بيكى هاتموتنى

[dr.manal]

السلام عليكم و رحمه الله و بركاته يا ريت يا جماعه تساعدونى فى مشكلتى انا اشتريت قطه صغننه عندها شهرين مون فيس شيرازى بقالها يومين بس من ساعت ما جت و هى مش عارفه تعمل فى الليتر بوكس غيرتهولها و جبتلها رمل عادى و كل شويه احطها فيه و بعد الاكل احطها فى الرمل لكن دلوقتى بتعمل البراز الله يكرمك فى الرمله لكن البول بتعمله فى الشقه فى اى حته فى الركن على السجاده على السرير مجننانى حاولت احبسها فى حته صغيره مع الرمله بتعمل فيها لكن مجرد ما افتحلها تطلع تعمل فى الارض على طول حتى عندى قط تانى عمره سنه لما شافها كده بقى بيعمل زيها و عمل النهارده على الارض فى المطبخ بس زعقتله و معملهاش تانى لكن هى مش بتسمع الكلام اعمل ايه ؟ كمان البراز بتاعها سعات بيلزق فيها لان مش بترفع ديلها و هى بتعمل و حميتها مره و شطفت النص التحتانى 3 مرات من ساعت ما جت و الريحه مش بتروح منها اعمل ايه ؟
كمان فى مشكله تانيه هى معندهاش كنترول على الاكل خالص مش بتشبع ما شاء الله عليها كل ما احط للقط التانى اكله تروح تاكله منه و تاكل اى حاجه قدامها هى بتلعب كتير ما شاء الله عليها بس هل علشان بتلعب كتير بتبقى جعانه ولا اشيل الاكل من قدامها ؟ اصل بتصعب عليا لما بتاكل مش ببقى عايزه اشيل الاكل من قدامها

[شاهستا]

وعليكم السلام ورحمه الله

اهلا بيكى

معلشى القطه لسه صغيره وتقدرى تعلميها ضرورى الليتر بوكس يكون قريب منها

لان القطط الصغيره مش بتقدر تمسك نفسها زى الكبيره

ولما تعمل بيبى فى الارض امسحيه بديتول بس تكون القطط بعيده انه مسمم ليهم

وابقى بلى منديل من البيبى ده وحطيه فى الرمل وخديها تشمه وخليها تعمل كانها بتدفنه

وحاولى تسيبيه يوم ولا حاجه لحد ما تتعود

بالنسبه ان البيبى بيلزق فيها قصى ليها الشعر الى تحت عشان ميلزقش فيها

هى القطط الصغيره بتجوع بسرعه سيبيها تاكل عادى بس ياترى هى عندها ديدان ؟

[dr.manal]

طب انا اعرف منين ان فيها ديدان ؟ هى لما بتاكل باطنها بتبقى منفوخه زى الكوره لدرجه انها لما تيجى تنضف بطنها ممكن تتقلب على ظهرها من الكرش )

[شاهستا]

ههههههههههههه عسل ^^

بصى لما تكمل 3 شهور هنديها جرعه ديدان

والقطه لما بتكون عندها ديدان بتظهر فى البراز

[dr.manal]

انا متشكره اوى على النصايح و ادعيلى بقى اخلص من موضوع الحمام بتاعها ده لحسن ماما هتطردنى انا و هى من البيت

[شاهستا]

لا ان شاء الله اعملى بس زى ماقولتلك وهى مش هتكررها تانى ان شاء الله

ومعلشى استحمليها لانها كيتن لسه مش فاهمه حاجه

[dr.manal]

طب معلش فى مشكله تانيه لو انا شايلاها حاطاها فى الليتر علشان اعودها على الرمل كل ما احطها فى الرمله و تلاقى رمله متكومه فى حته تقعد تشم فيها و تاكلها

[شاهستا]

ايون بتتعرف عليه ابقى شليها من فمها وقليلها نو

هما الكيتن كدة لازم يعرفو كل حاجه

[dr.manal]

ههههههههههههههه انا قولت مش معقول تكون جعانه بعد كل الاكل ده )

[شاهستا]

ههههههههههه ^^ لا ده بس حب استكشاف بس متسيبهاش تاكله

عشان ميعملهاش مشاكل