●|[ حُصرياً : عَثْ الْثَعآبَيْن أوْ الُزوآحِفْ [ Snakes Mites ] ]|●

[|| PyTHoN ||]

بسم الله الرحمن الرحيم





شفت بالمنتدى مافي مواضيع تتكلم عن الـ Mites
بإختصار شنو اهي الـ Mites أو ما نسميها العثه او القراد ، تتغذى على دم الزواحف و خصوصاً الحيايه ، فيعني تأثر على الحيه ، في الطبيعه لما يصعدون عليها هالحشرات ما تتمسك عليها عدل بسبب ان الحيه تسبح بالماي وايد و تتحكك فما راح يكونون بعدد كبير ولو ان ممكن يكون بعدد كبير .
لكن عندنا بالتربيه بتلاقي العدد كبير و لدرجة انك تمسكها و بتشوفهم يمشون عالإيد ، طبعاً التخلص منهم صعب لكن لو اهتميت سهل ، ممكن انك تستخدم أدويه و مواد خاصه بالزاحف لكن ماهي متوافره عندنا ، و درجات الحراره العاليه أو المنخفضه أو المواد و الأدويه الي تموت هالحشرات نفسها تموت الزاحف الي عندك ، لهالسبب فالأفضل شغل طبيعي بدون لا مواد ولا أدويه =)



وين نشوفهم ؟

أكثر وقت بتلاحظهم و بتشوفهم هو وقت الأكل ، مهم انك تركز عدل عليها لأن الجلد يتمدد و بتشوف الي تحت الحراشف ، يعيشون القراد تحت الحراشف و عند فتحة الشرج و العين ، و طبعاً اهم شي ما تتهاون مع الموضوع حتى لو انك شفت وحده فقط او ثنتين ، راح يتضاعفون معاك للميات إذا مو اكثر ، شغله ثانيه بتلاحظ الحيه بغير عادتها ، بتقعد بالماي مده و بتلاحظهم يكونون بالماي و على الأطراف الناشفه ، و ممكن مثل ما قلت و انت تمسكها تلقاهم على إيدك .



و لو شفناهم شالعلاج ؟

أول شي تشيل الي بالحوض كله ، أياً كان الي فارشه للحوض و تنظف الحوض كامل و تتأكد من نظافته و تفرشه بكلنكسات المطبخ " المناديل " و تحط ماعون ماي كبير و كافي ان الحيه تسبح فيه .
الشي الثاني ، تمسك الحيه و تروح تحطها بمكان فيه ماي و يغطي جسمها كله ( عميق ) و تخليها فيه ربع ساعه ، تطلعها و بسرعه تمصعها من فوق لتحت ، يعني كأنكم ماسكين شي و تمسحونه من فوق لي تحت و نظفو راسها و صوب فتحة الشرج ، و رجعوها مره ثانيه بالماي بعد ما تغيرونه و تسوونها مرتين و حطوها بالحوض .
بتلاحظون انها حتى من نفسها بتروح تدخل بالماي و تقعد ، و لو تقدر أكثر من مره باليوم يكون أفضل =)



و شكثر نستمر على هالحال ؟

تستمرون على الحال هذا عادةً 4 - 5 أيام ، لكن إن شفتو انهم ما راحو استمرو أكثر إلى ان تشوفونهم مو موجودين نهائياً



من وين يطلعون ؟

أول شي ممكن انك يبت حيه ثانيه و ينتقلون بما بينهم ، يفضل اي حيه ثانيه تبقى بروحها لحد ما تتأكد منها ، شي ثاني ، ممكن انها تكون على الشي الي تاكله الحيه ، أياً كان الفار او الأرنب ، و وقت ما اهي تبلع يصعد عليها ، فينصح الأكل ما يكون بحوضها ( فرضاً الحشره نزلت بالحوض و تكاثر فيه او صعدت عالحيه علطول ) و بعد الأكل بيومين تسبحونها ( ممكن و إهي تبلع صعدت عليها ) و تتأكدون ان مافيها شي و ترجعونها .

عموماً انتو أساساً تقدرون تضيفون أشياء مثل ما قلت عشان تقتلهم ، و من الأشياء المتوافره بالصيدليات أسمه " بيتادين " ممكن إنكم تضيفونه للماي الي اهي تتسبح فيه ، لكن الماي وحده يقوم بالواجب =)



و هذي جم صوره للتوضيح ,,









أتمنى عجبكم الموضوع و السلام خير ختام =)

حصرياً على 2Zoo
|| PyTHoN || ©