مشكلة كريات الشعر Hairball وعلاجها ... مجرب

[CaTTy]

السلام عليكم ورحمة الله وبركاته

بعد غياب طويل بالنسبة لمواضيعي بالقسم

رجعت ومعاي موضوع فررررش

وبصراحه محد فاضي يفرفر ب100 صفحه يدور المواضيع قبل لا يكتب شي عشان يتفادى التكرار

انا استخدمت خاصية البحث وحطيت جم كلمة تدل على الموضوع وما طلعلي أي موضوع عن كريات الشعر او الـ Hairball

واتمنى ما يكون مكرر بس لو طلع مكرر شنسوي بعد


المهم

الموضوع عبارة عن مشكلة تكتل الشعر بالنسبه للقطط لما تلعق نفسها وتبلع الشعر ويسبب تقيؤ وهذا خصوصا بعد الوجبات تتقيأ فهذي اعراض تكتل الشعر داخل المعدة لانه ماراح ينهضم ...
وممكن يسبب بعد امساك .. قلة نشاط القطة ..

وبعد اللي انا اكتشفته من استعمالي له انه ينفع لتكتل الشعر خارجيا يحمي القطه من هالشي
جربته على فطريه وعتريس لانه كان يتسفط شعورهم من كثر لحسهم لروحهم ... عتريس ما يحبه وما كنت اغصبه عليه .. فطريه تمووووت عليه يعجبها طعمه وكنت اعطيها ... النتيجه انه عتريس ظلت تطلع فيه التكتلات اما فطريه ولله الحمد صار شعرها حلوو ومافيه اي تكتلات



شكل المنتج






وهذا اللي انا سبق واستعملته ولازلت استعمله بعد

واهو بنكهة الـ malt واللي ماعرف شنو يعني بالعربي






هذا بنكهة السلمون بس ما شفته ولا جربته اعتقد بس الازرق اللي متوفر بالكويت






للمعلومية يستعمل للقطط الصغيره والبالغه


طريقة الاستعمال :


للقطط البالغة :

تعطى لعقه وحده منه لانه هو عصار او اذا القط رفض يتم وضع مقدار انش ( شويه يعني ) على يد القطو واهو راح يلعق ايده لان القطط ماتحب يكون على يادها شي دبق ... بين الوجبات للقطط اللي فيها هالحاله كل يوم مره وحده او مرتين الى ان تختفي الاعراض ...

وبعدين يتم اعطائها مرتين بالاسبوع او مره بس


للـ kittens ( القطط الصغيرة فوق الاربع اسابيع ) :

تعطى مقدار نص انش .. يعني نص الكميه اللي تعطونها للكبار

مره بالاسبوع او مرتين ..

[!شاربه بيبسى ومدلعه نفسى!]

مشكوره على الموضوع الجميل

[شحفان القطو]

شكرااااااااااااااااااااااااااااااااااااااا كثييييييييييييييييييييييييييييييييرا

[Lonely Hunter]

انا كل اسمع عن الهير بول بس ولا مره شفت قطوتي اطلع وحده !!

مع انها عندي من 4 اشهر


و على فكره ...malt= شعيرو يعطيج العافيه على هالموضوع ^^

[خيال القطط]

شكراً يا أختي على الموضوع الجميل والمفيد

صراحتاً ما كنت أعرف هذي المعلومه لولاكي

وأنا دايماً أشوف لولو ووسيم يلحسون جسمهم وبعض الأحيان يبلعون شوي من شعرهم

وهذا يبين سبب استفراغ وسيم ليلة الأمس

بس عندي سؤال هذا المنتج يمباع في السبرماركات

وشكراً

تقبلي مروري

[رعوود]

الف شكر اختي كاتي عالموضوع المفيد للكل وخصوصا الي قططهم تعاني من تكتلات الشعر



بالنسب لي

لورد عنده هالمشكلة

لكن كويني الحمدلله مافيها شي



وعلى فكرة الي ما يحصل هالمنتج يقدر يعطيهم خضار


لانه الخضار يساعد على انه القط يخرج كريات الشعر

[CaTTy]

الله يسلمكم ويخليكم يارب

<<< مشكور لونلي هانتر ع المعلومه كنت جاكه انه شعير بس خفت اقولها وتكون غلط


>>>> خيال القطط .. ايه متوفر .. انا اول مره شريته من صيديله بيطريه كنت ابي فيتامين لوحده من قطاوتي لانها ضعيفه وماتاكل عدل .. قال هذا يساعدها قلت اخاف ماتحبه ولا تاكل منه قال بالعكس طعمه حيل طيب وراح تحبه وشريته ... بعدين رحت ذاك اليوم بمركز سلطان ( سوبرماركت ) ولقيته بالصدفه وجذي كان ماكو شغل قريت اللي عليه من ورا وطلع بالاساس حق تكتل الشعر واكتشفت عاد من سالفة فطريه وعتريس معاه قبل شلون كانت النتايج


<<<< رعود .. تسلم على التعقيب وما قصرت بس الخضار مو كلها زينه للقطط وبعدين بعضهم ما يحبونها ومستحيل تقدر تغصبهم حتى لو حاولت تخلطها لهم مع اكلهم عنيدين

[القطة المشمشية]

شكرا على المنتج
ممكن نلاقيه فى مصر......!؟

[الساحر77]

يسلمو على الموضوع

[CaTTy]

<<< القطه المشمشيه اتوقع موجود ... دامه متوفر بالصيدليات البيطريه وبالسوبرماركت ليش مايكون موجود بمصر


اخذي بس اسمه


ترى نفسه بالضبط الازرق ياللي استعمله انا


>>>> الساحر ... الله يسلمك