Blue fronted Amazon اتمنى مساعدتي

[RedEye]

السلام عليكم و رحمة الله و بركاتة

جاني الببغاء هدية ولاكن للأسف ما عندي خبرة و اتمنى من اهل الخبره يفيدوني







نوعه هل هو فعلا Blue fronted amazon

كم ممكن يكون عمره؟

هل يمكن تحدي الجنس؟

وطريقة ترويضة او تدريبه لانه بصراحة جنني و قام يركض وراي بالغرفة

أول مره بحياتي آخذ كف من ببغاء

صيد طبعا الحجل تركيب كبس

وعضته ماشاء الله يعني حدث ولا حرج

ولا تسئلون كيف عرفت

من اجي عند القفص يطالع و بهدوء و يلعب بالقفص ما يجلس بمكانه ابد

يدور باستمرار

شهيته ممتازه ،، و كل شي فيه الحمدالله من ناحية الصحه ممتاز

ربيت كاسكو في السابق و الدرة بانواعهم ولاكن هذا الشي غير عنهم كلهم

للحين مو قادر امسح على راسه حتى ومع اني كان عندي كاسكو هولندي جامبو صيد عمره سنه تقريبا و صار مثل اللعبه بيدي يعني مو مبتدأ بتربية الطيور و الببغائات لاكن هالمخلوق جنني !!!

أتمنى تفيدوني وتساعدوني فيه

مشكورين

[RedEye]

فيه آخوان أفادوني ان عمره ما يقارب السنة

و ناس قالوا اكبر من سنتين و ماينفع لشي

وبصراحة احترت ؟؟

[s0zi]

ماشالله اخوي الله يباركلك بطيرك

نعم النوع بلو فرنتد

الجنس لايمكن تحديده الا بإجراء تحليل DNA

وغيره من الاسئله يجيبك الخبراء

موفق

[ابوووفهد]

وعليكم السلام ورحمة الله وبركاته

ماشاء الله ربي يبارك لك فيه جميل
بالنسبه للبلوفرنتد مزاجي يعني توليفه متعب شوي خصوصاً اذا كان كبير وصعب تحدد العمر لان حلقة العين ممكن تكون فاكه من عمر صغير انت الان مخير ياتحاول تولفه وتتحمل العض وأفضل شي يكون عندك استاند او تبيعه وتاخذ فرخ خصوصاً هذا موسمها والبلوفرنتد شهيته للاكل قويه تقدر تستغل الموضوع هذا فيه موضوع للاستاذ سكر ان شاءالله يفيدك .
ومعلومه مافيه كاسكو هولندي صيد فيه كاسكو صيد و كاسكو انتاج مزارع يطلق عليه هولندي

[RedEye]

يعطيكم العافيه و ما قصرتم

انا ابي اولفه ولا ببيعه لانه هذا اللحين تحدي حلو بس كيف اولفه ايش الخطوات

حاولت معاه نفس ما احاول مع الكاسكو ولا فاد جربت الدبس جربت امسح عليه بعصى و جربت اوقفه على العصا جربت اني الفه بمنشفه و امسح على راسه جلست ١٠ دقايق ولا قدرت امسح عليه الا مرتين خفت لا يأذي روحه

قلت مالك الا تهده ينام برى القفص و تخليه مفتوح و قصيت له جذع كبير من سدره و ركبت عليه اغصان و خليته ينام عليها امس و نام والله و طبيعي و جلس طول اليوم عليها يدخل ياكل و يرجع عليها يقوم يلعب عليها قلت خليه ياخذ على المكان و يتولف عليه يعني بعطيه فترة امان اول بعدين ابدا التدريب معاه بحكم انه كبير و مو مثل الصغير

اي نصايح اخرى ممكن تفيدني

[s0zi]

ممكن يفيدك التجويع
جوعه اربع ساعات واديه من يدك
ياكل وتمسح عليه

وكافئه بالفول السوداني وحبوب دوار الشمس

وطبعا اكيد لا بد يعضك حتى يتطمن بس اذا شايفك خايف
من العض رح يستمر بس انته لما يعضك قله بصوت عالي لا لا
واتركه وروح عشن يعرف انه تصرف مرفوض


موفق

[RedEye]

انا موافق انه يعض

بس المخلوق اللطيف هذا عضته تكهرب بشكل جميل يعني تعطي للواحد شعور انه

[najmsahil]

ما شاء الله تبارك الله طير جميل والوان جميله لا تفرط في الطير
بالنسبه لتحديد الجنس في ناس يحللو جنس الطير بمبلغ 45 ريال ومنهم ---------- في جده ولازم تنتف من ريش الطير ونصيحه لا تنتفه انت لانه ما راح يتوالف معك انا حصل اني نتفت 27 ريشه من ببغاء بلوفرنتد كانت مقصوصه بطريقه وحشيه لاكن الله وكيلك انه كرهني كره الى الابد والى يومك مو راضي يتقبلني

اما بالنسبه للتوليف انت وشطارتك ووقتك معه وافضل طريقه للتوليف قص سبع ريشات من كل جناح عد ثلاث ريشات من اول الجناح وقص بعدها طبعا الريش الطويل الخاص بالطيران عشان ما يطير منك وقت التدريب ويتهرب منك
والعض حط على اصبعك عسل وعطه بتلاحظ تدريجا يخف العض ويبقى العضعضه الخفيفه هذي ما تروح

موفق خير

[RedEye]

تسلم اخوي نجم ساهل و فعلا ما ودي افرط فيه
وبالنسبة للتمرين مخليه حاليا مفتوح على لستاند اوكله من الصحن بيدي مرات و مرات لا اذا انشغلت و صار يتقبل فكرت وجودي جنبه

لاكن العض مو راضي يخف بل معذبني وصار يحب العسل

قمت قلبت للدبس

وشكله حبه بعد

مزاجه عليل الواد

المهم انا اللحين ودي اعرف كم عمره وما عرفت اي احد ممكن يوضح لي عمر الطير

في ناس قالوا لي من حدقة العين الواحد ممكن يعرف



وبعد ما وريتهم الصور قالوا لي عمره فوق ال ٤ سنوات تقريبا

فهل من مطلع ممكن يفيدني في هالموضوع

[hassan-55]

نعم اخوي الطير باين من عيونه انه كبير شوي وصعب التحديد بالضبط
الامازوني يختلف عن الكاسكو
الامازوني اول ما يخلق تكون عينه سوداء الى سنه او اقل بقليل
وبعد السنه اسود على بني غامق وكل ما كبر بالسن تفتح الى اللون البرتقالي الخفيف واذا تعدى السنتين
يزيد او يغمق اللون البرتقالي تدريجياً

عكس الكاسكو سبحان الله يبدأ بالسواد الغامق ويخف اللون تدريجياُ الى الرصاصي وبعدها الأبيض ثم الأصفر
ثم الأصفر الغامق

عندك خيارين
اما تصبر عليه وتحاول توليفه وتلقينه الكلام وابدأ بالاسهل مثل بابا...الخ
واذا ما تقبل الكلام والتوليف بيع الطير واشتري طير فرخ سهل توليفه وتلقينه

وبالتوفيق ان شاء الله..