انا حزين و زعلان و كل شي بعد فيني واصل حدي زعل

[بايثون]

والله شوف انا من ناحيتي .. كل جيراني أذوني .. وأمشي معاهم بالطيبه .. وأحاول أقنعهم انه ما منهم أذيه لهم .. الا اا طمرو بيتنا .. لكن اذا ركب راسه ولازم تشيل الكلب .. كلمتي وحده ..

" أنا احترمت جيرتك وتكلمت معك بأخلاق .. لكن انك تتعدى حدود الأخلاق وتتعدى على حرمتي وممتلكاتي الشخصية .. ما أسمح لك .. كلابي في بيتي .. ولا لهم شغل فيك ولو سمحت مالك شغل فيهم .. وأعلى ما في خيلك اركبه "

طبعا أنا مدرب كلابي انها ما تنابح الا على الغريب بغيابي .. وغير كذا سكتم بكتم .. بلا حس .. يعني أجلس بالأسابيع ما أسمع لهم الا صوت التودد والتلطف .. اللي يجي مثل البحه الخفيفه .. ويوم كانو صغار بعد .. لكن لما كبرو ولا لهم أي ذرة صوت ..

وغير كذا مدربهم على الولاء التام والطاعة العمياء .. والأكل .. ما ياخذونه الا مني انا أو من أمي .. وماخذ احتياط كامل ..

طبعا ما جاء الصيف .. الا وكثرت السرقات بشكل مو طبيعي في الجبيل الصناعية .. كل جيراننا انسرقت بيوتهم .. الا بيتنا عجزو الحرامية .. أو بالأحرى ما فكرو يسرقونه .. يكفيهم البيوت اللي ما فيها كلاب .. المشكلة ان أكثر البيوت اللي انسرقت بيوت فيها أنظمة إنذار ضد السرقات ..

فاااا ما انتصفت الإجازة الصيفية .. الا والجيران واحد واحد يطلبوني من عيال كلابي وبعضهم وصلها معي إلى عشر آلاف على البوبي .. بس وعدتهم خير اذا جاهم عيال .. وطبعا بحاول أوزع من عيالهم بعد ما أخذ نصيبي ..

طبعا في البيت عندي .. ذكر وأنثى جيرمن شيبرد .. هذولا حقيني أنا .. غير جوزين الدوبرمان حقين اخواني اللي أدربهم على الشراسه .. وحاط الدوبرمان في أقفاص ما يطلعون منها الا معي .. والجيرمن مفلوتين بس أربطهم وقت اللي يكون وقت تدريب الدوبرمانز ..

بيني وبينك .. الجيران لهم حق يخافون .. يعني لو طلع واحد من الكلاب وتفلّت على واحد من عيالهم بيروح فيها .. بس بنفس الوقت الواحد اذا ماخذ احتياطه .. ومدرب كلابه تمام .. ما يشيل هم .. الباب والقراج مفتوحين ولا ابن امه كلب يتعدى حدود البيت ..

فاااا نصيحتي لك .. رجع كلبك وامش معه على تدريب صح .. ولا عليك في أحد .. بس الله لا يهينك انقز لوزارة الزراعه .. وخذ تصريح تربية كلاب حراسة .. وما عليك من أحد .. أهم شي تدربهم على التزام الصمت الا في حال وجود غريب بغيابك .. وغياب أهل البيت .. علشان حتى الجيران يعرفون انه فيه أحد غريب ببيتكم .. لأن النباح لو أزعج الجيران .. يحق لهم المطالبة بإزالة الكلب من البيت نظرا لأنه مصدر إزعاج ..

وسع صدرك ورجع كلبك وما عليك من أحد