تدريب البادجى..جديد.

[almariatche]

السلام عليكم و رحمة الله و بركاته
اولا ابداا بالتحية لمشرفى توزو واكتب هذا الموضوع عسي انة ينفع..(تدريب البادجى):
البادجي هو الطائر الإسترالي و المعروف بالوانة الزاهية. البادجي بعكس اعتقاد الكثير من الناس ، ليس عصفور عادي مثل الكناري و غيرها من الطيور المستحيل تدريبها ، لكنه ببغاء صغير و ممكن جدا انه يتعلم كلمات معدودة و لكن في حالات التدريب المكثف و عدم وجد طيور اخري معه .
اذا كنت من محبي البغبغانات و نفسك تشتري واحد لكن اسعارها خيالية بالنسبة لك ، او عندك اطفال نفسهم في طيور و متحبش تبهدل البيت، او بتحب الطيور بس بتخاف من الكبير منها ، يبقي مفيش غير البادجي ينفعك,
البادجي طائر صغير الحجم و ألوانه زاهية و صوته جميل
و يوجد منه انواع منها البادجي العادي و الإنجليزي ( هو نفس النوع و لكن جسمه كبير و اضخم من الإسترالي المعروف ) و يوجد البادجي ابو شوشة ( ريش الراس طويل و عامل زي الشوشة,
مش عايز ادخل في تفاصيل كتير عن الطائر دلوقتي ، خلينا نركز علي التدريب.
اكرر هذه الطريقة ، طريقتي في تدريب طيوري و الحمد لله ،ولكن عليك الصبر فالطيور ليست كبعضها فى الذكاء واستقبال المعلومات.
أولا العمر المناسب عشان تجيب طائر استرالي و تدربه ، هو عمر شهر ، و الطائر صغير و بدأ يأكل لوحده و يعتمد علي نفسه
تجيب الطائر اللي يعجبك و ابتعد عن المريض خالص و اللي عنده نقص في الأملاح و الفيتامينات، الأحسن تشتري الصحي.
اول ما تجيب الطائر سيبه يومين بس و حط له اكل و مية من غير ما تحاول تمسكه ، و خليك معاه اطول وقت ممكن ، امضي وقتك كله امامه و لاحظه و كلمه
في اليوم الثالث:
في الصباح الباكر اول ما يصحي من النوم حيكون جعان و عايز ياكل.... من الليلة اللي قبلها شيل الأكل و المية من عنده
و لما يصحي طلعه برة القفص و شيل القفص من قدامه خالص ، في غرفة تانية عشان ميهربش عليه
و جيب الأكل في ايدك وحط شوية صغيرة و قربها منه ، لو هرب منك ، متمسكهوش بالعافية ، مع ان الطير في العمر ده بيطير بالعافية و بيطير مسافة قصيرة جدا .. مش محتاج تروعه و تخوفه و تمسكه
خلي الاكل قدامه في ايدك و هو حيجي و يأكل منها
الطيور في العمر ده مش بتعرف تشرب لوحدها اوي لدرجة انه يتهيأ لك انه عنده جفاف !
ابقي بلل اصبعك في المية و حطها في الحبوب و خليه يلتقط الحب من اصبعك و لو عايز تشربه ... بلل اصبعك و خليه يلحس المية منه .. حيشرب نقطة او اتنين بالكتير بعد كده ينفض المية و يرفض الشرب ... متغصبش عليه التدريب محتاج الصبر واللة الموفق والمستعان..حيث ان
الطير في العمر ده بيبقي لسه محتاج لحنان الأم و غير متعود علي الحياة بره العش
و كل ما تيجي تشيله حتلاحظ انه بيجري علي الجاكت او اي حته مظلمة في هدومك و يدفس نفسه فيها عشان ينام
خليه ينام و متقلقش عليه ... و خليه يحس بالدفء معك ... بالطريقة دي حيبدأ خطوات ارتباطه بيك و يتعود عليك سريعا
ممكن جدا تخلي الطير طليق في البيت من غير قفص
جيب شجرة زينة مثلا صناعية .... او ترابيزة صغيرة و حط عليها اطباق الأكل و المية بتاعته و الألعاب
هو حيتعود علي المكان و يفضل فيه
و ممكن تشتري استاند البغبغانات و يعيش عليه ، بس لازم تقص له ريش الجناحات عشان ميطيرش بعيد و يتأذي
داوم علي تأكيله من يدك و من و هو صغير حك له رأسه ... الطيور بتحب الحركة دي جدا ... خصوصا لو كانت وحيدة حتلاحظ انه يلفت انتباهك و ينفش ريش وشه و يستني تحك له رأسه
تدريب الإسترالي من عمر شهر يأخد معاك شهر بالضبط ... و بعد كده حتنعم باحلي صديق يجري وراك و يستناك لما ترجع من الشغل عشان تلاعبه و يجري عليك لما تأكل و يخطف الأكل منك.

[باحث في علم الحيوان]

مشكوووووووووووووووووووووووووووور

[منتج بادجي]

مشكوور

[محظوظ]

جزاك الله خير

[ltm-koko]

الله ... اخر سطرين حلوات .. !!!!

عندي بادجي ذكر عمره 5 اشهر تقريبا ... وبعمل نفس اللي قلتو انت .. يعني بيروح على شعري يتخبى بينو وبيشربش الا من اصابعي .. لكنه عايش مع انثى بادجي عمرها تقريبا 7 اشهر .. وبيبقى يلعب معها عادي .. وهي بتكون تلاطف فيه .. يعني زي اللي مش اصغر منها .. !!!
كبر هالبادجي وصار عمره 6 اشهر وبطل يتخبى بين شعري .. ايه السبب يا ترى انو كان يتصرف كالفروخ ...؟؟؟؟؟ وايه السبب اللي خلاه يبطل يتصرف بهالطريقة ؟؟ هل هي الانثى مثلا ؟؟
(ملاحظة : انا جبتو لما كان عمره 5 اشهر , يعني مش كبر عندي من وهو صغير ..)

مع تحياتي .!!!!

[Elham]

تسلم اخوي عالمجهود

بــــــــارك الله فيــــــك

[المحارب الايرلندي]

ماشالله مشكور واصل ابداعك

[hamouda]

أنا عندي سؤال إنت جربت هذي الطريق . عشان أنا لم جربتها لم يبقى معي بل طار و وقف فوق الخزانة و ما حبش ينزل

[almariatche]

ههههه....طبعا ياصديقي لازم في الاول يعمل كدة....انت ممكن تطلعة يطير منك حوالى لمدة يومين او ثلاث لحد مايتعود عليك وتسيبة على المكان اللى وقف علية يستكشف المكان ويتاكد انة امن ....وبعد كدة تبدا تلاطفة وهو واقف فى نفس المكان من غير تهيج لحد ما يقف على صابعك او ممكن لما تلاقية هادى تحملة بلطف وتبدا تقدم لة الطعام .طبعا كل دة مش هيحصل فى يوم او اتنين او اسبوع حتي الكلام دة عاوز شهور وصبر ....موفق انشاء الله ورمضان كريم.

[WORLD OF ANIMAL]

مشكور على الموضوع بس هو مينفعش تدرب بادجى كبير يعنى فى سن الشباب او فى عمر الانتاج انا عارف انه هيكون صعب بس ممكن ولالا ؟؟؟؟؟