سويت خلطة لقطوتي ليلي و ان شاء الله تفيدها في القضاء على الفطريات

[تركوازية]

هلا اشحالكم

صار لي يومين من اشتركت في المنتدى والصراحه استفدت وايد....وتعلمت امور ما كانت على البال ..وصرت خبيره بعد و ابدع من نفسي اشياءات..خخخخ

الصبح قريت موضوع الاخت جوسي عن خلطتها بخصوص الثعلبة والفطريات...واستفدت منها جزاها الله كل الخير و يحفظها...

ومثل ما تعرفون انه ليلي تعاني من الفطريات والبراغيث وسببت لها طفح الرنج ورم...

فقمت و سويت الخلطه + لمساتي الخاصة...(( دوم احب ابدع و ازيد و انقص حتى في الطبخ العادي خخ))

الموووهييييم...بد ما جهزت الخلطة..لبست القفازات...وهجوم على ليلي...والحمدلله حسيت بفائدتها من اول استعمال انه ليلي ما قامت تحج نفسها..(( يعني بطلت هرش او وقفت حك))...واحس انها الاحمرار خف شوي اماكن الطفح..وخلال ساعه لاحظت انه 80% من النقاط السوده و اللي هي عبارة عن البراغيث اختفت ...عجيب الصراحه...

وان شاء لله تفيدني مع الاستمرار في علاجها و القضاء على الفطريات و البراغيث...وتبيدها ابادة شاملة...

ودام اني استفدت فقلت لازم اشارككم تجربتي عشان تستفيدون معاي و تدعون لي

هالكميات حطيتها عشان تملأ عبوة الماي الصغيره...واستخدمت استكانة (( كاسة الشاي الصغيره )) عشان اقيس المقادير

- نص استكانة ملح >> معروف الملح انه له فوائد تطهير ويقتل البراغيث

-ثلاث ارباع استكانة معجون الثوم و الزنجبيل (( قطعين زنجبيل + اربع فصوص ثوم )) >> معروف الثوم انه مضاد حيوى طبيعى ومضاد للفطريات وله فوائد عديدة اخرى...والزنجبيل يعمل ايضا كمطهر و مرطب للبشره ومفيد للفروة و الشعر..

-استكانة خل التفاح>>> الخل يقتل البكتيريا و الفطريات..

- زيت كانولا...وعبيت العبوة للربع (( الزيت + المكونات السابقه راح تعبي نصف العبوة)) >> استبدلت زيت الذرة اللي وصفته الاخت جوسي بزيت الكانولا لانه يحتوي على اوميجا 3 و اوميجا 6 والمعروفه بفوائدها للفروة و تكافح امراض الجلد و يحتوي ايضا على فيتامين هـ و المعروف بفوائدة للبشره..

- زيت زيتون (( كملت به تعبئة العبوة )) >> فوائده لا تعد و لا تحصى..

يتم رج المكونات كلها بالعبوة وثم دهن جسم القطة بكمية بسيطة يوميا مع زيادة تركيز الخلطة على اماكن الطفح....ولا تنسووون تلبسوون قفازات و رمي القفازات بعد الاستعمال مباشره...لانه بتلاحظون عند الدهن انه البراغيث (( نقط سوده)) ميته عالقه بالقفاز...لذا يجب التخلص من القفاز مباشره..

ولا ضرر ان لحست القطوة الخلطه لانها تحتوي على مواد طبيعية مفيدة ومنها الثوم يساعد على طرد الديدان و الوقاية منه فوائد اخرى راح تستفيد منها القطوة ان شاء الله...(( اعملوا بحث عن فوائد مواد الخلطه وشوفوا الامور اللي راح بتستفيد منها القطط))

طبعا مع الخلطة ما انسى اني اعطيها نص حبة نيزورال في اليوم لمدة 20 مع تقليلها لربع حبة فيما بعد عندما تخف المشكله...و ابخ بخاخ لاميسيل على اماكن الطفح 3 مرات في اليوم...و تحميمها بشامبو نيزورال كل 3 ايام.>>>> شادة حيلي مسوية علاج مكثف ههههههه...

وبالمناسبة ترى الخلطه لو تشوفون فوائدها ..تراها تفيد للانسان بعد وخاصة لعلاج البشره و الشعر...وافكر استخدمها روحي

صح ريحتها شوي ثوم لكن تختفي بعد شوي لانه الخل وريحة الزنجبيل تغطي على الثوم...لكن ريحة الخلطة مب قوية جدا بالنسبة لي مقبوله...>> متعوده على وهف المطبخ خخخ

ان شاء الله تكونوا استفدتوا وادعوا لي وادعوا حق ليلي تخف عشان نشوف لها معرس ولد حموله...

[بسه]

مشككككككككككككككوره

[sisi_moon]

وووووووواي نموت على المبدعه .. واهم شي أشياءات هههههها عجبتني الكلمه

فديتج يعطيج العافيه والله ..

وينج ياجوووسي شوفي كيف افدتني الناس ..^_^

الحمدلله ان ليلي استفادت ويارب تنتهي الفطريات بأسسسرع وقت ..

بس ختيو البخاخ استعمليه مره باليوم بس .. لان الزياده كالنقصاان ^^ يعني ممكن يسبب لها تهيج ولا شي ثاني لاسمح الله ..

وقريت ان الثوم من الاطمعه الضاره للقطط .. بس ان شاءالله ماتكون ضاره ..

والله يخليها لج وتشوفين لها معرس بحلاتها ويجيبون احلى كيتين ^^

بالتوفيق غاليتي ..

[تركوازية]

تسلمون على الردود

ومشكوره سيسي على الملاحظه....انا بخيت لها مره...الصبح....ورحت ابخ لها قبل شوي لكن غيرت رايي قلت خل الزيت يسوي مفعوله و بجرب ..زين ما بخيت لها عيل...وشكلي بكتفي مره باليوم + الحبوب + الزيت يوميا و الشامبو كل اربع ايام وفكرت اني احممها بس مره في الاسبوع لانه بررد..وبيتنا كله سيراميك عشان ما تبرد..

وهي اصلا كارهتني من يومين من بعد ما حممتها و هاليومين اطاردها عشان الدوا و الزيت اليوم لوول ..كل ما تشوفني تشرد...

اشتقت اشيلها و المسها ....بس زين الكيتي اليديده معوضتني...

[sisi_moon]

لووووول حقدت عليج

اي حمميها مره بالاسبوع بس .. عاادي .. ^^

[محبه الحيوانات]

مشكووووووووورر

[ولد حلو]

اختي تركوازيه
الملح بيسبب تهيج للجلد
انصحك انك ما تستعمليه في الخلطه
وشكرا

[ღ الـوفـا كلـهـ ღ]

يسلموووو تركوازيهـ ,,

انا قطوتي تعض جلدهآآ وكأنه فيها حكه .. فجأه كذا تقووم تحكه بفمهآ ,,

شكلي بجرب الخلطهـ ..يعطيك العافيه اختي

[غدووو]

رووووعـهـ

مـ ش ـكـوورهـ

[تركوازية]

ولد حلو

مشكور اخوي على الملاحظه

انا مستخدمة الملح كمية بسيطه عشان التطهير

والحمدلله ما صابها تهيج...بالعكس انا لاحظت انه في بقع صغيره كانت موجوده واختفت....والبقع الكبيره خف الاحمرار منها الحمدلله...

وباجر باخذها للبيطري بعد اسوي لها فحص