارة مباشرة واشرح لهم الواقعة كاملة ولا تجامل على حساب نفسك .... وتأكد ان الطبيب بالنسبة لهم مصدر رزق لهم ولا بيفنشونه من شكوتك له بسهوله لانهم خسروا عليه لحد ماجابوه ( فيزا وتذاكر وسكن وخلافة )..... ولا تقبل باقل من طيرك اطلب تعويض كامل بالبدل بامزوني فرخ جديد من عندهم او بكامل المبلغ واذا مانفع معاهم جيب لهم الشرطة

هذا رأيي بكل صراحة

وانا أؤيد انك تسامح وتطلب من الله العوض

دمت في رعاية الله

[medozoom]

سلام عليكم

حبيبنا الغالي والعزيز على قلبي جدا انا عرفت بمشكلتك هذي واحترت الصراحه

وانا وانت نعرف هالمحل من المحلات الكويسه بجده ومن افضلها يعبر

بالنسبه للطير هو الاهم في الموضوع

الطير لو تقدر تهتم فيه اهتم فيه وربنا بيساعدك فيه ويخليك تحبه

وانت خبره بالطيور يا ابو عابد اذا صحته طيبه وتقدر تهتم فيه فيه توكل على الله واهتم فيه راح تكسب الاجر وبنفس الوقت الطير يمكن يحبك اكثر من اي طير اقتنيته

والله يا صاحبني مسأله الفلوس تقهر لكن نعرف ان العوض ما فيه خير

ولو سامحت الرجال راح يصير صاحب لك ويهتم بعد كذا بأي طير تجيبه له وحتى يمكن ما ياخذ منك ولا ريال لانه قدمت الخير

والي يقدم الخير يلقى خير

وانته ابخص بالموضوع هذا حقك ممكن تسامحك وتربي الطير وتهتم فيه وممكن تاخذ حقك من الرجال وهذا حلالك وانته اعلم بحلالك

وصدقني ربنا بيعوضك ان شاء الله

انا كمان نفس الشي وديت الطير حقي لنفس المحل وشغلهم ميه ميه ولكن مره تصيب ومره تخيب ويمكن حركه الطير كانت زايده ماشاء الله عشان كذا حصل الخطأ

وبالنسبه للمنقار حاول تهتم فيه بالغر وراح يحبك واول ما يشوفك راح يتجنن عليك لانه مصدر الاكل له

والمنقار يطلع مع الايام

وكذلك الاظافر راح تطلع

والله اني زعلان يا ابو عابد ولكن حصل خير والله يكتب الخير للجميع

ادري طولت في الرد ولكن تحملني لاني مقهور والله مثلك وكأنه طيري

فكر وشوف

تحياتي لك

[يوفاوي الكويت]

الله يعينك اخوي علي الي يسمون روحهم بيطريين

[د. إحتـراف]

لا حول ولا قوة الا بالله العلي العظيم


والله اني حزنت على طيرك المسكين


اخوي خذ الطير وعطه مقويات مثل الحلبه والارز عشان تقويه شوي

والله شي يقهر الي يصير

تقبل مروري

[OUT]

انت جالس تدلع البيطري وخايف عليه اكثر من الطير الي تعبت بقيمته !!

وجالس تفكر تسامحه على اغلاطه !!

قم وخذ حقك واذا رفض جيب الشرطه لما تاخذ حقك كامل

وبعدين انت مالك علاقه اهم شي تاخذه مثل ماسلمته

اما كل شوي يقولك بعدين ويجلس يصرفك وانت ماشي معاه طيب طيب

شكلك وديته جزار مو بيطري

بلاش عاطفه

مازادو الحراميه الا من الشعب العاطفي