جابوا بيض وفقست بيضة بس المشكلة رفض الزوج للفرخ

[H.B.H]

السلام عليكم
أنا من قبل كاتبة مواضيع عن أن الزيبرا الزوجين عندهم نفس المشكلة بأنهم يبيضون لكن البيض ما يفقس تقريباً لهم 3 مرات يجيبون بيض ولا نطلع بنتيجة وبعدها طفشت منهم قلت يمكن يبي لهم عناية خاصة في التغذية وأنا مو قادرة عليها فقلت أخليهم يعيشون كطيور وبس لا تفريخ ولاهم يحزنون المهم أنا يعني فضيت القفص من الأعشاش وتركتهم وقمت أعطيهم جرجير وخس وخلاص قلت لمن أتفرغ لهم بحاول أني أفرخ بس وهقوني قبل الدراسة بأسبوعين شفت وحدة منهم نافشة ريشها وجالسة على الأرض خفت لا يكون مريضة بعدين باضت تخيلوا باضت قدام عيني شفتها حتى حسيت أنه حلم وبعدها حطيت لهم الأعشاش وكالعادة خيوط التعشيش والبيض والعدة كلها المهم في زوج جاب 5 بيضات والزوج الثاني جاب 4 بيضات بس اليوم بعد ما كملنا 5 أسابيع من جابوا البيض طليت على الأعشاش ولأول مرة في بيضة فقست والفرخ بادي يطلع له ريش بس من بعد ما شفت الفرخ وهم قاعدين يسحبون في خيوط العش لحد أنهم طيحوا الفرخ على أرضية القفص مرتين وأرجعه العش بمنديل علشان لا تعلق فيه ريحه يدي .....يعني وش سالفتهم؟؟؟ هم بالعمداً يطيحون الفرخ من العش ؟؟ولا لمن يشيلون الخيوط يطيح مع الخيوط ولا ينتبهون؟؟؟مع أن المرة الثانية اللي انتبهت فيها أن الفرخ طايح على الأرض كان الذكر يحاول يجيبه من بين الشبك اللي يعزلهم عن الأرضية ....يعني وش الحل لمن فرحت بالفرخ أهله إلا يبون يموتونه ولا وش القصة؟؟
ما عليه طولت عليكم بالسالفة بس لأني من زمان مادخلت ولا كتبت لكم أوضاعهم أول بأول

[اسير طيوري]

ممكن يكون مؤ مرتاح بالمكان
او ما عنده الخبرة لانه اول مرة ينتج فيها

وان شاء الله باقي الاعضاء يفيدانك اكثر والله يوفقك

[أبو أمينة]

صباح الخير

الأخ/الأخت H.B.H :-

مدة فقس البيض هي 14 إلى 18 يوم و ليس 5 أسابيع ، ممكن صورة للفرخ ؟؟

أما بخصوص مسك الفرخ بمنديل حتى لا تلتصق رائحة يدك في جسم الفرخ فهذه المعلومة خطأ ، وليس لها دخل في حضن الفرخ أو عدمه ، دمتٍ/دمت بصحة وعافية .

أبو أمينة

[H.B.H]

أسير طيوري....يمكن كلامك صحيح بس هذي المرة الرابعة اللي يجيبون فيهابيض بس كل مرة أيأس من البيض وأرميه طبعاً بعد مرور 18 يوم بس هالمرة أول مرة يفقس فيها البيض
أبو أمينه هو صحيح كلامك أن مفروض أن البيض يفقس بعد 18 يوم بس أنا اللي عندي غير شكل أنت تدري أني أنا تركت القفص بدون أعشاش وبعدين باضت على أرضية القفص وبعدها حطيت لهم أعشاشهم وجابوا بيض وقلت يمكن زي كل مرة ما راح يصير شيء بالبيض وتركتهم لكن يوم الأربعاء وبعد مرور 3 أسابيع فقس البيض أنا غلطت وكتبت في الموضوع 5 أسابيع هذي الخمسة من لمن تركتهم بدون أعشاش تقريباً وكذا جابوا البيض وفقس
آخر شيء صار للحين .......الفرخ الأولي خلاص مات وفي 2 في العش
بس سؤالي هم ليه يرمون الفرخ بره العش...اليوم قدام عيني شفتهم تخيلوا الفرخ يتقلب داخل العش والأنثى تعدله وتأكله ولمن وصل الفرخ لطرف العش الذكر كان واقف بره العش حمل الفرخ ورماه لأرضية القفص ..يعني وش السبب؟؟

[أبو أمينة]

صباح الخير


الأخ الفاضل H.P.H

اعتقد بسبب وضع الأنثى للبيض مرة أخرى ، كم عمر الفراخ الآن ؟ ، دمت بصحة وسلامة .


تقبل مروري

أبو أمينة

[H.B.H]

مافهمت ؟؟كيف أن وضع البيض يكون سبب؟؟ إذا كنت كنت تقصد وضع البيض مع وجود فراخ اممم هالشيء ما حصل وعمر الفرخ الأولي ما أدري بس الفرخ الثاني تقريباً لحد اليوم عمره 4 أيام وفي فرخ ثاني عمره 3 أيام اليوم شيكت على العش وشكل الفرخ الثاني مات ..ما أشوفه يتحرك في العش
بس أبو أمينة تكفى...ما قلت لي ليش الزوج يسوون بالفروخ كذا؟؟يعني قهر أول مرة يفقس البيض وآخرتها يموتون
إذا على التغذية أنا أول ما شفت الفرخ الأولي حطيت لهم بيض مسلوق ونظفت لهم مأكلهم ومشاربهم علشان يصير أسهل لهم في تغذية الفروخ يعني وش اللي أسويه لهم علشان يساعدهم في تربية الفرخ؟؟

[أبو أمينة]

صباح الخير

الأخ الفاضل H.P.H :

حصلت لدى الكثير من المربين بأن يكون الزوج لديهم فراخ ويبيضون ، بخصوص موضوعك أعتقد بأن طيورك هذا اول بطن لها ولا تعرف كيفية تربية فراخها ، الله يعوضك في البطن الثاني .

تقبل مروري

أبو أمينة

[H.B.H]

لو أني ما عرفت بالضبط إيش معنى "أول بطن" بس من اللي فهمت أي هي أول مرة يفقس بيضها للحين 3 فروخ طلعوا وكلهم ماتوا يعني هي تأكلهم بس المشكلة أنهم يتقلبون لطرف العش ولا ترجعهم في الوسط
يلا ...الحمد الله على كل حال ...مثل ما هالمرة فقسوا إن شاء الله المرة الجاية يجون أكثر ويكبرون
أبو أمينة....مشكور على المساعدة
بس بغيت أسأل .......أنا هالفترة بنشغل عن الطيور فلو فصلت بين الذكور والإناث ما يجيبون بيض ولا؟؟لأني ألحين ما أقدر أعتني بهم وبتفريخهم مثل أول ,وإذا فصلت بينهم كم فترة الفصل بينهم بحيث أنها ما تأثر عليهم بأي ناحية؟؟

[أبو أمينة]

صباح الخير

الأخ الفاضل H.P.H :-


تستطيع فصل الذكر عن الأنثى ، ولكن لا أنصح بذلك خصوصا الآن بداية موسم التزاوج .

اعتقد مشكلتك تكمن في سقوط الفراخ من العش بسبب كثرة مواد التعشيش وليس الأب أو الأم هم من يسقطوا الفراخ ، ممكن صورة للعش لو سمحت .

ملاحظة :- أول بطن المقصود منه أول تفريخ للزوج .

تقبل مروري

أبو أمينة

[H.B.H]

طيب إذا هالفترة موسم تزاوج وحاولت معاهم مرة ثانية بالتفريخ ما يأثر هالشيء على الإناث بأنهم يبيضون مرة ثانية وهم توهم مخلصين من فترة حضانة؟؟