الطير جديد و المربي أجدد ... شريت كاسكو

[الكوس]

بسم الله الرحمن الرحيم

وفقني الله السبت الي طاف اني اقتني بغبغاء من نوع الكاسكو من أحد المحلات في الدوحه و الطير فرخ لون عينه بين الرصاصي و الرمادي و كبير بالحجم و أليف و يأكل من يدي و يجي فوق اليد و الطير أكمل اسبوعه الأول عندي في هذا اليوم و جاري تلقينه كلمة هلا و وضعت له لتر ماء مع فص ثوم و ليمون لمدة يومين قبل فتره و بالأمس بدلت القفص الي في الصور و أخذت قفص جديد أو بالاحرى كان هدية و ان شاء الله بعد كم يوم ابشركم و اقول الطير تكلم


تفضلوا الصور و ما وصيكم بذكر الله و قولوا ما شاء الله
حتى لو ما عجبكم الطير ذكروا الله





حجم الطير واضح ما شاء الله



ألفة الطير من الأيام الأولى ما شاء الله






حبيت تشاركوني فرحتي
ما شاء الله

[صوغة]

ماشاءالله وتبارك الله الله يحفظه لك يارب لكن نصيحة لك تبعده عن اي تكييف او تيار بارد او حار

ترااه صغييير وماعنده مناعة

وياليت تاخذه لطبيب متخصص يكشف لك عليه ويعطيك الادويه الي تساعد بتقويه مناعته


واذا ماتعرف طبيب او عيادة تهتم بالكاسكو بقطر راسلني على الخاص لانه ممنوع وضع اسماء العيادات او ارقامها بالمواضيع العامة
والله يوفقك

[ابو محمــد]

الف الف مبرووك ع الكاسكو الجديد ويتربى بعزك ,,

لا تروش الطير في هذه الايام وحاول تعطيه فيتامين ومضاد حيوي يقوي المناعه وشكل له من الفواكه والخضروات ومثل ما قالت اختي صوغه انتبه من التيارات الهوائيه.

[CL4SIC0]

مشاء الله تبارك الله الطير مره حلو و شكله هادئ واليف الله يوفقك و يوفقه انا طيري بس يتحرك و نشييييييط لدرجه انه ما يهجد مشاء الله ... بس يبيلك تقص جناحه بعد كم شهر اذا كبر شوي جناحه باين عليه طويل شوي ... تقبل مروري

[سكر]

ما شاء الله تبارك الله,,

كيف ما يعجبنا,, جميل جداً,, الله يبارك لك فيه,,,

انتبه لتوصيات الأخوة الكرام,, يا الكوس

أبو محمد ينصحك بحكم خبرته,, وصوغة تنصحك بحكم تجربتها,,

الأخت صوغة مات عليها كاسكو فرخ,, وهذي حالة متكررة بكثرة في عالم المربين,,

والسبب ضعف المناعة, إلى درجة انه ممكن تحافظ عليه أسابيع بكل عناية

لكن غلطة وحدة بسيطة مثل تيار بارد لمرة واحدة كافية انها تموته,,

والله يحمي ببغائك ويوفقك في تربيته يا قمر

سامحني بدل ما نفرح معاك,, خوفناك,,

بس صدقني خاف عليه عشان تفرح فيه طول عمرك,,


تحياتي

[naasooh]

الثوم أن كلاه أفضل حتى لو شئ بسيط وأن ما أكل أتجرب نفس طريقتك تخليه في الماءبعد ما تقطعه
والماء أخر اليوم يتغير ويتنظف الوعاء
أي أن كان ألي حاطه ثوم أو ليمون
وطريقتك ممتازه الثوم يقوي المناعة وعندك العسل هم جربه والكمية جدا جدا بسيطة

والله يبارك لك بالطير وموفق خير

[,, Fahad ,,]

ما شاء الله تبارك الله

طير جميل الله يحفظه لك .. وما قصروا الأخوان ما أزيد عليهم بشي

لكن صدقني لو تهمله في العمر هذا يوم ولا يومين ممكن تفقده الله لا يقوله ... يعني خلك حريص


بالتوفيق ..

[الكوس]

يا هلا و الله بالاخوان منورين الموضوع

الأخت صوغه

ابشري بنوديه طبيب بس الصراحه اطبائنا ينخاف منهم اذا الناس يروحون صاححين و يطلعون مرضه عيل شلون الطيور بس بعد بنوديه و لج رساله على الخاص

الاخ ابو محمــد

الله يبارك يالشيخ نصايحك ذهب صاااااافي

CL4SIC0 <<<< اعترف اني خذت اسمك كوبي بيست

ما شاء الله على طيرك الله يخليه لك ... اما جناح طيري تراه مقصوص قصه حلوه و مخبيه و ما يقدر يطير نهائياَ

سكر

هلا و غلا بالعكس يالغالي و الله فرحني ردك يكفي الزقت الي عطتني اياه من قوتك علشان تنصحني و نصايح الاخوان اوامر

naasooh

طريقة الثوم من عند الاخوان اما انا ما عندي فكره لكن بجرب طريقتك و اشك ان الكاسكو بيتقبل الطعم

,, Fahad ,,
الله يحفظك و يسلمك من الشر


بس يا اخوان ان من يبت الطير روشته مرتين و بعد كل مره ارجعه القفص و اغطي القفص بغتره في غرفه ما بها الا المروحه لمدة ساعتين او ثلاث ساعات لين يحف الريش
و انا احياناَ اجيه احصله حران فاشغل الكنديشن ( المكيف ) لمدة نص ساعه و اسكره و تيار الكنديشن ما يظرب الطير و احس الطير يرتاح

مالي خبره بس انتوا شرايكم

و اشكركم من كل قلبي على وقتكم الي عطتوني اياه
جزاكم الله خير الجزاء

[الحريه]

ما شاء الله تبارك الله,,

مبروك على الفرخ الكاسيكو وأنتبه له لنه فرخ وعتبره مثل الطفل والله يوفقك ياااااارب ويحفضه من كل مكروه ياااااااااااااااااااااااارب

[صوغة]

لاتعيدها
واذا حران خل باب الغرفه شوي مفتوح ويكفي

ترى الي بسنه ينام بعششششششششش دااافي