اشترك في نشرتنا البريدية ليصلك كل جديد

بن معجل · 07-10-2008, 04:35 PM

اخواني الأعضاء سوف اكتب عن مشروووعي الي انا توني بلشت فيه

مشروع النعام !!
طبعا بنظري هذا اكثر مشروع ربحي ويطلع ذهب

وهو مشرووع ناجح للي عندهم مزرعه وساحات واسعه

ودي اشارككم في قصتي يمكن اقدر افيدكم احنا كان عندنا مزرعه بالوفره ومو مستقليينها في شي غير الزراعه فكنت افكر بمشروع في سنة 2006 وخطر في بالي مشروع تربية النعام

..

بداية قصتي مع المشروع :

طبعا في البدايه كنت كثير خايف ابلش المشروع بروحي لأنه يبيله راس مال ومجابل ومساعده

كلمت اخواني محد اقتنع وكلمت اصدقائي كلهم ضحكوا علي تدرون ليش ؟؟
لأن كل واحد فيهم مسويله مشروع ملابس !! انا بالنسبه لي كهاوي للحيوانات ماشفت انا الفكره فيها عيب !! فعصبت :@ ورحت لسوق الجمعه بروحي ولقيت فروخ نعام الجوز ب60 بس لأنه خذيت منه 5 أجواز يعني 10 نعامات فروخ

ورحت فيهم المزرعه وكاان شهر 12 بالشتاء وحطيت اكل وماي ودفايات المهم انه مثل ماتدرون انه ذكر النعام يبلغ بعمر 24 شهر يعني سنتين

والأنثر بعمر 18 الى 20 شهر ...
والأن في سنة 2008 صارلهم سنتين ضبط !! وطبعا الي باقي منهم 8 !
والصيف الي طاف في شهر 6 بدايته باضت عندي انثى وكانت اول الخير

وبما ان الحظيره الموضوعين فيها كبيره جدا ربما تكفي ل100 نعامه بالغه واكثر وكانو يبيضون طوال الصيف وانا اجمع البيض واخزنه في غرفه معتدلة الحراره للحفاض عليه من الجو الحار والحشرات حتى اصبح عندي حتى الأن 30 بيضه وها انا الأن اشتريت فقاسة للنعام من الشويخ محل يم السوق الأيراني يبيع فقاساات وتكفي ل 64 بيضه كبيره

وللأن وضعت فيها ال30 بيضه من قبل رمضان بأيام معدوده اخر شهر 8 !! ولقد فقس بعض البيض (أقل من 10 حتى الأن) وفي تزايد

ان شاء الله وقريبا سأضع صور لهم

..... وادعوا لي لأني راح اكبر المشروع واعمل مزرعة للنعام

تخيلوا الي بتربحونه ؟؟ يعني انا شريبت فرخ النعام الواحد ب 30 دينار وانطر عليه سنتين ويصير سعره 120 دينار واكثر !!
مو هذا موضوعي !! موضوعي اني اعلمكم انه المشروع وايد مربح بما ان النعامه تعيش ل45 سنه او اكثر

فهو حتما مشروع ناجح بس يبييله صبر والي الله كاتبه اكيد بيصير .... والي ضحكني بالموضوع انا اهلي مستغربين لأنه المشروع مافشل وقاعد يكبر ومستغربين لأني صغير في السن عمري 20 سنه وتخيلوا مع الدراسه بالجامعه وكنت كل يوم اسوق السياره لمدة 45 دقيقه لأصل الى الوفره واتطمن على النعام

واشوف شنو محتاجين ... انزين اذا انا قدرت انتو ليش ماتقدرون ؟؟ مع ان المشروع ماراح ياخذ اكثر من 250 دينار .. ولو تنطر عليه سنتين راح يكون لك اسم في السوق طبعا بالوفره !! وانا خطتي اني اسوي مزرعة نعام تضم فوق ال 300 وال 400 نعامه من اصل 8 نعامات !! فكروا بالموضوووووع ... تذكرون اصدقائي الي قتلكم ضحكوا علي !! تدرون انه ميتين يبون يروحون معاي المزرعه يشوفون النعام .. لوووول والي ضحكني اكثر انه واحد فيهم يقولي تقفى دخلني معااك بالمشرووع !! تدرون ليش لأنه نجح ولأن اول المشروع تعب بس اخره خير الله سبحانه قال اسع يا عبد وانا اسعى معااك

الشخص نفسه الي ضحك علي اقتنع بالفكره اكثر مني ويبي يدش معااي بس حرييييمته

بعد مايصير انا اتعب كل يوم واهوا يدش معاي بارده مبرده صح ؟؟
انزين في وايد ناس عندما بدأت بالمشرووع قالولي لااااا النعااام مؤذي ويبيله تربيه ودفش !!
انا اقولكم عن تجربتي جميع الحيوانات مؤذيه في التربيه !! بس الشاطر يجااابل شغله ويربح من وراااه ... وانا ان شاء الله عطوني سنه او سنتين جداام وراااح اصير تاجر نعاام

ووعد الي يبي نعاام من عندي انا راح ابيعه ارخص من السوق يعني السوق الجوز ب60 انا راح ابيعهم ب40 عشان انا استفيد واسوي سمعه حلوه !! ولا تنسون انه انا بلشت بأقل من 300 دينار والحين انا المستفيد !
واكيد مع وجود الفقاسه ماتخافون حتى لو مات جزء من النعام لأنه الفقاسه فيها 64 مكان للبيض يعني منتو خسرانين ..

وانا نصيحتي المشروع حلو يالله تحركوا

واي مساعده او سؤاال انا موجود

أخوكم : عبدالمحسن المربي الصغير

بالنسبه لأفضل نوع نعام منتج هو الأفريقي الأسود الرقبه بالتوفيق للجميع ...

بن معجل · 07-10-2008, 05:16 PM

شدعوه 5 دخلوا الموضوع ولا وااحد كتب رد !! حتى لو شكرا على الموضوع !! لاتطنشون

مجب البادجي · 07-10-2008, 11:51 PM

الله الموضوع عجبني كثير و بالنسبة انا مغربي يعني ان النعام في افريقيا راح يكون ارخص

بدر ولد أبو بدر · 08-10-2008, 12:48 AM

فكره رائعه ان تثبت وجودك بين اهلك وجمعاتك

واتمنى لك كل خير

بن معجل · 08-10-2008, 04:13 AM

شكرا للمروور ماتقصرون

3esa3 · 08-10-2008, 06:21 AM

هلا ومرحبا اخوي ومشكور على الموضوع , والله يوفقك في مشروعك الجميل...

كان زين عندنا النعام الجوز 60 دينار (تقريبا 780 ريال قطري) احنا عندنا سعر البيضة توصل 500 ريال.

اخوي شخبارك وياهم مع الأكل لاني سمعت إن النعامة الوحدة تاكل خيشة شعير يومياً.

تقبل مروروي

3esa3