تجربتي مع أسوأ ببغاء مر علي والامور اللي استفدت منها

[Arashi]

السلام عليكم ورحمة الله وبركاته



ربما البعض مر على مواضيعي والشكاوي الكثيره اللي كتبتها بخصوص الكاسكو اللي عندي هههههه ووعدت في اخر موضوع اني راح أكتب الامور اللي تعلمتها من تجربتي عشان محّد يطيح في نفس الخطأ (وبالأخص للمبتدئين)



أولاً: أحب اقول اني مش 100% مروضه خبيره...لكني نجحت في ترويض 2 درّه وكم كاسكو من قبل

ثانياً: الموضوع متعلق بطيور المزارع مش المصيوده لأني ما جربتها وانا ضد شراءها

ثالثاً: أطمنكم الكاسكو "فوقو" ليلحين عايش عندي والحمدلله...وصار أليف معاي بعد تدريب مؤلم استمر 6 شهور...لكن صار له 3 شهور وهو ينتف ريشه مع ان كل شي ماشي تمام معاه في البيت

لكن ليش أعتبره أسوأ ببغاء ووين كان الخطأ؟ هذا سبب كتابتي للموضوع:


-------------------------------------------------------------------------------------------

قصتي مع "فوقو" والاخطاء:



1-اشتريته في نهاية نوفبمر من محل جديد...في المحل كان هو موجود مع كاسكو اخر يجعر وكانوا اخر 2 بقوا من هالدفعه (هذا اول خطأ)...جربت احمله على يدي لكنه طار في اقل من ثانيه...بس قلت معليش أعوده في البيت (ثاني خطأ)

أ-ابداً ابداً لا تشتري البقايا...عادة تجي دفعه فيها طيور ممتازه وطبيعي الناس تاخذ الافضل وتخلي لك الاسوأ
ب-لازم تحصل بينك وبين الكاسكو موّده..يعني ممكن صاحب المحل يحمله ويجعر...لكنه في يدك يكون أفضل وهادئ...واقول هالكلام عن تجربه...اكثر كاسكو ارتحت معاه كان "توتو"...راعي المحل كان يحاول يقنعني انه سيء وبتعب معاه...لكن لما انا حملته على يدي كان يلعب بعبايتي ويخليني امسح على راسه..وفي يد صاحب المحل يجعر ويطير...وفعلا لما أخذته البيت اول يوم كان يجعر وظل يعضني اسبوعين...لكن بسرعه توالف معاي ومع كل أهل البيت وتعلم في خلال 3 أسابيع يناديني باسمي وعمره فقط 7 شهور
ج-الكاسكو اللي يجعر مش شرط يكون أسوأ من اللي ما يجعر...احيانا الخواف يتعلم يحترمك بعد ما يحبك ويتطمن لك...اما الجريء فممكن يتعبك وما تحصل منه عالاحترام المطلوب


2-نرجع لفوقو...لما اخذته كان عمره 4 شهور (خطأ)...وكان جدا جدا جدا عنيد ويعضني لدرجة النزيف وتخريب قماش الملابس وكان يطاردني بس عشان يعضني....والبعض قال لي ان العنيد ذكي جدا (خطأ شنيع @@)

أ-الكاسكو اللي عمره أقل من 6 شهور بشكل عام مزعج جدا..يميل إلى الصراخ (ما اقصد الجعير) والعناد وكثرة الحركة...ولما ينباع بهالعمر بدون سيريلاك اعرف انه انحرم منه وهو صغير مما يأثر على نفسيته (تعلمتها من الاخر سكّر الله يجزيه خير)
ب-الببغاء العنيد ليس ذكي بالمره...كيف لكائن عنيد يسمع لك ويتعلم منك شي؟ "توتو" اللي بسرعه تروّض كان يتعلم الاشياء في يوم واحد...تعلم ركوب اليد بسرعه وترك العض بسرعه واي تصفيره نعلمه يصفرها في نفس اللحظه...وتعلم اسمي في عمر مبكر جدا....أما "فوقو" تعلم التصفير وركوب اليد بعد 4 شهور تقريبا وترك العض بعد 6 شهور...اما الكلام فما ينطق بولا حرف مع اني نبح صوتي من كثر ما اعيد واكرر نفس الكلمات..اللهم يحوّل نبرتي اثناء النطق الى تصفيره....كذلك لما يتعلم الشي يستمر عليه كم يوم ويرجع من الصفر كأني اشتريته اول مره...يعني ينسى تصفيرات...ينسى انه يلعب بأصابعي بدون عض..ينسى الركوب عاليد.....شي غريب جدا...أقعد أعلمه عالشي شهر كامل واول ما يتعلمه ينساه نهائيا وارجع ادربه كم شهر من الصفر

3-البعض يقول ان مافي ببغاء ما يتروّض

بالعكس...في كثير ببغاوات ومروضين افضل مني ما قدروا عليهم...وقال احدهم عن فوقو ان ما منه فايده والافضل أبيعه لأنه لو صار أليف ما راح يكون جيّد 100% وبيتعلم الصراخ ويسبب مشاكل....وفعلا...هو مش متوالف مع احد غيري ولا يرضى يتوالف مع اي احد...ومعاي مب 100% يعني ماقدر احمله بيدي ولا أقلبه واحيانا يجعر خفيف بدون سبب...والصراخ بعد ما تركه 3 شهور رجع له مره ثانيه...ما قدر أترك المكان الا واسمعه يصارخ ويزعج أهل البيت

4-البعض قال لي أصبر عليه مع اني فهمتهم اني مب قادره اروضه زياده..ولما قررت أبيعه اتهمني البعض بعدم الرحمه...ليش؟

اخي المروّض...انت مب ملزوم تخلي أي ببغاء مب مرتاح له عندك...اذا جفت نفسك مب قادر تروضه بيعه على طول بدون تردد وهني ترحمه وترحم نفسك...الببغاء ممكن ما يحب الاولاد (او العكس) وهالامور موجوده فعلا...الببغاء ممكن ما يحب الناس اللي ببنيتك وحجمك (فوقو مثلا يكره الشخص السمين)...الببغاء ممكن ما يحب تعاملك معاه حتى لو كنت طيّب جدا جدا (ممكن يميل للمروض اللي يلاعب زياده او يحب المروض الصارم)......يعني عن تجربه...انا مره رحت محل عندهم ببغاء يجعر...انا لما مسكته وداعبته بطريقتي على طول سند راسه على كتفي وخلاني أمسح عليه...وببغاء كوكاتو اخر عندهم يحب البنات ويلحقنا بجنون لكنه يهرب من الرجال.......في امور انت ماتقدر تغيّرها في الببغاء الا في حالات نادره وتكون مروّض محترف من الدرجه الاولى ويكون الببغاء مستعد للتغيير

5-تصرفات تدل من البدايه على ان الببغاء معرّض لنتف الريش:

ذكرت ان فوقو ينتف ريشه بجنون..ومهما حاولت أعالجه الوضع يصير أسوأ...يمكن البعض يقول ان في شي تغيّر وضايقه! طيّب انا اقول لكم ايش كان يسوي من اوووووووول يوم جبته البيت: كان كل ما حاولت أقربه أو أعلمه شي يعض أظافره بوحشيه او يعض جناحه ورجوله واجزاء اخرى من جسمه...ولما كان ينطح القفص محاولا الخروج كان يجرح راسه...ولما بدأ يدخل مرحلة تبديل الريش بدا شوي شوي ينتف ريشه...عرضت المشكله عالاعضاء وقالوا لي ان هذا تبديل...لكن لا...ما كان تبديل...التبديل لما يكون الريش المتساقط قطني ابيض...ولو مصحوب بريش رمادي راح تلاحظ انه من الجذور مش جزء من ريشه مقطوعه...كذلك بكون الجلد طبيعي فاتح مش ببقع حمراء مثل النتف...لأنه في النتف يجر الريشه بقوّه اما في التبديل فتطلع الريشه بسهوله....يعني هو من الاساس كان متعوّد يأذي نفسه من كثر ما هو عصبي...أيضا من البدايه لاحظت انه كان يحرك راسه يمين يسار بكثره...شي يدل عالمرض حسب ما قرأت في المنتدى لكن هو بصحه جيّده...لاحقا عرفت من احد مدربي الطيور ان هالحركه تدل على ان الطير متوتر بزياده...ولين اليوم يعمل هالحركه لو بشكل خفيف


----------------------------------------------------------------------------


بعد قرءة الموضوع...البعض ممكن يظن اني أهملته وما وفرت له اللي يحتاجه...فبرد من الحين

-هذا اكثر ببغاء اعطيته من وقتي...اغلب الاوقات كنت اقعد وياه يوم كامل اخليه خارج القفص واحاول ادربه والاعبه واداعبه...يعني أنوّع له وما امشي على روتين واحد واسوي اللي اجوفه يرضيه...ولما يمل من التدريب أتركه براحته
-قفصه فيه فوق العشر ألعاب وكل يوم أبدلهم له عشان لا يمل
-الاكل منوع من حبوب مشكله وفواكه وبسكوت وخبز واحيانا أحط في صبعي عسل او كراميل خفيف يمصه..كذلك لما يجوفني اكل شي اخليه يشاركني الاكل عشان يحس بالمحبه
-تشميس ترويش واهتمام بنظافة القفص
-حتى لما بدا ينتف ريشه كثفت جهودي معاه وزدت اهتمام عشان يترك هالعاده
-ما خليت مروض ولا بيطري والا عرضت مشكلتي معاه من البدايه وجربت كل الحلول..لكن في الاخير كلهم احتاروا معاه

--------------------------------------------------------------------


اخيراً: الهدف من الموضوع الاستفاده من التجربه...المروض المحترف ما يحتاج لمعرفة هالامور طبعا....لكن المبتدئ ممكن يستفيد قبل لا يطيح في ببغاء يقعده في بداية المشوار...وممكن لو مروّض عنده شوي خبره يكتشف الخلل من البدايه ويصلحه قبل لا تتعقد الامور مثل ما صار معاي وتأكد من شي...مهما كانت عيوب الببغاء وحتى لو ما توالف معاك 100% فهو يحبك لأنك عالاقل تهتم بأكله وقفصه...هالشي أضمنه لك فلا تكره ببغاءك حتى لو قررت بيعه...يعني فوقو ترددت كثيرا في بيعه من محبتي له على كثر عيوبه .......... وفي النهايه...لكل ببغاء شخصيته...فمب شرط اذا لقيت هالكم عيب في ببغاءك يعني بيطلع غبي او ينتف ريشه...فلو جفت وضعه تطوّر بشكل أسرع للأفضل فتطمن انه ماراح يتعبك باذن الله



وتم بحمد الله ^^

[monybat]

تجربه جيده
والانسان دايم يتعلم من تجاربه
وبالتوفيق

[the_gostman]

شكرا لكي اختي على النصبائح القيمه.. وانشالله ربنا يبعتلك كل خير..

موفقه
اخوكي رمزي

[the_gostman]

شكرا لكي اختي على النصبائح القيمه.. وانشالله ربنا يبعتلك كل خير..

موفقه
اخوكي رمزي

[حارس الغابة]

موضوع رائع وتجارب إستفت منها

بارك الله فيكي

[ابو على2]

بارك الله فيكي على النصيحى

[الـــــــرازم]

شكرا على الطرح المفيد والتجارب

دائماً تفيد الجميع ونتعلم منها

[saloOom 313]

اشكرك على الموضوع

[al_ameer707]

الف شكرا اختي على طرح التجربه الرائعه بارك الله فيك وتقبل مروري

[شاكر عارف]

ماشاء الله أستفد من الموضوع كثير