يأخوان أحد فراخة الحمام الي عندي بيموت

[ReeM_AAxxLL]

السلام عليكم

عندي فرخين حمام بأخوان أشتريتهم من أسبوع

واحد مشاء الله من اشتريتهم ياكل بنفسه ومشاء الله الحين حجمه دبل اخوه
الثاني هذا متعبني لآخر حد مايكل بنفسه لازم أنا أوكله حبوب مطحونه مخلوطة مع ماء وبالعافية ياكلهم بالغصب يعني
ومن امس بديت أوكله حب كامل غير مطحون بيدي لأنه أخوه صار ياكلمهم

واليوم صراحه من الصبح وهو فاتح فمه يلهث زي الكلب وأنتم بكرامه
ولما اوكله بيدي شوي يرجع الحب الكله كله ولما اشربه ماء واغسله أقول يمكن ذابحه الحر
يقوم يتقلب ويطيح على الارض ويفتح فمه على قد مايقدر وبطريقة غريبة ويرجف وكأنه بيموت

حوالت أرجع أوكله المخلوط صار نفس الشيء مع الماء يطيح بالأرض ويرجف ويتقلب ويفتح فمه بقد مايقدر والحين لما تركته صار ازين شوي بس للحين يلهث وحركتة ضعيفة مره ويتمايل مايقف كويس
ومدري يطلع موية تكرمون من دبره

مادري ياخبراء الحمام وش المشكلة الفرخ يعني مريض ولا يعاني من طريقة الاكل ولا شالحل ياجماعة

آسف على الاطالة لاكن باين انه الفرخ ماراح يطلع عليه الصباح إذا ماشفت له حل

وهاذي صور الفرحين الي عندي

شوفوا أخوه دبل حجمه صاير

[PGN]

بالنسبة لي أنا ماني خبير حمام لكن عندي حمام وتوني بادي فيه و أول بيضة فقست أول البارح , يعني توني مبتدئ .


هذا الفرخ كود تطرحه و تثبته وتدخل الحبوب في فمه غصب عنه , أعتقد أن الفروخ لازم أمهم تكون معهم فترة بعدين ما يحتاج , أنا عندي 5 حمام على عمر حمامتك وللحين الحمد لله ياكلون وش زينهم ولا جاء الصبح وفكيت الشبك انطلق علي يدور الأكل عندي خخخخخخخخخخـ تعود علي , شئ رهيب يوم يتجمع عليك . معد يخاف مني مثل أول

[ReeM_AAxxLL]

مشكور أخوي PGN على مرورك

وانا نفس الوضع عندي كم فرخ مالهم امهات بغرفة لحالهم عندي
لأنه لما احطهم بمسكن الحمام يموتون والحمام الثاني يحسر فيهم

فحطهم بروحهم واهتم باكلهم وسكنهم وجو الغرفة مايكون حار عليهم

لاكن هالفرخ من جبته وهو تقول متخلف عقلياً وعليه حركات غبية ويرفض الاكل رغم أنه مايخاف مني

لاكن بالنهاية الفرخ مات
الآن مدري وش المشكلة الي فيه اخاف مرض ويعدي الفراخة الثانية وتموت علي

أتمنا يكون أحد الأخوان يعرف وش هالمرض

[PGN]

أذا يقلب رقبته كثيرا يقلبها يقلبها ...!!! فـ هذا مرض فتاك في الحمام , إذا يسوي كذا فأفصله الحمام الأخر و وو كله لحاله و سلاربه وراقبه وبإذن الله يشفى