الفزعه بيض الله وجيهكم

[Mr.GT]

السلام عليكم ورحمه الله وبركاته





اخواني السالفه صغيره وبصراحه انا كبرتها خخخخخخخخخ


لالا السالفه وما فيها يا حبايبي


ان جاني كلب سلق حق صيد خخخخخخخخ ما اعرف اسمه بالانجليزي تعرف الثقافه يوناني


المهم الكلب ذكر وانا توني جايبه اليوم المهم الكلب مدرب وشفته قدامي يلحق

ورى قطه لكن اانا امسكه بالسلسه ما يرضى يمشي معايا ودايما بعيد عني


وش احسن حل على شان اصلح العلاقه الي بيني وبينه


مع العلم انه جايني هديه وهل اخليه مربوط ولا افلته


المهم ارجو الافاده منكم يا اخوان لان انا ما اعرف بالكلاب شي


وقلت مافي الا الخبراء تو زو هم الي يدبروني



واتمنى الرد باسرع وقت

[بو راشد]

يا هلا اخوي ومرحبا فيك في تو زو وقسم الكلاب خصوصا ..

اول شي نباركلك على الهديه .. ويعطيك خيره ويكفيك شره

لاكن يالغالي غلط انك تحاول تدربه وتنهيه وتجبره على شي اول ما يوصل !

اخوي في البدايه الكلاب كائنات حساسه .. وبتحس بالي في قلبك ناحيتها .. خلك عطوف ورحيم معاه .. ترا هو نفس الياهل اذا يبته مكان يديد .. اكيد متخوف من كل الي حوالينه ومو واثق منهم .. فانت لا تنهيه عن شي بقوه ولا ترفع يدك تهدده ولا تحاول تضربه تراه بياخذ فكره سيئه عنك .. هالاشيا ممكنه بعد ما يثق فيك تماما وللضروره القصوى فقط وانا ما انصح فيها الا ضربه خفيييفه على الانف كانك تضرب يد طفل. وبعدين حاول تفضي نفسك هاليومين .. انت عطه الاكل دايما وخل صبعك في الاكل ان كنت ما تلمسه ! لانه بيشم ريحتك انت فيه .. اذا ياكل خلك بعيد شوي واقعد وكلمه ان حبيت يعني امدحه او عطه الامر انه ياكل .. لما تتركه يلعب خلك موجود وكثر من عمارات المديح مع نبره تحسسه انك فرحان معاه .. وحاول تعطيه ال مكافئات (اكل بقطع صغيره طعمه محبب للكلاب ) بيدك .. باختصار اخوي عامله مثل اي انسان تبيه يثق فيك !

والشي الثاني عن المشي مع الكلب .. يفضل انك تشتريله (زناطه) (طوق خاص اذا يشد الكلب على السير يشد هو على رقبته) .. لمنع هالشي .. وخلك معاه لطيف في البدايه (اذا للحين ما اخذ عليك عدل ووثق فيك تماما) لكن ان صار هالشي ووثق فيك تماما .. فالي عليك تسويه ان كل ما يجدم الكلب عنك توقف وتخلي السير مرخي وخله يمشي خطوتين ثلاث .. لين ابتعد جر السير (بالزناطه) بقوه شوي ورجعه مكانه يمك (يفضل عند يدك اليسار) .. وعطه امر مثل (هييل) او اي شي انت تبيه .. وهالشي بيعلمه ان انت القائد وهذا الشي الي تبيه منه

وشكرا اخوي والي تبيه حاضرينلك

[CSI II]

السلام عليكم ورحمة الله وبركاته

اخوي هم انا مريت بهالمشكلة وهذا اكبر سبب انه الاحسن تاخذ الجلب من يكون صغير

ييب قطوة وعود جلبتك او جلبك على القطوة .. وبجذي الجلب من يشوف قطو جنه شايف شغلة عادية مايهمه وهذا الموضوع يفيدك : http://www.2zoo.com/vb/showthread.php?t=1212

وانت بعد لاتخليه يقرب من الاماكن اللي فيها قطاوة لانه الجلب بطبيعته الشي اللي يتحرك يلحقه علطول

ونصيحة اخيرة

لاتطلع الجلب " يعني تمشيه او اي مكان " الا لما ياخذ على القطوة و يتعود عليها مضبوط

لانه اذا عودته شوي شوي على القطوة وكل يوم تطلعه وشاف قطو راح يلحقه وجذي ماستفدنا شي


وطبعا مثل ماقال اخوي بوراشد


وانشالله مايقصرون معاك الاعضاء
تحياتي

[pitbull-lover]

بسم الله الرحمن الرحيم

انا اتفق مع الاخ بو راشد الله يعطيه العافيه ...


تقبل مني اجمل التحيات مع تمنياتي لك بالتوفيق ...

[Mr.GT]

بو راشد بيض الله وجهك وانشاء الله

راح اجرب حضي مع السلق الي عندي



والله يوفقنا وجزاك الله خير يا قمر

[Mr.GT]

CSI II


جزاك الله خير حبيبي على المعلومات الحلوه يا قمر


والله يوفقنا في تدريبه مع اني متخوف من صعوبه تدريبه

[Mr.GT]

pitbull-lover



شكرا يا قمر على تعقيبك للموضوع


واسمحلي اشكرك كثير الشكر على تعقيبك للمواضيع كلها


ماشاء الله عليك

بصراحه مبروك على المنتدى واحد مثلك وهاذا كلام صدق وليس مجامله

تقبل تحياتي اخوي

[بو راشد]

حاضرينلك يالغالي .. وانا اشهد بكلامك على اخوي بيت بل لوفر عسى الله يعطيه الصحه والعافيه

[فايز]

السلام عليكم ورحمت الله تعالى وبركاته

ماقصرو الاخوان وان شاء الله تتوفق مع الكلب...

مع السلامه تحياتي لك

[pitbull-lover]

بسم الله الرحمن الرحيم

صراحه صار وجهي كنه طماطه ناقص بس اقطع خيارتين و حطهم جنب خدودي و تصير سلطه لووول ..

يسلمو على الكلام الحلو والله يعطيكم العافيه انت و اخوي بو راشد صراحه ما ادري ايش اقول لكم و انا هدفي اني استفيد و افيد اخواني الموجودين و انشاء الله ان الشباب يستفيدون و اني ما قصرت معاهم بشي و الحمدلله على كل شي و الله يوفقنا و يوفقكم جميعاً ...

تقبلو مني اجمل التحيات مع تمنياتي لك بالتوفيق ...