خبراء الامزني يلوناب

[aliodmak]

السلام عليكم ورحمه الله وبركاته

قبل يومين اشتريت يلوناب .... وما عندي الحقيقة ذيك الخبره في الامزونيات ... وكنت ابي فزعتكم في عدة استفسارات ..
الاول : من الحجله الي على رجل الطير هل من الممكن معرفة عمر الطائر بدقة ؟ وهي كتالي (651K PT 15 AVES 45 14 ) الرقم الاحمر 14 كان بالعرض والمعروف انه سنة الانتاج .... لكن ماذا تعني باقي الارقام والحروف ؟اليكم بعض الصور للتوضيح . ايضا صوره للعين اذا كان من الممكن تحديد العمر منها . للعلم حراشف الاقدام ناعمة وممتالئة . وطريقة مشمشاه كأنه بطريق .(على خفيف)

الثاني : اذا كان صغير في السن هل يختلف - اعزكم الله - فضلاته عن الكبير .. لانني اشوف فيه شويه سيوله ليس الكل ولكن بعض الوقت بنسبة 40 % من عدد المرات .. يكون سائل كاملاً ؟ (اخوكم متعود على الكاسكو ).
الثالث : في اخر ذيل الطير يوجد تقصف في الريش ..! وصاحبه السابق يقولي الطير حار .؟ وانا ماني فاهم وش يقصد ؟ هل من الممكن يكون فيه مشكله عنده . ارفقت لكم صورة .
اسئل الله ان يجعلها في موازين حسناتكم .

[blue y]

ماشاء الله الطير باقي فرخ وحجله ١٤ يعني سنة الانتاج وباقي الحروف خاصة للمزرعه وقفص التفقيص الله يبارك لك فيه ويعني حار يعني يبي الملقن

[aliodmak]

طيب كيف اوصل للمزرعة الي انتجت الطير .

[تركي111]

ماشاءالله ومبرؤؤك الببغاء .......التقصف طبيعي توه فرخ
وبالنسبة للارقام ماعليك منها اهم شي صحة الببغاء وعمره توه صغير...ومزرعة الانتاج مب شرط لان ع كلامك مالك خبرة عليك بالمحافظة ع الببغاء وتلقيينه الكلام .


ربي يوففك

[aliodmak]

الله يبارك فيك اخوي تركي111 ومشكور على النصايح .... والله يوفقك يالغالي

[BIN ABDUL AZIZ]

الله يبارك لك في الطير اخوي

بالنسبة للحجل واضح انه فاقس في ٢٠١٤ لكن لو حبيت تستوضح اكثر تقدر تطلب شهادة السايتس من اللي شرته يمكن يكون مكتوب فيه اليوم و الشهر لكن تأكد ان مكتوب فيه صنف الطير Yellow Naped Amazon

اما ما يخص الريش هذا بسبب القفص اللي كان فيه ، اذا القفص كان صغير تلاقي الذيل منتوف اكثر ، نصيحة خذ له قفص اكبر احسن له و لنفسيته و ضروري توفر له ألعاب معلقه و احبال يتعلق عليها للعب .


و بما انك جديد على الامازون فنصيحة في اول شهرين خله يآكل من يدك اكثر شيء و يتعرف على كل المحيطين به ، فترة النوم ضرورية و الهدوء ضروري له وقت النوم و كذلك الظلام .

الطعام خله منوع خلال الاسبوع : Versele-Laga و ZuPreem شركتين فوق الممتازين و انصح بقوة بتنويع الاكل منهم ، بالإضافة ليومين في الاسبوع تعطيه خضار و فواكه

من عشرتي لليلوناب : كلما خليت حياته سعيده تلاقيه يعطيك اكثر و اكثر ، شخصيته المغرورة و اعتزازه بنفسه جميله جداً ، يحب النظافه و راح يحبك اكثر لو خليت بيئته نظيفه ، اليلوناب يحس بصاحبه و يتعاطف معاه بمجرد ما يضغط بمنقاره بشكل خفيف على اصابع صاحبه ، يحب يشارك صاحبه في الاكل و التنقل ، اذا غار يكتمها في نفسه.

[aliodmak]

BIN ABDUL AZIZ الله لا يحرمنا منك ومن نصائحك .. كل الود والعرفان.