اشترك في نشرتنا البريدية ليصلك كل جديد

vision · 09-08-2009, 05:35 PM

بصراحة ياجماعه أنا من دخلت المنتدى تحمست حتى افكر اخذ كل أنواع الطيور<<<خخخ

بس والله دخلت اليوتيوب وقعدت اشوف الطيور "تربية" المهم وأشوف طيور الحب
ماشبعت منهم وانا اطالع ..واحد ورا الثاني

ودخلت المنتدى هنا..على طوووووول

والله وأشوف وحمستوني زيادة<<وبصراحه يعطيكم العافيه

بس أنا أبغى أعرف من وين أقدر أشتري طيور الحب"زغاليل"أو الفراخ حقتهم
لأني أحب أربيه من يوم اهو صغير
هل هو من محلات؟؟؟
والا من ..مثلا سوق الخميس؟؟
ياليت تعطوني محلات في الاحساء أو في الدمام يبيعهم "صغار"وبكم سعرهم تقريباً

وأصلا ..متى يفرخون؟؟
يعطيكم العافيه وأرجو أي واحد يفيدني

aoh500 · 09-08-2009, 06:12 PM

انا شريت طيور الحب من الدمام صغار اعمارهم تقريبا 3 شهور و الان الطيور بيضة

وهذي معلومات عن المحل اللي شريت منه الطيور

اسم المحل : عش الكناري - شارع الخطوط الاربعة - عند ديوان المظالم

اسعار الطيور في محل عش الكناري :

الكاسكو ب 1500

طيور الحب الاخضر ب 350 زوج

ببغاء الصن كنيور 1400 زوج

الدرة ب 600 زوج

الكوكتيل 600 زوج

البادجي ب 250 زوج

و بيبع طائر لوحدة بنصف السعر الموجود

و عندة قطط و غيرة

vision · 09-08-2009, 06:19 PM

يعطيك ألف عافيه أخوي
لكن الطيور المحل اللي تقول لي عنه..أعرفه وكم مره رحت له
أنا أبغى صغار مرة,,,يعني أطعمهم يدوي
بس يعطيك ألف عافيه..ماقصرت حبيبي

vision · 09-08-2009, 10:29 PM

شدعوه شباب ماأدري كم مشاهدة...ورد واحد
يعطيكم الف عافيه
على الاقل قولو ماعندنا شي نساعدك فيه وبس..

كوكاتيله · 09-08-2009, 10:40 PM

أخي الكريم

صعب تلاقي فروخ طيور حب في أماكن الطيور

ولكن ليش ما تأخد لك زوج طيور حب وتختار لونهم على كيفك

وتتركهم ينتجوا وتأخد فروخهم وتأكّلهم يدوي وتدربهم

أو إنك تتفق مع أحد في المنتدى على شراء فروخ طيور حب من عنده

وبالتوفيق

vision · 09-08-2009, 10:47 PM

يعطيج الف عافيه أختي ...والله جاتني فكره زي كذا بس ماأدري

من الحين :يـــــــا شبـــاب اللي عنده فراخ طيور حب ويبغى يبيعهم يراسلني
على :alhosamvip@hotmail.com
يعطيكم العافيه

كوكاتيله · 09-08-2009, 10:57 PM

أخي الكريم

الأفضل أن تضع طلبك في قسم الشراء

وأني بعد يومين إن شاء الله بروح الدمام

أدور لي على مكاو وبسأل لك عن فروخ طيور حب

وإذا لقيت بقول لك

وبالتوفيق

vision · 09-08-2009, 11:14 PM

يعطيك الف عافيه اختي..تعبتك معانا
بس ياليت اعرف متى التفريخ بالضبط ...إذا أحد يعرف

كوكاتيله · 09-08-2009, 11:23 PM

أخي الكريم

إذا تقصد في أي فصل يفرخوا

فالأفضل تتركهم ينتجوا في فصل الشتاء

لأن فصل الصيف يكون التفريخ مهلك لهم

ويجب عليك في فصل الصيف أن تهتم بتغديتهم

حتى ينتجوا لك فروخ بصحة جيدة

وإذا تقصد في أي عمر يفرخوا

فيجب أن يكون عمرهم سنة أو أكثر

وإذا عندك أي سؤال فأني في الخدمة

وبالتوفيق

vision · 10-08-2009, 12:03 AM

والله يعطيك العافيه بصراحه تعبتك معاي<<حتى لو عندي سؤال ماني سائل أحرجتيني

أنا بصراحه قلت شكلها ماهي رادة بس ما شا الله عليك<< كفو

<<صب القهوة

كفيتي ووفيتي أختي

أرجو ماأكون سويت ازعاج لك