بليييز الي يعرف للببغاء الرمادي اتمنى يساعدني...

[grey parrot]

السلام عليكم
مرحبا بك يا أختي ساره
و بالنسبه للكاسكو انا ما راح اضيف اشياء وايد على كلام الأخ asadyya يمكن يكون وفى بالجواب و لكن اود ان اقول بأن الكاسكو حاليا حسب وصفج اشوي ماخذ موقف منج اولا ان قاعد يجبر بالصعود على الايد .... ثانيا الكاسكو يعيش حالة رعب من القفازات و لا أنصح باستخدامها نهائيا حسب تجاربي ... و حركة ان يقط الاكل يبين ان زعلان
هذا الحيوان يحتاج الى بال طويل و صبر من ناحية التدريب ... يعني ما تقدرين اتعلمينه ان يصعد على الايد و ياكل من ايدج و حركات عديده في نفس الوقت
خليج على الراحه و اشوي و اشوي اولا خليه يطمئن تماما من الاكل من ايدج يمكن يقطها مره مرتين ثلاث و لكن انتي لاطفيه و عبريله عن مدى اهتمامج فيه و حب التقرب له الى يبدى ياكل منج باطمئنان بعدها بأيام فتحي عليه القفص و حاولي انج تعطينه الاكل من داخل و اشوي اشوي مسحي على منقاره .. في البدايه راح اتحسين ان راح يعضج لمن اييب منقاره صوب ايدج لا تخافين ... استمري .. هالحركه الكاسكو يسويها دائما عشان يشوف هالشي الغريب اللي دش عليه آمن ولا غير آمن فيمسكه ابمنقاره مسكه خفيفه ... اذا ما عندج الجرأه ان تسوين هالحركه و في احتمال انج اتسحبين ايدج فلا اتسوينها نهائيا لان من اتسحبين ايدج ابسرعه راح اتخربين التدريب كله لان من انتي تخافين و تسحبين ايدج اهو يخاف اكثر منج و اكرر لا تستخدمين القفازات نهائيا .. لان احيانا الكاسكو يزعل من موقف معين و يتم يكره هذا الشخص خلاص
و اكو احتمال وارد ان يكون جنس الكاسكو اللي عندج (( انثى )) فإذا كان انثى فــ 80 % من انثى الكاسكو تكره التعامل مع النساء دائما تميل للرجال و العكس صحيح
هذا من جانب من جانب آخر
لا تتعدى فترة تدريب او محاولاتج مع الكاسكو اكثر من 40 دقيقه بالكثير ساعه عشان لا يفقد التركيز و يتعكر مزاجه بعدين ما يقبل منج أي شي

نتمنى ان نكون قد افدناكم
و بالتوفيق ان شاء الله