لكل الى عايز يشترى حوض وعايز يعرف هتكلف اد ايه يدخل هنا

[c desha]

صباح الخير

حبيت اعمل موضوع مفصل عن ايه المطلوب لعمل حوض سمك جميل + سعر او التكلفه يعني

======================
نبتدي بقي

الأدوات و الأجهزه المطلوبه :

1. طبعا حوض و في نوعين من الأحواض

في الأحواض الصيني
و دي مميزاتها انها شكلها رائع و مادتها حلوه مش قابله للكسر بشكل كبير زي الزجاج الانه من الألياف و كمان اجهزتها معاها يعني الفلتر و الأضائه

عيوبها : غاليه و سهله الخدش

صوره ليها

اسعارها بالتقريب :

ال 100 سم = 900 جنيه تقريبا

حوض

==============================


===============================
صوره اخري للحوض مع الاستاند الخاص به



================================
طبعا شكل الأحواض فوق رائع

================================

و النوع التاني الأحواض الزجاج ( العموله المصري )

و دي مميزاتها : رخيصه بالنسبه الاحواض الصيني و كمان الزجاج صعب الخدش

عيوبها : الكسر و اللزق السليكون ممكن يسرب

بس لو معمول عند واحد بتاع ازاز كويس هيعملهولك حلو

بالنسبه للسعر :

الحوض ال 60 سم اقصي حد ليه 60 جنيه

الحوض ال 80 سم اقصي حد ليه 80 جنيه

و الحوض ال 100 سم اقصي حد ليه 90 جنيه

و طبعا الأسعار دي بتختلف من مكان لمكان و كمان في مقاسات اكبر بس دي المقاسات الأكثر شعبيه

=============

2. فلتر لتنقيه المياه

و بيختلف كل فلتر في القوه

يعني لو عندك حوض 60 سم فلتر 8 وات او اققل مناسب جدا

لو حوض 80 سم فلتر 11 او 8 وات مناسب

لو حوض 100 او 120 سم فلتر 18 وات حلو جدا

ملحوظه : ياريت اللي يجيب فلتر ميجيبوش اقوي من حجم الحوض يعني مثلا محدش يبقي عنده حوض 60 سم يجيب فلتر 18 وات هيموتله السمك الأنه بيبقي قوي جدا علي السمك


صور من الفلتر :

فلتر بايو 8 وات غرفه واحده سعره 25 جنيه بالكتير
================

===================
فلتر بايو 8 وات 3 غرف سعره 35 جنيه



===================
فلتر بايو 13 وات مميز جدا غرفه واحده 40 جنيه



جميع الأسعار اعلاها تقربيه و بتختلف من مكان لمكان
==========================

طبعا في ناس هتسئل مش معنا بايو

في وجه نظري الأقوي و الأفضل في الاداء فلاتر بايو


===========================
3. مضخه اكسجين

في ناس كتير فاكره ان مضخه الأكسجين بتضخ الأكسجين في الميه بس ده غلط اللي بيحصل ان لما بنوصل المضخه بالسكريه بتعمل فقاقيع و دي بتعمل علي ازابه الهواء اللي موجود في الحوض في الميه و كمان بتعمل السكريه علي تقليب ميه الحوض

طبعا انا بفضل المضخات الصامته صحيح غاليه عن التانيه بس مش هتلاقي ازعاج منها زي المضخات العاديه

بالنسبه الانواع انا بفضل الأنواع شركه بايو برضه

و دي صور من المضخات الصامته
======================
دي مضخه اسمها
Bat man silent air pump

نوع المضخه S-2000A و المضخه دي بروحين

السعر 50 جنيه



========================

4. سخان

طبعا السخان مهم جدا في الشتاء خصوصا الأنه بيظبط درجه حراره الحوض و طبعا افضل سخان اللي بترموستات الأنه بيفصل و بيعدل الحراره لوحده

النوع المفضل ليا سخان هيتو

صوره من السخان
======================
نوع السخان
HE-200/250
قوته 250 وات
سعره 50 جنيه



======================

5. غطاء حوض مهم جدا لحاجتين و هما

تركيب الأضائه في الحوض
و كمان في انواع من الأسماك زي الكوي مثلا بتنط بره الحوض فالغطاء مهم

و بيتجاب من اي محل سمك و تقوله حوضك حجمه كام و سعره لا يتجاوز ال 40 جنيه

صوره

غير متوافره حاليا لكن هتشوفه لما اوريكم صور الحوض الخاص بيا

=======================
6. خلفيه للحوض

دي من الكماليات لكن بتدي شكل مميز للحوض و خصوصا لو كانت زرقاء او سوداء و في منها خلفيات اشكال حلوه و سعرها المتر ب 10 جنيه

الصور غير متوافره حاليا
=======================
7. لمد الأضائه

في كذا حاجه الأضائه الحوض

1. في اللمد الموفره للطاقه و دي افضل الأضائات بالنسبه ليا
2. في اضائات النيون و دي المنتشره و حلوه للسمك
3. في لمد خاصه بالأحواض بتتحط جوه الحوض و بتبقي 3 الوان

و طبعا حساب تكاليف اللمد دي
1. لمد الموفره للطاقه
سعر اللمده في حدود 10 اللي 12 جنيه
و دي يادوبك بتحتاج قاعده و تتركب في الغطاء

2. لمد النيون و دي اللمده ب 5 جنيه ال 60 سم
بس محتاجه ستارتر و محول يعني ممكن تكلفتها كلها 25 جنيه بالكتير قوي

3. لمد ال3 الوان دي و دي مش محتاجه خالص يادوبك تتحط في الحوض و دي سعرها 25 جنيه

ملحوظه :
في اضائات مخصوصه الأحواض و دي طبعا اجمل و افيد لكن هتبقي غاليه لكن هتكلم عللي اللي مستعمل في معظم الأحواض

=========================
8. اساسيات جانبيه للحوض

1. مزيل للكلور في المياه و ده الكيس ب 1 جنيه
2. شبكه لمسك السمك او ازاله الفضلات و الرواسب ب 3 جنيه
3. ترمومتر لقياس حراره المياه في انواع كتير فيه الكتروني و فيه زيبق و في اللي عامل زي الزمبلك عموما اسعارهم مش هتزيد عن 5 جنيه
=========================
9. ادويه اساسيه زي
1. الأنتي وايت سبوت و دي عامله زي القطره ب 1 جنيه
2. السوبر ساليكس لعلاج الفطريات و تأكل الزعانف ب 1 جنيه
3. مقوي عام و مطهر ب 1 جنيه
==========================
10. اكل السمك

في انواع كتير الأكل السمك

في القشور و دي العلبه ب 5 جنيه و القشور من الأكل المفضل للسمك
و في العلف الكيلو ب 5 جنيه و ده اكل مش بطال برضه
في الدود الحي بس حاليا انا معرفش سعره الأنه مش موجود في المحلات عندي
في الدود المجفف الكيس ب 10 جنيه و ده عباره عن مكعبات كده

==========================

نسيت اهم حاجه

الجرش

في انواع كتير من الجرش بس الأفضل

الجرش المكرونه و ده سعر الكيس او الكيلو ب 1 جنيه
و في نوع جديد جميل جدا الجرش الصخري الملون بس غالي الكيلو ب 7 جنيه

طبعا الجرش اساسي الأي حوض الأنه بيعمل انه بياخد فضالات الأسماك جواه و كمان بيعمل زي بيئه طبيعيه للسمك

=========================

بكده يا جماعه قفلنا حوض ممتاز بسعر مميز جدا

لكن لو عايز تعمل حوض كمبتدء انصحك تبتدي بحوض 60 او 80 سم بلاش اصغر من كده علشان الاحواض الصغيره بتتوسخ بسرعه وكمان مش هتعرف تفرخ السمك بسهوله زي الأحواض الكبيره

من خلال الموضح من الأسعار اعلاها نقول ان علشان تعمل حوض عايزه في حدود 250 جنيه

الموضوع يا جماعه بالصور غير منقول بتاتا و اللي عايز ينقل ينقل بس برجاء ذكر المصدر

=======================
ملحوظه : الأسعار فوق يا جماعه بتختلف من محل لمحل و من محافظه الأخري فممكن تلاقي اسعار غير اللي فوق خالص

و لو فيه اي حاجه ناقصه في الموضع اكيد هتكملوهولي

شكرا


منقول

[د طارق]

يعطيك العافية على النقل
بس يا ريت اللي ينقل موضوع يقرأه
علشان لو يحتاج تعديل بسيط يعمله
يعني مثلا هالعبارة شو فائدتها؟!!

الموضوع يا جماعه بالصور غير منقول بتاتا و اللي عايز ينقل ينقل بس برجاء ذكر المصدر

وكل شوي ... صور ل... وصور ل..
ومافي صور لشي!!

[وزة]

ياخسااارة الصور مو ظاهرة

موضوع جميل

[انجل مان]

الموضوع حلوو ..

لكن الصور ما طلعت .؟؟ ياليت تتاكد

[Bruce]

موضوع ممتاز

بس مافي صور