تجربتي في شراء الكلب

[sweetkoki2007]

اولا موضوعي ده مش للمحترفين. ده للناس اللي زيي مش بيفهموا في الكلاب وعاوزيين كلب لغرض ما. والموضوع تجربة شخصية ليا ومش نقلاه من حتة
اولا انا قررت اشتري كلب عشان يبقي مع بنتي اللي عندها سنة. واختارنا انا وجوزي نوع الجولدن عشان شوفنا انه انسب نوع للمهام المنزلية. وللأسف مكناش نعرف حد عنده ولدة عشان نشتري منه ولقينا موقع علي النت لبيع اي حاجة ودورنا علي قسم الحيوانات الاليفة واستقرينا علي اعلان وكان السعر 1600جنيه مصري ذكر 45 يوم واتصلنا واتفقت مع الست وقالتلي في التليفون عاوزة انهي لون الفاتح ولا الغامق وقلتلها الغامق طبعا كل ده مشفناش حاجة غير الصور اللي علي النت اللي في الاعلان واتقابلنا في مكان بعيد عن بيتها وشكله كان بعيد عشان كانت جاية بعربية واخدنا الكلب ودفعنا فلوسه وسألتها اذا كان مطعم وفين شهادته قالتلي انه مطعم وهي اللي مطعماه عشان التكلفة
الغلطات:
اولا لازم تشوف الجراوي كلها وتختار منها انت بنفسك ممكن كخطوة اولي انك تحدد ذكر ولا نتاية
ثانيا لازم تشوف الام ولو امكن الاب
ثالثامفيش حاجة اسمها تدفع وتاخد الكلب وتروح لازم تطلع بيه علي دكتور معرفتك مش معرفة البايع عشان تكشف علي الكلب علي حسابك وتتفق مع الراجل ان الكلب يقعد عندك اسبوع للتجربة ولو ظهر عليه مرض انك ترجعهوله وتاخد فلوسك حتي لو يخصم منها نسبة تتفقوا عليه
رابعا يستحسن لو ملكش خبرة سابقة في تربية الجراوي يبقي تجيبوا عنده شهرين او تلاتة لأن اساسا تدريبه مش بيبدأ الا بعد 3 شهور او اربعة
خامسا شهادا التطعيم ثم شهادات التطعيم ثم شهادات التطعيم ومتتنازلش عنها ابدا

اكملكم اللي حصل عشان تعرفوا انا ليه بقول كدة:
اول ماجه اكلناه فراخ مسلوقة نساير من الصدر ومعاه شوية رز وشوربة وزبادي فوجئت انا وجوزي تاني يوم انه بيعمل اسهال اصفر وشوية وقطع اكل مع ترجيع كل ده اخد يومين واكلناه سيريلاك بالتركيبة المتكاملة للاسهال بالعافية ووديناه لدكتور في عيادة قال انها ديدان والمرة اللي بعدها بارفو مع ديدان والتهاب حاد في المعدة وقعده علي المحاليل حوالي عشر دقايق بالظبط وراح شايله واداه مجموعة حقن كان جوزي هو اللي بيديهاله وفضلنا علي الحال ده اسبوعين كل 3 ايام يحطه علي المحاليل عشر دقايق لغايت اخر يوم كان بيتنفس بصعوبة وحشرجة ولسانه ولثتة كانوا بيض زي التلج وكنا بنقول مش هيطلع عليه صبح وقررنا نوديه مستشفي كبيرة مشهورة لكن مش خاص ولا حكومي كأخر اجراء نعمله عشان نخلص ذمتنا قدام ربنا المهم رحنا المستشفي وكنا يائسين جدا وكشفوا عليه قالوا ديدان وبارفو والديدان جاية من الام وحطوله 3 انواع محاليل قعدنا عليهم مدة ساعة عشان نخلص الكمية المقررة وكمان حقن للترجيع وماخدش حاجة للاسهال عشان الديدان تنزل مع دوا لالتهاب المعدة ودوا بيطري للديدان وكان المفروض نروح اليومين اللي بعدهم عشان نكمل المحاليل ومنضغطش عليه في اكل بالعافية. المفاجأة اننا واحنا مروحين ابتدي يفوق وعينه تفتح ولسانه يورد لكنه ماحمرش قوي ولثته لسة بيضا ولما روحنا نام جامد وصحي بليل نبح وطلب اكل لكن مأكلش كتير وكملنا العلاج وخف لكنه لسة بنعاني من الديدان لغايت دلوقتي.
انا ليه بكتب الكلام ده؟؟
اولا عشان اقولكم متسترخصوش تمن كلب يكون من غير اي ضمانات عشان اولا هتتعذبوا زينا. احنا مكناش بنام غير تعب الاعصاب والانهيار اللي كان في البيت بسبب اننا كنا بنشوفه بيطلع في الروح قدامنا واحنا مش عارفين نعمله حاجة وثانيا اللي احنا صرفناه لغايت ما بقي كويس حوالي 500 جنيه او اكتر وكان تقريبا تمن الكلب اللي معاه ضمانات. يعني كنا ريحنا روحنا من الاول
انا عرفت المنتدي ده من جوجل وقت ما كنت بدور عشان اشتري الكلب ومش عاوزة الناس اللي ميعرفوش زيي يدوخوا دوختي
واخيرا اشكركم علي سعة صدركم وقرايتكم للرغي الكتير ده وارجوا دعواتكم لبنتي وجوزي وبيتي

[الهولي]

صحيح كلامك المفروض ان الواحد قبل الشراء يتأكد

من شهادات التطعيم لانه مهمه جداً وتكون من عيادة معروفة برضو

هو صحيح الواحد او البايع مابيعرف ويمكن ماله ذنب بالي حصل

لان اكثر الجراء الي اخذت التطعيم ممكن اخذه بشكل غلط او تطعيم فاسد او سوء تخزين و و

دائم الواحد يروح الى مكان او نادي معروف افضل تحت اشراف خبراء

اضمن وان شاءالله خير

بالتوفيق

[sweetkoki2007]

اشكرك اخ هولي علي مرورك الكريم لكني لم الوم البايع مطلقا ولكن عندنا في مصر مثل بلدي شهير هو بين البايع والشاري يفتح الله وبرضه مثل تاني اللي مايشتري يتفرج بمعني ان البايع املي شروطه لاتمام البيعة وانا لجهلي بالامر لم اناقشه او او املي بشروطي كمان لم " اتفرج" كفاية علي الطبيعة وكل معاملاتي كانت علي النت وكانت هذه اخطائي الاساسية واحاول توعية غيري ممن هم في مثل معرفتي الضئيلة بالموضوع
تخيل بعد الشر انك شايف كائن بيطلع في الروح بمعني الكلمة حرفيا مدة اسبوعين وانت مش عارف تعمله حاجة لدرجة اني كنت بدعي ربنا انه ياخده عشان يرحمه من العذاب اللي هو فيه ده ليأسي من امكانية شفاءه. ربنا ما يحط حد ابدا في هذا الموقف الصعب ويحفظكم ويحفظ كلابكم لانها نفس وتستحق منا الرحمة والاهتمام

[Yuna Braska]

كلام سليم ومنطقي 100 % ومعك حق بكل كلمة
مشكلتك كانت صعبة صديقتي والحمدلله ألف الحمد له انها مرقت على خير
يلله هاد درس ما بيتكرر عند المرة الجاي
ابقي صوريلنا التوتو الجديد وخلينا نتونس بيه ههههه
وان شاء الله بيعيش بينكم لعمر طويل وما بيعذبكم
تقبلي مروري ^_^

[sweetkoki2007]

اشكر مرورك الكريمyuna barska

[الـــــــرازم]

شكرا على الطرح والدعم والتذكير بارك الله فيك