الحقوني.. قطوه صغيره في بيتنا..

[توتي]

السلام عليكم ورحمة الله وبركاته..

هذا اول موضوع لي في قسم القطط مع انه القطط مش من اختصصاي.. لكن شو اسوي يوم اني بلقى قطوه صغيره بعدها ما فتحت عيونها في بيتنا امها معدومه الضمير مخلتنها روحها..

وهيه تماوي.. وهاللي خلاني القاها..

شكلها الام والده من فتره بس غمضتني القطوه.. ومشكلتي العويصه اني ما عرف اعتني فيها ولا اعرف اتصرف..

بصراحه انا ملاقتنها من العصر.. وقلت خل اخليها مكانها يمكن الام ترجع لها.. ولكن الام لا حس ولا خبر.. ولا تدري عن هوى دارها..


ومستغربه كيف خلتها روحها ووين اخوانها.. الانها هيه والده من فتره و الخدامه تقول لي انهم اكثر من واحد..

شو اسوي فيها قلبي يعورني عليها احس انها يوعانه..

تحياتي/ توتي

[سلوان]

يمكن أمها ماتت أو صاير عليها شي لأنه الام مستحيل تترك عيالها
عموما شوف هذا الموضوع راح يفيدك
http://www.2zoo.com/vb/showthread.php?t=8157
بس لا تتخلى عنها هي مسكينة و مالها غيرك الآن و الله يعينك

[Black Cabar]

اذا شيلتيها رديها مكانها بسرعه

لانه الام يمكن غيرت مكان عيالها و ودتهم مكان ثاني

[توتي]

سلوان شكرا على الرابط.. انا مستغربه كيف تخليها وتروح.. ويين اخوانها الثانين..


وانا خايفه الاني مسكتها والخدامه مسكتها.. وامي تقول الحين الام بتشمها وبتتركها هالكلام صح؟؟

المشاركة الأصلية كتبت بواسطة Black Cabar

اذا شيلتيها رديها مكانها بسرعه

لانه الام يمكن غيرت مكان عيالها و ودتهم مكان ثاني

هيه مكانها على امل انه الام اتي وتاخذها.. بس الحين سكتت وانا كل اللي سويته حطيت تحتها شال عشان يدفيها.. وسخنت الحليب قليل الدسم المراعي شوي وحاولت ارضعها من الرضاعه مالة الاطفال بس ماشي فايده احس انها كبير عليها.. وخليت الخدامه ترضعها تقول انها تشرب.. و الحين برجعها مكانها لين باجر الصبح يمكن الام ترجع وتاخذها..

وبعد صورتها وبنزل صورها لكم.. شكلها كيووووت


اتمنى حد من المشرفين يفيدوني..

[سلوان]

لا ما اعتقد إن الأم ممكن تتركها لو شافتها

عموما انتي استمري على هذا الوضع كم يوم خليها برة و حاولي تدفيها و ممكن تستخدمي أنبوبة القطرة الطبية غسليها و عبيها حليب و قطريلها في فمها و إن شاء ترجع لها أمها .

[القطوة الدلوعة]

و حليلها واااااااايد غمضتني
.
.
.
.
و انتي بعد ........اهتمي فيها لا تتركيها

[سـارة]

الخدامه تقول لي انهم اكثر من واحد..

لو فيه أكثر من واحد رجعي القطوة الصغيرة عشان تتأكدي إن مافي أحد أخذها من أمها..
وإذا ماجت أمها فـ الله يعينك عليها وعلى إخوانها.

الام بتشمها وبتتركها هالكلام صح؟؟

إلي أعرفه إنه عادي بتاخذها.

و ممكن تستخدمي أنبوبة القطرة الطبية

فعلا مفروض تستخدميه لأن الرضاعه مالة الاطفال كبيرة عليها..
وحتى تقدرين تستخدمين معلقة عادية صغيرة حطي فيها كم قطرة و شربيها اياها
لكن بتكون صلبه بالنسبة لها ..
فالأفضل أن تستخدمي -إذا توفر- الحليب والرضاعة الخاصة بالقطط الصغار.

والرابط إلي وضعه الأخ سلوان مفيد جدا.
وهذه النقطة أيضا ضرورية..

قم بإحضار قطعة صغيرة من القطن الطبى وبللها بالماء الدافئ وقم بتدليك فتحة الاخراج برفق لدى القط .... الهدف من ذلك هو مساعدة القط على التبول لأن القطة الأم فى الحياة الطبيعية تقوم بلعق هذه المنطقة من جسم الصغار بلسانها لعمل تنشيط ( Stimulation ) لها وبالتالى يساعد القطط على التبول والتبرز
لاحظ أن عدم قيامك بتنفيذ هذه العملية كل 4 ساعات سيؤدى الى احتباس البول والبراز داخل جسم القط الرضيع وبالتالى سيموت نتيجة ذلك فوراً لأن القطط الصغيرة لا تستطيع القيام بعملية الإخراج فى أول أسبوعين إلا بمساعدة من القطة الأم ... أرجو ألا تشمئز من ذلك لأنه لا بديل آخر..

الله يعينك عليها..و خبرينا كلما استجد شي..
و .. لا عاد تطولين الغيبة .

[Withered Rose]

اهتمي فيها عدل و إن شاء الله بتعيش و بتكون قطة منزليه مثاليه إذا نشأت بالبيت .. واحد من قططي أخذته و عمره 4 ايام لأن امه عافته و قامت (تبخ عليه) و ربيته و كبر عندي الحين عمره سنه و شهر ما شاء الله ..
بس طبقي اللي موجود بالصفحه إن شاء الله راح تعيش و تكبر و تاخذين أجر كبير لتبنيها

[توتي]

السلام عليكم جميعا.. مشكورين يا اخواتي ما قصرتوا بارك الله فيكم وجزاكم الله الف خير.. قايمه من الصبح احاتي القطوه وقلت بشربها حليب وركض عندها وادورها ما لقيتها..

قلبي عورني قلت يمكن صابها مكرووه لا سمح الله او شي.. لكن الخدامه قالت لي انه الام خذتها.. هالشي اسعدني واايد ونفس الوقت احزني الاني حبيتها بصراحه وبالذات امس يووم كنا نشربها الحليب كنت احس اني انا المسؤوله عنها..

وسبحان الله امس طول الليل ادعي انه امها اتي وتاخذها بس الاني خايفه اني ما اعرف اعتني فيها بهالسن وتمووت.. وطول ما انا نايمه احاتيها وخايفه,,,, وقمت وهاللي صار..

سلوان.. مشكوره مره ثانيه.. ما قصرتي..


القطوة الدلوعه.. تسلمين الغاليه على المرور..


عزيزتي ساره.. ما تقصرين ومشكوره على النصايح.. وان شاء الله ما بيغيب..


ويذردروز الغاليه.. والله كنت اتمنى اني اهتم فيها واربيها من يوم ما هيه صغيره بس بنفس الوقت كنت خايفه اني ما اقدر على هالشي.. وصار اللي صار..

صحيح انها راحت عليه.. بس لازم ارويكم صورها..

[قطو_Q8te]

توتي
بهالموقف الي صارلج ,, شرايج تقتنين قطوه شيرازيه وتربينها؟
اعتقد الي مريتي فيه اختصر نص مسافة كل مبتدء جديد.
وقوليلي شرايج وانتي توكلينها وتشربينها ... شعور رائع؟