اشترك في نشرتنا البريدية ليصلك كل جديد

شاعرالدمعه · 25-10-2010, 06:41 PM

السلام عليكم ورحمة الله وبركاته

تحية طيبة للجميع

اتمنى ان تاخذوا موضوعي بمنتهى الجدية لانه مهم جدا

قبل اربع شهور اشتريت توته وكان عمرها 4 شعور من سوق في ابوظبي استانست عليها انا وبناتي وايد وتعلقت فيها وعلمتها وخليتها اليفة جدا ولو ترجعون لمواضيعي بتشوفون صورها ومقاطع لها

المشكلة اني اللي ما كنت اعرفها انها كانت فيها بكتريا المرض الخطير اللي يقضي على الببغاوات الافريقية بشكل عام والرمادي بشكل خاص وخاصة لو كان عمر الببغاء اقل عن سنه بدت الاعراض تظهر في توته من 3 اسابيع خمول فقدان الشهية وبدات متثاقله بمعنى ضعف في قوائمها وديتها العيادة المتخصصه بالببغاوات وخبرني الدكتور ان لازم يسوي فحص دم والمركز الوحيد اللي ممكن يكتشف هالمرض موجود في افريقيا الجنوبية يعني يرسل العينه هناك بالبريد السريع وتظهر النتايج بعد اسبوع وللاسف ظهر ان توته مصابه بهالمرض

المرض اسمه

داء المنقار والريش واسمه العلمي هو

Psittacine Beak and Feather Disease
PBFD

وممكن تبحثوا في قوقل وبتحصلوا كل المعلومات عنه

وبحط نبذه عنه في اخر موضوعي اقتبسته من احد الاخوان في هذا المنتدى عرضه عليكم في 2006

واتمنى انكم تقرئونه كامل للي يحب الببغاوات

المهم ان هالمرض ما له علاج وان ما زال البحث جاري عن مضاد لهذا المرض للان

صدقوني انا قلبي تقطع وانا اشاهد توته تلفض انفاسها امامي ولكن الحمدلله على كل حال انا اعرف اني ما قصرت واني حاولت بكل جهدي اني اعالجها وخسر كثير ولكن ما قدر الله وما شاء فعل وراضي بحكم وقضائه وقدره

النقطة المهمه اللي انصحها لكل اخواني في هذا المنتدى ان امس اتصلت بأبكبر مركز طبي للطيور ومتخصص في الببغاوت مقره في دبي بدون ذكر اسمه كلمت البرفيسور وخبرته عن اللي صار لي قالي ان للاسف هالمرض منتشر بشكل خاص في الجزيرة العربية واغلب الببغاوات المستورده من افريقيا فيها هذا للمرض وخاصة اللي عمرها اقل من سنه ولكن خامد ومحد يقدر يعرف اصابة الطائر الا بفحص الدم الخاص بهالمرض ونصحني اني ما اخذ ببغاء افريقي من اسواق والمحلات وخاصة ان كان عمره اقل من سنه لان المرض معدي واغلب الببغاوات اللي جت مركزه لقت حتفها ويعدي جميع الطيور ونصحني اني انتظر او ان ابحث عن كاسكوا يكون رابي في بيت وعمره اكثر عن سنه ونص لان مناعته تكون اقوى وحتى لو اصابه المرض ما بيقضي عليه بسرعة مثل اللي عمره صغير لان مناعته ضعيفة وانا الحينه قاعد ابحث عن ببغاء كاسكو او امزوني يكون رابي بمنزل وصاحبة يبي يبيعه.

نصيحة للكل اتمنى انكم تاخذونها بعين الاعتبار اللي يبي يشتري اي ببغاء وخاصة الافريقي قبل لياخذه يشترط على راعي المحل او البائع انه بيفحصه قبل اتمام البيع عشان ما يمر باللي انا مريته وعانيته وما يشاهد ببغائه يموت قدام عينه ويتقطع قلبه مثل ما صار لي

ربي يحفظكم ويحفظ ببغاواتكم من الشر

وبخصوص المرض واللي يبي يعرف عنه اكثر يفتح هالرابط ويقرأ بكل روية عنه

http://www.2zoo.com/vb/showthread.php?t=13054

تحياتي لكم ودمتم بود

اخوكم

شاعرالدمعه