سباحة الببغاء....

[H.B.H]

صباح الخير صباح الفل إلى كل الأعضاء والمشرفين
لي فترة منقطعة عن المنتدى بسبب الأختبارات والتسجيل و.....إلخ
المهم...صارت سالفة مع طيري وبغيت أسأل
ولدي الحبيب الكاسكو له أكثر من 3 أسابيع ومو راضي يسبح يعني أنا بالعادة أوديه المغطس بأيدي عادي وأنزله وأعبي له المغطس ماي لمن يغطي رجلينه بس بعدها قام يعند ومن يشوف المغطس من بعيد يخاف ويطير لبرة الحمام _الله يكرمكم _ ومن بعدها قمت أشيله بالفوطة غصب و أوديه المغطس وياالله ينزل وألحين تطور الموضوع صار من يشوف الفوطة قام يجعر السبب>>>لأني أمسكه بالفوطه واقلبه على ظهره وأشيك على ريش جناحه مثل ما تعرفون طيري كان يعاني من النتف وألحين بالتدريج المشكله تنحل وأنا أتابع تطورات الريش بهذي الطريقة<< واليوم اخواني الصغار حاطين المسبح في التهوية (الحوش) وهم يعبون المسبح بالماي بغيت أحط الطير قلت يمكن الله يهديه ويسبح (طبعاً مستوى الماي يغطي رجل الطير بس) بس الرجال سبح على طول راح لعند الهوز (الولف) ورش الماي على وجهه وجسمه كله ما كمل حتى ثانيتين وبعدين صار مفهي ويالله أستوعب ومن بعدها شلته ودخلته البيت ومو راضي أحط عليه فوطة ولا راضي يدخل القفص .....من هالقصة كلها شسوي للطير علشان لايمرض ؟؟ الطير أمانة عندي ما أبي يصير له شيء
ويا ليت اللي عنده طريقة أقدر أسبح فيها الطير يقولي ؟؟؟



ترى أنا أكتب لكم وهو على كتفي مو راضي ينزل
و عذراً على الإطالة >>>أحس أني كتبت قصة حياتي

[عشقي البلوفرنتد]

اخوي اشتر له بخاخ مويه نفس الي عند
الحلاقين لگن يكون مفتوح مو موجه علي جهه وحده ورشه فيه
وهو علي الاستاند بعدين دخله القفص وابعده عن المكيفات والتيارات الهواائيه
وخلاص خلييه
لين ينشف وبتشوفه يستاني ويلعب
تحياتي

[منقار حمامه]

مثل ما قال اخوي عشقي البلوفنتد البخاخ انسب وسيلة لترويش الطير وقع الماء على الطير يكون خفيف وانتشاره يضمن وصول الماء لكافة اجزاء الجسم ومن خلاله تتحكم في عدم تعرض الطير للزكام وما شابه

[FAHADnn]

اخوي نصيحه مجربه , اخذ الكاسكو والقفص ويشل غطاء القفص اللي تحت وحط الكاسكو تحت الدش وخله , راح تلقاه يختار المكان المناسب وعقبها خله لين ماينفض نفسه نفضتين ولا ثلاث وطلعه خله بالشمس فقط لا غير ولابغيت ترجعه داخل البيت حاول تغير المكان على مرحلتين علشان لايمرض , شيله من الشمس اذا نشف وحطه في مكان مافيه تكييف وخله 5 الى 10 دقايق وعقب وده مكانه اذا كان فيه تكييف علشان يتأقلم جسمه

[ارشافين]

رشاش الموية طريقة تطول وممكن ما توصل للريش الي داخل

الطريقة الي انا استعملها اشغل الموية حقت طشاش الحمام (مع اختلاف المسميات) وانتو بكرامة ضغط خفيف وبيدي اوزع الموية عليه وهو داخل القفص اذا حسيت انه انغسل زين حطيته في البلكونه (تشميس مع مراعاة الوقت) يعني مو اول النهار براد ولا اخر النهار برضو الساعه 9 10 وحولها

وشكرا