سؤال بخصوص الفيران الصغار(بينكي ماوس) والحشرات

[Ghoroub]

مشكورين يا أخوان على الردود

بخصوص تاكل شي ميت أخوي انت مربي ثعابين وكلامك من تجربة ولا سامع إنهم ما راح ياكلون؟؟ بخصوص الفرايس الميتة هي أفضل وعن تجربة شخصية (أول شي ما راح تضطر تقعد تنتظر راح ياكلها ولا لأ ثاني شي الميت ما راح يعض يعني حتى لو ما أكل الثعبان مباشرة ما راح ترجع تلقى الفار هو اللي آكل الثعبان)

بخصوص البوا أخوي ما تشوف إن 3 فيران بالأسبوع كثير شوي؟؟ حسب المواقع المهتمة بالنوع اللي عندي تقول فار بحجم مناسب كل 5أيام إلى أسبوع؟؟

تحياتي

[عاشق الحيوانات]

اخوي انا اقصد 2 من البينكي ماوس وبخصوص الفار الميت اذا كان متجمدد ما فيه مشكله لكن اذا كان معفن فيه ضرر

[Ghoroub]

إذا كذا صح وبخصوص الفار الميت كنت أقصد إن راعي الثعبان هو اللي قاتله وللإفادة إذا أحد يحب يعرف, أرحم وأرأف طريقة تموت بيها الفار حسب ما قريت في مواقع أجنبية وما لقيت أي موقع يتكلم بالعربي عن الموضوع، إنك تعبي حوض مقلوب (المهم شي معزول ما يسرب غاز) بغاز ثاني أكسيد الكربون (يفضل من إسطوانة بس الصراحة مدري من وين يجيبوه سمعت ممكن عند اللي يعبون طفايات الحريق) أو تستخدم DRY ICE وهو مكعبات صلبة تتحول لغاز ثاني أكسيد الكربون بدون ما تمر بالحالة السائلة (أتذكر ورونا هوا في معمل العلوم في متوسط) بس هذا ياخذ وقت يعني لازم تتركه فترة لين يتعبى الحوض ولا تراك بتعذب الفار أكثر من إنك تصكه بالجدار (موتة شينة وما تزبط دايما من أول مرة فراح تعذبه بدل ما تريحه من عصر الثعبان له)

أو

هذي للي قلوبهم جامده شوي تحط الفار على الأرض وتحط مرسام أو قلم على رقبته بين راسه من الخلف وأكتافه (بالعرض مو بالطول تخيله سيف وبتقطع راسه بس من الخلف أظن وصلت الفكرة؟؟ ) ثبت يدك وبيدك الثانية تسحب ذيله (من بداية الذيل أقرب شي لجسمه) وتشده للخلف

(الصراحه هذي الطريقة صعبة نفسيا شوي خصوصا لو كان الفار المسكين توليفك ومآمن لك وسايبك تمسكه وتسوي فيه كل هذا)

أتمنى أحد يستفيد من كل الكلام اللي فوق لأني قلبت معدتي من الموضوع

تحياتي

[corn snake]

اخوي Ghoroub انا اقدر اساعدك
لو انتا في الامارات انا بامكاني ادبرلك اينوع من الفيران (بينكي ماوس ) حي او متجمد

[Ghoroub]

مشكور أخوي ويعطيك العافية

للأسف أنا موب موجود في الإمارات أنا في جده

يا ليت لو كنت تربي الفيران البيض تسويلنا موضوع عن التكاثر فيهم أكيد بيفيد كل الأعضاء

تحياتي

[hellboy]

سو مثل مايسون (تجار الثعابين)
يخصصون مكان يعني يجيبو حوض كبير او مساحة كبيرة بحيث ان لا يستطيعون الفأران الخروج منها ويفرشونها بالغش او نشارة خشب ويحطون بيوت وجحور يستطيعون فتحها ويحطون ماء وانواع الحبوب وبعدين يجيبون اجواز من الفيران ويتكاثرون بالهبل.
ملاحظة: الفأران البيضاء سريعة التكاثر.

[Ghoroub]

أنا مسوي كده بس للأسف للحين ما حملت عندي ولا أنثى (كان حظي تمام كم مرة اشتريت إناث جوني وهم حوامل جاهزين بس كنت أعزلها لين تولد وأكيد أهتم فيها تمام لين يكبروا العيال)
مدري وش الغلط ؟؟؟
المكان كبير وما تجيه شمس (ضوء مباشر) الحرارة متوسطه (زي الغرفة بدون مكيف) المكان نظيف والأكل ممتاز ومتوفر الماء يتغير كل يومين على الأكثر والإناث ضعف الذكور (وفعلا كذا ما راح يتطاققون الذكور) مدري الصراحة عشهم أكثر من ممتاز كل شي أحسه مقارنة بأي محل حيوانات اشتريت منه مواليد قبل كده فندق خمس نجوم

سمعت عن التلقيح الصناعي في الفيران بس ما عندي أي معلومات عن الموضوع فيا ليت لو أحد عنده معلومات عن الموضوع يشارك ويفيدنا

تحياتي

[hellboy]

لقيت لك حل ياخوي في محل الدواجن حبوب يسمونها حبوب التفريخ يستعملونها للارانب والهمسترات والوبر و للفيران جربها وبتشكرني حل سهل ودوخ راسنا.

[Ghoroub]

يعطيك العافية أخوي

حبوب التفريخ هذي ألقاها في المحلات اللي تبيع الدواجن الحية ولا الصيدليات البيطرية ما فهمت بالظبط

[hellboy]

تلقاها بالضبط عند محل بياعة الحمام وان مافية وصهم عليها ويجيبونها من معارفهم.