الكاسكو [ ترويضه , محبته لك , اتباعك ]

[تؤبرني]

بسم الله الرحمن الرحيم

، ، ، ، ،

كيفية تربيتي للببغاء الكاسكو اللي عندي الان ،

معلومات عنه :

اخذته بعمر 3 اشهر تقريبا او 4 اشهر ، بسعر [ 1600 ريال سعودي ] صيد و ليس هولندي
و الحمدلله تم ترويضه خلال 3 أيام فقط
و الحين كمل معاي حتى يومنا هذا 5 اشهر و 20 يوم ^_^ ( يالله انك تحفظه لي )

امأ على تسميته فأنا انادية ( ببغوني ) .

خطوات ترويض الساسكو خلال 10 اياام ( ان شاء الله ) :

طبعا المرجع الاخير على حسب المربي نفسه و كيفية التواصل مع الببغاء
راح اقسم 5 خطوات على 10 ايام فقط ..
و اذا شفته استجوب على الخطوه الاولى من اول يوم
و انت راضي عنه و مقتنع انه اتم الخطوه ، اشطح للخطوه اللي بعدهاا ..

ملحوظة :

اول شيء ، عند شرائك للطير .. انسى تماما انه طير و تخيل على انه [ طفل جديد دخل بيتك و حياتك ] ،
عندهاا راح تعامله أحسن معامله ..


الخطوه الاولى

.. اول يوم ، ثاني يوم ..

ضع قفصه في مكان مرتفع و افتح باب القفص ولا تقفله ابدا ..
وخلي القفص يكون امامك و قريب منك بقليل .بحيث ان الطير يشوفك كل شوي ..

اقفل باب الغرفه حتى لا يخرج من الغرفه و يتعبك
و لا تجعل اي طفل يشوفه في هذي الفتره خاصه ..
و ابعد عنه الاصوات المرتفعه خلي جو الغرفه ( هادي )

اذا ما خرج الببغاء من القفص اليوم الاول ..
حاول انك انت تخرجه من القفص و حطه فوق القفص
و اتركه لين اليوم الثاني ولا تقفل باب القفص ابدا

الخطوه الثانية

.. ثالث يوم ، رابع يوم ..

حاول اطعامه بيدك و اضحك معاه وسولف معاه بصوت هادي ، و لا تحاول انك تلمسه بالمره .

لا تخاف منه ابدا و لا من عضته عند اطعامه ،
يوم يشوفك خايف ومتوتر .. يحس انه فيه شي غلط وانه راح يصير شيء منك ،
و بكذا راح يبتعد عنك اكثر و اكثر و يخاف منك ولا يتقبلك .

الخطوه الثالثة

.. رابع يوم ، خامس يوم ، سادس يوم ..

حاول انك تلمسه و لا تعاند معاه اذا رفض و لا تجبره بالقوه على لمسه ،
و لكن كررها لين يطفش و يستسلم و يتركك تلمسه

خليك معاه لا يفارقك شيء عنه الا وقت الصلاه و النوم .. و ان كان عندك اشغال خاصه .
لكن اثناء وجودك بالبيت اجلس معاه 24 ساعه ولا تتركه .

( انا عن تجربتي ، تحملت عضاته كثير و تحملت خربشته بأظافيره من كثر ما اطلعه على يدي
و كنت استحمل و لا ابين له شيء و كنت احفزه بأطعامه حبوب دوار الشمس
اضع يدي امامه عند اسفل رجليه و اضع الحبوب قريبه من فمه
بحيث يطلع على يدي للوصول لحب دوار الشمس .
و انا ضد العوامل الثانيةة مثل ( القفازات و الخ ) للأقتراب منه او لمسه ) .

الخطوه الرابعة

.. سابع يوم ، ثامن يوم ..

ضع منشفه كبيره على سريرك ، و خليه ينام على المنشفه
و غطيه بالجزء الباقي من المنشفه و اطفي النور عشان ما يعرف وين يروح في الظلام
و يجلس مكانه على سريرك ،
لاا تخاف بأن المنشفه راح تمنع عنه التنفس ،
و لكن انتبه اذا كنت من النوع اللي ينام وما يدري عن نفسه ( تتقلب بالسرير )
حط حاجز كرتوني او اي شي جنبك عشان لا تعصره المسكين

واذا مره ما تقدر او خايف انك ما تضمن انك تعصره او لا .. حاول انك تخليه بس ينام جنبك وبعدها شيله بالمنشفه وحطه بعيد عنك ..

الخطوه الخامسة

.. تاسع يوم ، عاشر يوم ..

حطه على كتفك وخذه بكل مكان تروح فيه ( داخل البيت فقط )
سواءا حمام ( الله يكرمكم ) او مطبخ او الغرف او الصاله ،
حتى اثناء مشاهدتك لفيلم او مسلسل ..
خليه على كتفك حتى اثناء الغداء او العشاء او الفطور .

. . . . .

* شي مهم / :

من اعتقادي الشخصي انا ما اشتريت الببغاء عشان احبسه في القفص ،
و انا من وجهة نظري اشوف انه غلط كبير من المربي حبس طيره في القفص ..
و يجعل منزل الطير هو القفص .

و الصح ، انك تنسى شي اسمه قفص .. اجعل غرفتك هو منزله
و قفصه بس عشان يأكل فيه و يخرج منه ، ولا تقفل باب القفص عليه بتاتاَ .

نتأئج ببغائي بعد خطواتي ذي :

1 - صار يجيني بدون ما اروح له او اقول له شيء
2 - ينام معاي على سرير ، ولا هو من النوع اللي يتحرك بالسرير اذا نام بمكان معين
ما يتحرك منه لين انا اصحى بنفسي و اصحيه معاي
3 - ما يجغر معاي من بعد ترويضه حتى يومي هذا لم اسمع صوت جغيره
4 - تصفيره كثير ما شاء الله
5 - يروح بنفسه لقفصه و يجلس بداخل القفص يوم ما اكون انا بالبيت
6 - اكثر جلوسه معاي على كتفي ، و ساعات ينام على كتفي
7 - في اي مكان اخذه معاي خارج البيت .. ويسافر معاي ب اي مكان اروح له وهو خارج القفص
8 - يوم يشوفني يبدا يرفرف بجناحه حتى اجي و اشيله و اذا طنشته و رحت جلست يجيني
بنفسه
9 - ودود مع اهل البيت لكن يكره الاطفال ويعضهم و السبب ( لانهم يأذونه )

من فوائده ,,

كسبت 2000 ريال من اخواني و السبب .. تحدي
انهم ينادونه و انا اجلس ساكت و يشوفون يروح لمين ..
فلما نادوه وانا ساكت ، تركهم و جاء عندي بدون ما اناديه ههههههههههههههههههههههأأي
و كسبت ال 2000 ريال

*نقاط مهمه بعد الترويض ..

1 - بعد ترويضه بشهر كامل ، قم بترويشه ب الاسبوع مره واحد فقط ( خذه اثناء استحمامك انت )
2 - الاهتمام ب الغذاء و تغير الماء بشكل مستمر ، و تفقد الماء ، احيانا يقوم ب التبول على الماء
فيجب تغير الماء
3 - اخراجه للشمس لمده 15 دقيقه ، في الصباح الباكر او بين العصر و المغرب فقط .
4 - ابعاده عن تيار المكيف او الهواء بشكل مباشر

(( اتمنى لكم التوفيق مع حيواناتكم الاليفه .. ))

،

[أسيــــر]

يعطيك العافية
على مشاركتنا تجربتك في الترويض والخطوات
فعلن الطريقه الصحيحه في التعامل معه الطير تجعله يتعلق بك
واهم شي انك كسبت الرهان
الله يحفظه لك
تقبل مروري

[تؤبرني]

أشكرك ، على مرورك الأكثر من رآئع ،

[the_gostman]

شكرا لك اخي الكريم على مشاركتك لنا بتجربتك والتي سوف تفيد الكثير من الاعضاء

بارك الله فيك يا غالي.. واتمنى لك كل التوفيق

تقبل مروري
أخوك رمزي

[تؤبرني]

أهلين اخوي و حبيبي ( رمزي ) تشرفت كثير ب مرورك لي ،
و تعطيري ب كلماتك الشيقه ، ،

[Ii5aled1Xx]

جاري التجربيه ..
الله يوفقك الجميع ..

يستاهل التثبيت .. يا ليت احد من المشرفين يثبته

[تؤبرني]

أهليــنَ اخويَ خألد ، يشرفني مرورك لي ،،
كفأيه ردك على موضوعي .. شهاده اعتز فيهاا ..
و اتمنى لك تجربه موفقه بأذن الله .

"

[الزعيم الملكي]

اخوي قصدك الكاسكو مو الساسكو
موضوعك اكثر من رائع

[تؤبرني]

أشكرك جزير الشكر اخوي على مرورك
و ملآحظتك على الخطأ المطبعي ، ،
و أتمنى من ألأداره ، اذا بأستطاعتهم تعديل الخطأ ..





"

[تؤبرني]

أتمنى ، من الاداره ، تغير عنوان الموضوع ،

من : الساسكو [ ترويضه , محبته لك , اتباعك ]
الى : الكاسكو [ ترويضه , محبته لك , اتباعك ]

و اعتذر عن الخطأ المطبعي ،