اشترك في نشرتنا البريدية ليصلك كل جديد

كاسكوكيه · 03-10-2008, 02:43 PM

السلام عليكم و رحمة الله و بركاته

اليوم مريت ع موقع يو تيوب و لقيت مجموعه من الفيديوهات اللي تعلمكم اشياء بسيطه ممكن انكم تتبعوها عشان تغيرون بعض السلوكيات الغير مستحبه في الببغاء

الفيديوهات بالانجليزي.. بحط لكم ملخص هنيه عن كل رابط للاستفاده

كيف توقف الببغاوات عن الصراخ
http://uk.youtube.com/watch?v=aPlDljTG2Bo

يعتبر الصريخ أو مثل ما يسميه البعض الجعير عند الببغاوات امر طبيعي.. اكثر وقت "تصدح" فيه الببغاوات هوه الصبح و في الليل.. (يعني الوقت اللي تتيمع فيه الصفاصيف ع الشير في الحاره )

لو ما كنتو مرتاحين من هالشي.. عيل ماكان المفروض انك تربي طير بس ممكن توصل مع الطير مرحله انه يصير الصريخ زايد عن حده.. مثال لو ظهرت من الحجره و خليته بيصرخ الين ترد لانه يريد انتباهك..

احسن طريقه عشان تعزز هالسلوك السلبي انك ترد تصرخ عليه "اسكت!! لم حلجك!!" بس انته بهالطريقه تحسسه انك تسمعه و يفهم الموضوع ع اساس انه "ما عليه دقيقه و برجع لك" لانك تتجاوب معاه و هذا اللي يهمه في الموضوع...

احسن شي انك تلقى طريقه عشان تلهيه عن الصريخ.. مثلن لو انته بتظهر من الحجره حط للطير شي في القفص.. مثلن اكل.. بيتعود الطير يوم انته بتظهر بيلقى شي في القفص.. و بهالطريقه تلهيه عن الصريخ.

ممكن انك بعد تروح الين الطير و بكل هدوء غط القفص بشاذر لمدة ربع ساعه.. طبعن هذا يعتبر كعقاب للطير.. ونحن ما نشجع العقاب.. بس الطير بيفضل انه يجوفك ولا انه يتغطى فبيلغي الصريخ..

الطريقه الاخيره... لو ظهرت و سمعت الطير يصرخ لا ترجع صوبه ولا تقول اي شي.. ويوم تسمع هدوء ولو بسيط ادخل الغرفه.. و عطه مكافأه... كرر الحركه اكثر من مره و بتلاحظ انه الصريخ قل و فترات الهدوء زادت ^^

كيف تعلم الببغاء تميز اسمها
http://www.youtube.com/watch?v=3pHlG6CVYM4&NR=1

هالفيديو يعلمكم كيف تدربون الببغاء انه ايي صوبكم يوم تزقرونه.. طبعن هذا ينفع مع الببغا اللي يطير.. ممكن تبدأ التدريب ببساطه انك تطلب من الببغاء انه يركب ع ايدك بمجرد انك تقول له "اركب" و طبعن كل ما ينفذ الأمر تكافأه..

و حاول تسلسل الموضوع.. يعني اول شي يركب ع ايدك.. و بعدين مثلن "تعال هنيه..!" و شوي شوي ناد اسم الطير و حط ايدك ع بعد مسافه و الطير بيفهم انه هوه المقصود و بيربط الاسم و الحركه.. ولا تنسو المكافأه...

كيف تعلم الببغا عشان يركب ع ايدك
http://www.youtube.com/watch?v=TPZ1B...eature=related
الببغاوات متعودات يركبن ع اغصان و ستاندات.. بس انته تباه يتعلم يركب ع ايدك.. اولن لا تأشر بصبعك في ويهه.. لانه بيحاول يكتشف صبعك و بيعظه.. مب شرط لانه متوحش ^^
دايمن خل ايدك تكون مستواها نازل و مرتخي.. واذا ما طاع الببغا يركب عليها مثل ما انجوف في الفيديو في الثانيه 50 .. حاول ان ايدك شوي تلمس صدر الببغا و قول له "اركب" و بهالطريقه يختل توازن الطير و عشان يتوازن بينجبر انه يركب عليك.. و ع طول كافئ الطير.. لانه يوم مسحت ع صدره و فقد توازنه بيشكل هذا تجربه مب حلوه للطير بس لانك كافأته فبيعرف انك ما كنت عدواني معاه..
بعض الطيور تستخدم منقارها عشان تركب عالغصن او الايد.. لو ما تريد هالشي حاول انك تحط ايدك من ورا الطير و بمجرد ما يحس بايدك وراه بيمشي خطوه للورا عشان يركب على ايدك.. بس تذكر انك تريد هالشي يكون تجربه حلوه في ذاكرة الطير فلا تكون قاسي معاه.. لانه بهالطريقه عمره ما بيركب ع ايدك

كيف تدرب الببغا عشان يوقف عض
http://www.youtube.com/watch?v=GdwI5...eature=related
اولن لازم نعرف انه اهم سبب ان الببغا يعض هوه الخوف.. عشان جيه لازم نغير البيئه اللي تسبب الخوف.. في مملكتهم الطبيعيه في الغابه الطير بيختار انه يطير... بس في هالبيئه اليديده ماله غير العض.. و هذا هوه الحل الاخير لهم
لو كان عندك طير يعض.. و مثل قلت له "اركب" و بدال ما يركب ع ايدك حاول يعضك.. و طبعن هيه تتكلم عن طير متعلم يركب ع الايد.. و هوه ع الايد الثانيه هز ايدك شوي عشان يفقد توازنه.. الطير بيربط في ذهنه انه كل ما يريد يعض يفقد توازنه و هالشي تكرهه الببغاوات .. و بتلاحظ بعدها انه يوم بتعطيها ايدك عشان تركب عليها بتتقبلها..
و تقدر بعد تطلب منها تركب ع ايدك بس من ورا.. و اخر طريقه عشان ما تعظك انك تدخل عنصر تلهيه عن تعضك.. يعني مثلن عطها ايدك عشان تركب عليها و بالايد الثانيه امسك اي شي ممكن ان الببغا تلتهي فيه عن ايدك اللي بتركب عليها مثل عصا او اكل.. و بهالطريقه بتحاول توصل ايدك بدون ما تنتبه و في نفس الوقت بتكون منتبهه للعصا او الاكل في ايدك الثانيه

الممنوعات في تربية الببغاوات
http://www.youtube.com/watch?v=-fOR8...eature=related
بنتكلم في هالموضوع عن الاشياء اللي ممكن تتبعوها في تدريب الببغا.. اهم شي انك يوم بتدرب الببغا دايمن خلك في مكان واحد ولا تغير المكان وايد... السبب انه الببغاوات تاخض وقت الين ما تتعود ع المكان و البيئه اللي تحطها فيها.. فكل ما غيرت المكان بيخلق نوع من الالتهاء عن التدريب.. حاول انك يوم تريد تدرب الببغاء انه ما يكون فيه انشطه مختلفه وانته تدرب الببغاء.. فمثلا لازم ما يكون فيه حيوانات ثانيه في نفس الغرفه.. و لا شخص ثاني يتكلم.. او يسعل.. و طبعن مهما كان التدريب ناحج او فاشل حاول دايمن ان التدريب ينتهي بشي ايجابي..
صح بتفقد اعصابك و بتعصب لانه يعضك او ما يسمع الكلام بس بهالطريقه بتخلي فترة التدريب بالنسبه له شي مزعج ولا بيتجاوب معاك في المره الثانيه...

كيف تعلم الطير يستخدم الحمام (وانتو بكرامه)
http://www.youtube.com/watch?v=tlIix...eature=related
معظم الببغاوات ما يعرفون انهم لازم يسيرون مكان معين عشان "يسوونها" .. ولا انهم يمسكون عمارهم.. بس في طريقه تقدر تستخدمها عشان الطير يتعلم انه ما يوسك و بالاصح انه يسير مكان معين مثل الزباله..
احسن شي ممكن تسويه انك تكون ملتزم في الموضوع.. و غير جيه انك تفهم لغة جسد طيرك.. فكل مره يريد الحمام بتعرف من طريقة وقفته او هز ذيله.. المهم كل ما يريد الببغا ينزل فضلات حط تحته سلة الزباله او كلينكس...
الببغاوات الصغار يسووها كل عشر دقايق و الببغاوات الاكبر حجم كل تقريبا 20 دقيقه... كل ما يتباه يسوي في الزباله او علبه دايمن استخدم مصطلح معين عشان تدل ع فعل "روحة الحمام" عشان يربط الطير الجمله بالفعل.. و بهالطريقه كل ما يريد يروح بيقول الجمله الي تعلمها منك..
المفضل استخدام مكافأه كلاميه اكثر من الاكل.. لانه في احتمال كبير يتمون ماسكين عمارهم ولا ينزلون فضلاتهم لانه بيس اتجوفهم عشان يحصلون المكافأه و هذا بيسبب لهم مشاكل صحيه

..
و تذكر المتحدثه حاله وحده من الببغاوات اللي علمتهن... مره وقفت ع الستاند و طالعتها فقالت الببغاء سيري الحمام و طارت صوب الحمام
فعندها عرفت المدربه ان الببغاء فاهمه الموضوع

تعليم الطير من خلال التقليد
http://www.youtube.com/watch?v=xBO9p...eature=related

واحد من اكثر الطرق فعاليه في تدريب الببغاء هي التقليد.. و خصوصن مع اكثر الطيور ذكاءا مثل الرمادي و الامازون و الكوكاتيل
لانهم طيور قادمه من جماعات..
فمثلا لو تريد تعلم الطير عن شي.. حاول انك انته تسويه جدامه.. مره و مرتين و عقبها بيحاول هوه لانه شافك تسويه

على سبيل المثال تريد الببغا ياكل فستق الببغا بيحاول و بيلقاه صلب فما بياكله.. بس لو انته كلته بيعرف انه هالشي ممكن يحاول يجربه و بياكله
بس وانته تاكله حاول تسوي عمرك اونك مستانس بالاكل

و من المعروف انه الببغا دايمن يريد انتباه... فمثلن لو عندك اكثر من طير و واحد منهن سوى حركه انته مدربنه عليها عطه مكافأه بتلقى الطيور الثانيه
تسوي اصوات تحاول انها تلفت انتباهك عشان تحصل مكافأه مثل الطير الثاني

و ممكن في اغلب الظن انهن يقلدن الطير اللي كافأته

و المدربه تسوي مثال بانها حطت حبتين من المكسرات في كيس... و تلاحظ انه يراقبها و هيه تحط المكسرات
طبعن حاول انه يكون الشي مرغوب من قبل الطير

و قامت بتغليف الكيس و عطته الطير
لاحظو كيف الببغا حاول يفتح الكيس لانه شاف انها حطت المكسرات داخلها بس الطير رمى الكيس لانه احتمال اول مره يجربها
او لانه الكيس ثقيل عليه

و حاولت في الفيديو تراويكم طريقه عشان الطير يهز راسه مثل ما تهز ايدها جدامه بس لانه كاميرات و طاقم التصوير الطير ما قلدها

بس الحين تعبت من كثر ما اترجم و سايره يمين يسار بين الفيديو و الموقع ^^
ان شاء الله تكونون استفدتو

و لي عوده ان شاء الله مع مزيد من الافكار من المختصين ^^

عازف الكيبورد · 03-10-2008, 05:54 PM

جهد كبير تستحق الشكر عليه

الله يعطيك العافيه ويستحق التثبيت

؟!بدون اسم؟! · 03-10-2008, 06:45 PM

الموضوع يستحق الشكر الف مره ... واطلب التثبيت لانه يستحق التثبيت...

ويعطيج العااافيه ... واايد عجبني المووووضوع ...تسلمين على الموووضوع ...

سكون الليل · 03-10-2008, 09:18 PM

واو الله يعطيج العافية

الف الف شكر

البندوق · 03-10-2008, 09:36 PM

تسلمى على هذا المجهود وباركالله فيك

البندوق · 03-10-2008, 09:46 PM

بصراحة تسلم أناملك على هالموضوع وياريت تحطي موضوع عن تعبيم بعض الحيل والحركات وعن التفريخ لو عندك فكرة عنه واتمنى لك دوام الصحة والعافية

كاسكوكيه · 03-10-2008, 10:46 PM

اقتباس:

المشاركة الأصلية كتبت بواسطة عازف الكيبورد

جهد كبير تستحق الشكر عليه

الله يعطيك العافيه ويستحق التثبيت

العفو اخجلتوني والله

ربي يعافيك و تسلم ع التثبيت

كاسكوكيه · 03-10-2008, 10:48 PM

اقتباس:

المشاركة الأصلية كتبت بواسطة ؟!بدون اسم؟!

الموضوع يستحق الشكر الف مره ... واطلب التثبيت لانه يستحق التثبيت...

ويعطيج العااافيه ... واايد عجبني المووووضوع ...تسلمين على الموووضوع ...

^^
العفو .. ^^

ما سويت غير الواجب .. و ان شاء الله بحاول اني كل ما قدرت و لقيت اشياء مفيده احطها لكم ^^

sweet angel · 03-10-2008, 10:49 PM

تسلمي حبيبتي ترى الموضوع وايد مفيد وروعة بعد
وتراه يستحق التثبيت وان شاء الله تكتبي لنا اكثر
مشكووووووووووووووووووووووووووووووووووووووووووووووووووووورة يا بعد عمري