خوينا عبد الله ،، و الببغاء السنغالي ( 1/؟؟ )

[محمد الرياض]

السلام عليكم ..

حبيت اليوم أنقل لكم هذا الحوار و الحديث اللي دار بين محمد و عبد الله ( حوار خيالي )..

و هالحوار كان عن واحد من أنواع الببغانات ..

=-=-=-=-=-=-=-=-=-*

عبد الله : محمد .. ودي اسألك عن هالطير .. قد شفت مثله ؟

محمد: أي طير ؟! ورني صورته ..

عبد الله : خذ ..

محمد يأخذ الصورة .. يقلب فيها .. يعدل زاويتها ليتمكن من رؤية ما فيها بوضوح ..



محمد : اممم ... هذا سنغالي ..

عبد الله : يبن الحلال هذا ببغاء ، مهوب واحد سنغالي ، وش فيك أنت ؟!

محمد : احلف !! ،، أكيد ببغاء و أنا قلت غير كذا ؟!

عبد الله : أجل وشلون سنغالي ؟!

محمد : الله يصلحنا أجمعين ،، هذا ببغاء اسمه : الببغاء السنغالي ..

عبد الله : هههه ،، حتى الببغانات فيها سنغالي ؟! ..

محمد : ليه ؟ فيه شي غلط ؟! أكيد الطيور فيها

السنغالي و الأفريقي و الأسترالي و ...

عبد الله يقاطعه : خلاص خلاص درينا ، كن ما فيه أحد فاهم غيرك ،،

ودك و الله من يروح للسنغال يصيد له كم واحد ..

محمد متعجبًا : و هو على كيفك ؟! و بعدين من قال لك إنه في

السنغال بس ؟ لا يغرك الاسم ، هالببغاء موجود في غرب أفريقيا كلها

شف المنطقة الملونة بالرمادي :



و بعدين هذي الطيور عليها حماية ، و ما تصدر إلا بموجب قوانين ، لكن فيه من هو يتلاعب بهالشي

و ما نقول إلا حسبنا الله و نعم الوكيل ..

عبد الله ولا كأنه هامه شي : طيب طيب ، أبغى صور عن هالطير غير اللي معي ، كيف الطريقة ؟!

محمد : مالك إلا النت ، بتلقى فيه اللي يسرك يالغالي ، رح لأحد محركات البحث و اكتب :

الببغاء السنغالي أو Senegal Parrot ( الاسم الانجليزي ) أو Poicephalus senegalus ( الاسم العلمي ) ..

عبد الله : الاسم العربي و النقلينزي و عارفين ليش ذكرتها ، لكن وش

أبغى بالعلمي ؟! شايفني بأكتب رسالة دكتوراه !!

محمد : هههه ، لا ياخي ، انا عارف إن ماورا هالخشة سالفة !! لكن

فايدة الاسم العلمي إنك تكتبه في محرك البحث ، و تطلع لك الصور اللي في أغلب المواقع العالمية

و بجميع اللغات ، وش اللي يحدك على الانجليزي بس ، وسع دائرة البحث شوي ، و بتلقى

معلومات أكثر ..

عبد الله : يابن الحلال ، عسانا نفهم عربي ، تبينا نبحث بجميع اللغات ؟! ..

محمد : حتى لو ماتعرف حرف واحد من أي لغة .. ممكن تستفيد من هالمواقع ..

المواقع العالمية المشهورة توفر لك خدمة الترجمة للمواقع و الصفحات كاملة ، و من أي لغة لأي لغة ..

وش تبي اكثر من كذا ؟ راس مالها و ضغطة زر ..

عبد الله : عجيب !! و الله شي خطير ..

عبد الله مسوي فيها ذيب وحط رجله و على النت على طول وقعد يبحث عن الصور

و ترك صاحبه محمد في حيرة و ذهول من هذا التصرف الأرعن

فحتى كلمة إلى اللقاء ما قالها له .. لكن يالله .. الحلم زين ..

تابعونا في الحلقة المقبلة ، و خلونا نشوف وش جاب عبد الله من غنايم !!

[مشاكس]

مشكور على الحوار

ما قصرت

تحياتي
مشاكس

[الجااارح]

الغالي والعزيز / محمد الرياض

وعليكم السلام ورحمة الله وبركاته ،،،


والله صاحبنا ذا عبد الله رايح فيها منسم

تقولي حاط رجله يبي يشوف معلومات وسحب على محمد يالله ننتظره بعد ما يحبث نشوف وش راح يجيب من علوم

عموماً :

يعطيك العافية يا صاحبي على المحاوره والموضوع الجميل ولأول مرة تقريبا أشوف موضوع بهذا الاسلوب اللي هو اسلوب الحوار لتوصيل معلومات بشكل مسلي وأقرب للذهن ......


بارك الله فيك وجمل الله حالك على الموضوع ياغاااالي .


نستنى صاحبنا عبد الله أعاااد يجيب لنا علومه وايش صار معااهـ وعلى الله يجيب معاه علوم تبيض الوجه ...

تقبل مروري وكافة تحياتي

[هاوي الرمادي]

ღ ღ ღ محمد الرياض ღ ღ ღ

اخوي الغالي ...

صراحة حوار مفيد ومعلومات مهمة عن السنغالي ويعطيك ربي الف عافية على الجهد المتعوب وهذا شكر وتقدير مني لك يالغالي ...

وفعلا مواضيعك يالغالي فعلا في غاية الروعة والافادة وانا واحد من معجبين بمواضيعك يالغالي والف شكر لك يالغالي على هذا الموضوع المميز عن غيره ...

اذا صارت مواضيعك بهذا التميز اجل ننتظر مواضيعك يالغالي بفارغ الصبر ...

ـــــــــــــــــــــــــــــــــــــــــــــــــــــــــــــــــــــ

.,.,.,. تقبل تحياتي ومروري .,.,.,.

.,.,. اخوك .,.,.
.,.,.,. هاوي الرمادي .,.,.,.

[كوبرا القصيم]

وعليكم السلام ورحمة الله وبركاته

أخوي محمد الرياض

أشكرك على الحوار الجميل وبانتظار ابداعاتك

[رعوود]

بكل صراحه

بدعت بالموضوع

اخوي

محمد الرياض


من اخلا المواضيع الي قريتها

وتسلم الانامل والطريقة تشد الواحد عالقرايه

وبانتظار جديدك يالغالي

[الأفريقي]

اخوي محمد مواضيعك متميزه .. وصراااحه ماقصرت ..




يعني سويت حوار حلو وراايق وبنفس الوقت موضوع لكي نستفيد من هذا الموضوع اخوي محمد صرااحه اشكرك ومره ثاانيه واقولك لاتحرمنا من مواضيعك ..

[ودود الافريقي]

مشكور على الحوار الهادف ننتظر البقيه يعطيك العافيه.....

[د/أحمد توفيق]

بسم الله الرحمن الرحيم
أخي العزيز محمد
ماشاء الله , موضوع جميل وأسلوب جديد وممتع
في انتظار بقية السلسلة الممتعة هذه