بعض الاستفسارات لو سمحتوا

[سمارت كاسكو]

السلام عليكم ورحمة الله وبركاته
اخواني الاعزاء انا مشترك جديد وكذلك توني شاري كاسكو والبركة في منتداكم الطيب اللي شجعني اقتني هذا النوع من الطيور رغم اني ما عندي خبره ولكن تحمست بعد ما شفت مشاركات الاخوان وتجاربهم وتوكلت على الله وشريتلي فرخ كاسكو لكن للاسف انا ما كان عندي فرصه اني اطلع للسوق واشتري فاعتمدت على واحد من الاخوان جزاه الله خير وخبرته اني اريد فرخ كاسكو ووصيته على كثير من الامور اللي نصحوا فيها الاخوان عند شراء الطير ولكن الاخ الله يسامحه من دخل السوق اعجب بواحد من هالطيور ويالله اشتري ومع السلامه بدون ما يتأكد من سلامة الطير وصحته المهم يا اخواني انا من استلمت الطير لاحظت الاتي : -
1. الطير خامل وشكله مريض
2. صغير وعلى قولة صاحب المحل بعده مش مفطوم يعني عليكم تغرونه مرتين يوميا(اخوي جايب السيريلاك حق الطير معاه)
3. كثير يوقف على رجل وحده وانتبهت ان فيه جرح عند احد اظافره
4.اول يوم اكل شوي وكان متقبل السيريلاك لكن في اليوم الثاني ما رضى ياكل ابد وحاولت اغيرله الاكل وتقبل شوية تفاح لكن ثالث يوم تبون الصراحة خفت لا يموت وغريته غصب
5. اشوف عنده بالاضافة للامور السابقة بداية اسهال والله يستر
لذا يا اخواني ارجوا النصيحة في كيفية التصرف مع الطير ولكم جزيل الشكر

[عبدالعزيز العتيبي]

نصيحتي لك .. بيع الطير

انت مبتدئ والطير فرخ ... راح تتعب معه بقوة

بيعه واشتر طير عمره فوق سنه واليف احسن لك


بالتوفيق

[صاحب الشاطي]

المشاركة الأصلية كتبت بواسطة عبدالعزيز العتيبي

نصيحتي لك .. بيع الطير

انت مبتدئ والطير فرخ ... راح تتعب معه بقوة

بيعه واشتر طير عمره فوق سنه واليف احسن لك


بالتوفيق

+1
و خلي يدور في سوق الشارجه بيحصل متوفر بكثره

[الكاكي]

نبي صوره لطير سلمك ربي..............

[سمارت كاسكو]

مشكورين يا اخواني لكن موضوع البيع صعب شوي
اولا لأن العيال تعلقوا فيها
ثانيا منوه بيشتري طير مريض وتعبان
وثالثا انا من نوعية الناس اللي تعشق التحدي يعني الفروخ ما تتربى الا عند الخبراء بس (مسوي فيها بطل )
انا توني راجع من العيادة البيطرية وقالولي ان عدم الاكل سببه الجرح اللي في ظفرها فهل هذا الكلام صحيح؟

[*هاوي البادجي*]

اوكي ليش ما البيطري عطاه دواء للجرح


وومكن صوره للجرح وصورة للطير

تحياتي

*هاوي*

[سمارت كاسكو]

مرحبا اخوي هاوي البادجي واتشرف بمرورك
بخصوص الجرح الله يطولي بعمرك البيطري قالي ان ظفر الطير مكسور فلازم نعمله عمليه خلع للظفر حتى يرتاح من الالم وانا تريد الصدق متردد وحاس رغم عدم خبرتي في الطيور ان طيري التعب اللي فيه مب من الجرح بس يعني معقولة طير ما له نفس ياكل ولا يتحرك ابد وكل شوي يسكر عينه يبي ينام وصارله يومين على هالحال لا واسأل البيطري عن خلع الظفر هل بيطلع ظفر بداله قالي لا طبعا. وعلى فكرة هو قالي انا عطيته دوا بس عن الديدان وسألته ما بتعطيه دوا والا فيتامينات قالي لا لكن ضروري نعمله عمليه الخلع
اما بخصوص الصور فأنا الى الان ما اعرف انزل الصور لكن اوعدك بكرة بحول الله هذا اذا ما زال الطير عايش بصوره وبصور مكان الجرح

[سمارت كاسكو]

الحمد لله على كل حال اخواني الاعزاء طيري مات اسأل الله ان يعوضني خير منه
الصراحة رغم الفترة القصيرة اللي قضاها معاي لكن ما توقعت اني بحزن كل هالحزن على طير خصوصا انه في اخر لحضاته يوم يسمع صوتي واقرب منه يجيني ويصدر انين غريب وانا اكلمه كأنه بني ادم يشكيلي تعبه لا حول ولا قوة الا بالله انا اليوم حسيت بمعاناة اللي يربي هالنوع من الحيوانات انا ما كمل معاي اسبوع فكيف اللي صارله عنده فترة طويلة
في الختام اشكر الاخوان اللي قدموا النصيحة وجزاهم الله خير