تكفون علموني عن الدرة

[مجنون الوفاء]

السلام عليكم ورحمة الله وبركاته

شباب انا حاب اني اشتري فرخ الدرة

بس خايف انها تموت عليه لأني اول مره اربي طير بصفة عامة يعني مبتدئ

بس ماشاء الله المنتدى ما قصر فيني علمني شوي في الببغاوات



وش رايكم اشتريها ولا لا

[honey1992]

وعليكم السلام ورحمة الله وبركاته
اهلا اخوي
شف انا بقولك على حسب خبرتي مع الحيوانات بشكل عام والطيور بشكل خاص
انا ولله الحمد تقدر تقول انو عندي خبره لا بأس بها مع الطيور وبالأخص الفروخ منها يعني دايماً الاقي فروخ عصافير واخذهم عندي فتره واعتني فيهم واطلق سراحهم اذا اعتمدوا على انفسهم
عموما الفروخ لقيتها تتشابه بالتربيه وايا كان نوعها مع اختلاف بسيط من طير لآخر
وبالنسبه للدره انا لساتني شاريه واحد قبل 3 ايام وهذي هي صورته

وانا ماراح اقولك اشتري لك طير وجرب فيه لا
انا بالبدايه بقول لك انو الطير يحتاج الصبر ثم الصبر ثم الصبر هذا اذا كان كبير فما بالك بالفرخ
اذا بتشتريه على اساس انك بتوسع صدرك وماراح تفكر بمعاملتك له فأقولك لا
تربيتهم جدا صعبه من ناحية النظافه والاهتمام بالاكل وتنويعه وابعادهم عن الاطفال والاجواء الغير مناسبه
هذا كله انا جربته وخذ مني الكثييييير من الوقت والجهد
قبل كل شي خذ ببالك انو اجر تربية الحيوان اجر كفالة يتيم
انا نصحتك بشي بسيط ولو قررت تشتري ,, لك طريقة اطعامه وتنويمه كما يلي :
اول شي الفرخ ينام غالبا طول الوقت بس يقوم عشان ياكل وهنا طبعا يكون ممل جدا بس ارجع واقولك الصبر هو اول شي حطه ببالك
يعني لا تحط انو راح بيلعب معك وبتقدر تاخذ وتعطي معه هذا اذا كان كبر فرخي اللي شفته
غير كذا طريقة الاكل راح تلاقي اكثر من موضوع بهالمنتدى الاكثر من رائع حاطين لك طريقة اطعامه انا شخصيا اعطيه سيريلاك وبملعقه صغيره ومجرد ماتقربها راح يفتح فمه وياخذ منك
المويه بإبره طبعا عشان تكون اسهل عليه وانتبه انها تكون بالتنقيط يعني مو دفعه وحده لحد ماهو من نفسه يبعد اذا شبع من الاكل والشرب
والنوم تحط تحته منشفه او تسوي له عش بس المنشفه احسن لأنو فرخ ويبي ظلام ومكان ضيق هو يدخل نفسه فيه
تقدر تطلعه بالشمس بس مو شمس الظهر الحارقه تطلعه بالشمس اوووول ماتشرق لأنها مفيده له جدا
انتبه عليه من الجو البارد والمكيف وتقلب الجو بعد يعني من حار لبارد والعكس
وبس اتمنى اكون افدتك باللي قدرت عليه واتمنى لو قصرت الاخوان يعدلون
وان شاء الله يفيدونك اللي اكثر مني خبره
واعتذر منك عالاطاله
تقبل مروري

[مجنون الوفاء]

الله يعطيك العافية على المعلومات

انا اللي ابي اشتريه اصغر من حقك بشوي وموجود في حراج الرياض وعلى قولة راعي الفروخ يبيله اسبوعين على ما يأكل حبوب

بس حسب علمي انك تربي الدره من صغرها تحبك ( تخاويه ) يعني افضل

وش رايك اشتريه ولا لا

[honey1992]

معلومه صحيحه من صغرته راح يتعود عليك عكس اذا كان كبير
لأنو الطيور البالغه صعب جدددا ترويضها اذا مو مروضه بس وهو صغير ماراح يصير مروض وبس الا بتشوفه مايعرف الا انت ومايفارقك ابدا اذا صرت عنده طول الوقت
توكل على الله اخوي واشتر لك فرخ
انا بعد شريت فرخي من نفس المكان بس نصيحه لك تشتري بنفس عمر طيري لأنو حساس جدا اذا صغير مره
وغير كذا طيري اللي تشوفه سهل تعامله وبدا يقلد صوت القط ويسلم لأني اردد له الصوت وارفع رجله وانا اعطيه الاكل واقوله (سلام) والحين من اقول سلام يرفع رجله
بإختصار ابي اوصل لك انو العمر اللي تشوفه هو الافضل وعمره تقريبا 35 يوم
اعذرني عالاطاله
وموفق اخوي