الكلاب الأرمنت

[فخر الدين]

مشكور اخي a_fkry والصوره فعلا هي الصورة التي تفضلت بوضعها وهذا فعلا الكلب الارمنت الذي اعرفه وباقي الوانه الاسود والرمادي ودرجة الهافان من البني .

[dahy]

يا جماعه الكلب ده مش ارمنت خالص
ولا صوره من الصور اللي اتخطت صوره لكلب الارمنت
الكلب الارمنت حجمه وشكله لايتدعي شكل وحجم الكلب البلدي
فهو صغير الحجم يشبه كلب الدنغ من حيث الملامح
لونه رمادي واصفر واسود
كلب شرس جدا غبي جدا
من اضعف الكلاب في حسة البصر
وهذا سبب شراسته الكبيره
يعتمد في ادراكه علي السمع والشم
لذلك اقل شئ يوثر عليه فيصير شرسا
خفيف الجسم شعره قصير
انا هاحاول اجيبلكم صورته هاصورهلكم من اي مكان لبيع الكلاب بيبقي في منه كتير في سوق الجمعه في مصر لوحد بينزل هناك هيلاقي منه
لكن الصور اللي محطوطه دي tibetan terrier غالبا

[a_fkry]

اخى ضاحى هى دى صورة الكلب الأرمنت وشعرة طويل جدا وجسمة كبير لكن الى انت بتتكلم عليةممكن يكون هجين وعلى فكرة الكلب الأرمنت مش بلدى او اسمة ارمنت هو سلالة عالمية بس المشكلة فى مصر ان فية ناس احتفظت بالسلالة الأصيلة ولم تهجنها مع اى انواع اما اى نوع خلاف هذة الصورة فليس ارمنت

[فخر الدين]

اخوتي في الله

اخي ضاحي انا اخر مره شفت فيها كلب ارمنت في سوق الجمعه في القاهره كانت من اكتر من اربع سنين وصاحبه ماباعهوش لاسباب كتيره جدا منها لقله خبره الناس بالكلب الارمنت ومعرفه شكله الاصلي فما كان منهم الا ان بخسوا الكلب ثمنه علاوه على ان سوق الجمعه مافيهوش غواه بل تجار على حراميه على نصابين وظيفتهم ينصبوا على خلق الله من الراغبين في شراء كلب وانا اعرف كل هؤلاء بالاسم وقلما تجد غاوي ينزل السوق انما كلهم عاملين نفسهم غواه الغواه الحقيقيين اللي كانوا موجودين الله يرحمهم .

الكلب الارمنت ليس له اي علاقه لا من قريب او من بعيد بكلب الدينجو لا في شكل الجسم ولا الشعر ولا الاذن ولا الجمجمه ولا الزيل ولا اي شئ ووجه الشبه الوحيد بينهم هو انهم كلاب .



الكلب الارمنت انا متفق مع اخي a_fkry انه اقرب شبها للكلب الابيض بالصوره بنفس تربيعة وجهه وشنبه وشعره المميز وانا شخصيا رايت كلاب ارمنت كثير جدا وكما ذكرت من قبل اعرف اماكن تواجدها جيدا ويحضرني اسم صلاح صالح في مدينة كفر شكر بعد بنها على طريق المنصوره الزراعي من اشهر الغواه لهذا الكلب ويوجد في نفس هذه البلده الصغيره اكثر من غاوي متخصص لنفس هذا النوع من الكلاب وللعلم موضوع نظره الضعيف وانه لا يرى في الظلام وممكن يعض صاحبه المزارع البسيط لو خرج من بيته بالليل كلها اشاعات اطلقها الفلاحون عندنا للتدليل على شراسه هذا النوع وبالتاكيد اسمه مش ارمنت لان ارمنت اسم المدينه اللتي جاء منها كما ذكرت سابقا عندما نزلت الحمله الفرنسيه واضربت في ارمنت كلها معلومات تاريخيه سليمه وموثقه ايضا .


نهايه الكلام انه كلب غير مسجل هنا في مصر والاقرب شبها منه هو البوينتينج جريفون الكبير Griffon الفرنسي واعتقد ايضا انه هو اعتقاد كبير جدا جدا نظرا لان الارمنت جاء مع الحمله الفرنسيه وان الجيانت جريفون هو كربون من الكلب الارمنت وموطنه ايضا فرنسا.
وه>ه صوره .

[dahy]

اخي العزيز
فخر الدين انا عارف ان سوق الجمعه كله نصابين
وانا اقدر اسمعلك اساميهم بالاسم
انا تقريبا اعرف كل التجار اللي بيقفو علي السلاكات
وعم عصام وعم صلاح اللي بيقفو علي الباب بره
وكلهم حاولو يطلعو عليا مصالح علشان الكلب بتاعي
وعارف كمان ان في كلاب كتير هناك مخلطه
بس موضوع ضعف نظر الكلب دي انا جيبتها من موقع عن الكلاب تقريبا دوج بلاسيس
مش فاكر بالظبط مش اشاعه مطلعها الفلاحين
انا عندي صوره لكلب ارمنت بس هو شكله مش واضح قوي فيها الصوره دي من حمله استكشافيه في مدينة قنا لدراسة الاثار واذ1 بكلب ارمنت بيلعب مع المصور فصوره
الصوره مش واضحه قوي وكمان الكلب باين في الصوره انه شعره طويل

وانا اوعدك انا اتفقت مع ناس اني هاروح مزرعه في سقاره وهاجيبلكم صوره للكلب من هناك

[فخر الدين]

اخي ضاحي اخر كلام عندي قلته وانا اقسم بالله ومره كمان اقسم بالله وده مش تحدي لا سمح الله لاني واثق انك غاوي وغاوي مجتهد كمان لكن واضح انه عندك بس معلومات خطا عرفتها عن كلب انا على ثقه من معرفتي بيه ورايته الاف المرات واعرف مزارع كامله يا اخي بتربيه وذكرت اماكنها واخر حاجه عندي لو عايز تتفرج عليه على الطبيعه تروح على العنوان ده 133 شارع النزهه بجوار بنك مصر ميدان سانت فاتيما .
اسال عن محل نجيب للحيوانات وهوا داخل شقه في دور ارضي بعماره ادخل اتفرج على ارمنت اصلي هناك ومصدره احدى المزارع اللي ذكرتها من قبل في مشاركاتي وحتلاقيه نفس الكلب الاسود اللي في الصوره اما الكلب اللي في الصوره بتاعتك انت الاصفر ده فلا يمت للارمنت بصله وان كان شعره طويل سنه فبردو مش شرط ولا في اللون ده اصلا في الارمنت .
ويا اخي لابد ان تعلم ان مش كل كلب في مدينه قنا ماشي في الشارع نوعه ارمنت الارمنت ناس قليله جدا في قنا احتفظت بيه وكترت من سلالته واكبر مزارع له مش في قنا بل في الوجه البحري من اول مدينه كفر شكر بعد بنها .

واكتر من كده كلام تاني مش حكتب والا حيبقى اسمها سفسطه .

لك احترامي وتحياتي اخي ضاحي .

اخوك فخر الدين

[dahy]

اخي فخر الدين
انا هاتاكد من الكلب اللي انت حطيت صورته ولكن لو الكلب اللي انت حاطه هو الارمنت ياريت تقولي اسمه بالغه الانجليزيه علشان اعرف اجيب صوره وتاني حجاه
ياريت توضحلي ليه المواقع الاجنبيه مش حاطه صور للكلب الارمنت رغم ان الكلب اللي انت حاطه انا وشفتله صور قبل كدا
ياريت توضحلي واتمني اني اكون غلطان علشان استفيد من انسان محترم مثلك
وعلي فكره داهي مش ضاحي
وياريت تقولي لو هو ده الكلب الارمنت اللي نابليون جابه الي مصر وانقلبت المركبه وكل ده
الكلب ده يستخدم ككلب للحرب او للحراسه
لان شايف ان شكله اليف قوي عن انه يكون للحراسه

[هوسكي]

اي ولاه

[klopl]

يا جماعة انى ربيت الارمنت من قبل لكني لم اصوره و انا فى مصر وهذه صوره له ولقد وضعتها من قبل ان اعرف انها ليست واضحه ولكن هذا هو الارمنت وهى ما استطعت ان اجده على الانترنت ولا احد ان يشكك الا اذا كان متاكد فأنا اعرفه جيدا وشكرا

[dahy]

الصوره دي يا جماعه قريبه جدا من الارمنت فعلا
بس برده يا جماعه عايزين تاكيد
انا اللي اعرفه ان الارمنت ممكن فعلا يكون زي ما حطه اخوي فخر الدين
ده في هولندا وفي فرنسا بس ده الاصل مش الارمنت اللي موجود في مصر
الارمنت ممكن يكون فعلا المركبه بتاعت نابليون وكل الكلام ده الكلب اللي فخر الدين حطه يكون هو اللي كان فيها لكن ما اسموش ارمنت
الارمنت هي السلاله اللي ظهرت في مصر
السلاله اللي اطلق عليها الارمنت ولو لاحظتم الصوره اللي انا حاططها فيها شبه كبير من تعلب او الديب المصري
وان كان الشعر يميل للكلب اللي حط فخر الدين صورته فممكن تكون الصوره اللي حطها فخر الدين تكون هي اصل السلاله
بس مش الارمنت الارمنت اللي انا اعرفه انا حطيت صورته وتكرم الاخ كلوبل بوضع صوره ليه ايضا
انا ما بقلش ان الصوره اللي انا حططها لكلب ارمنت فعلا انا بقول هي اثرب صوره لقيتها للارمنت بس شعره طويل شويه
ياريت اي واحد عنده معلومه عن الموضوع ده يقولهلنا
لان انا وانا ببحث عن الكلب الارمنت في النت كل المواقع الاجنبيه عايزه صور ليه فلو رسينا علي حل واتفقنا واقتنعنا سواء كان ده او ده
انا هابعتلهم الصور بعد ما احطلهم عليها توقيع موقع توزو علشان نبقي معلمين عليهم
ياريت نقدر نتوصل لنتيجه بسرعه
انا للاسف في الفتره دي مشغول شويه فمش فاضي اني انزل اي مزرعه او اي مكان اصور الكلب الارمنت
وربنا يكرمك جميعا