فرخ ما يرمي ريش الجناح ؟؟!!!

[abu hasan]

السلام عليكم أعزائي

عندي فرخ مسوّد أحمر (شامي) هدية من صديق عزيز .. الفرخ حِرِك ونشيط كثير فخفت أكشه يضيع خصوصاً إنه ما عندي مساويد فقلت أقصه ولما يمخلف (يجهز) بجيبله وليف وبصيرن جوز فقصيت الريش الأبيض من جناحيه (سبع ريشات من كل جناح) .. عمره الآن 4 شهور تقريبا لكن الغريب إنه من وقت ما قصيته قبل أكثر من شهرين ولغاية الآن ما رمى ولا ريشة .. حتى الريش الأحمر اللي قبل السبع ريشات البيض مش مبين فيه أي ريش جديد .. فما هو السبب يا ترى مع العلم أنه باقي الفراخ من إنتاجي تعيش في نفس البيئة ونفس التغذية وترمي ريشها بشكل عادي (إشمعنى يعني هذا الفرخ ) .. وما هو برأيكم الحل الأمثل هل أنزع الريش الأبيض (سبعة من كل جناح) أم أتركه على حاله وإلى متى

وعلى فكرة هو ذكر وبشوفه بتعارك مع الحمام وبزوم بس عالخفيف طبعا لأنه لسة صغير

هاه وش رايكم يا جماعة

[bird96]

انصحك يا اخوي ب عدم قص اي ريشة بعد اليوم .. لأن بدو فترة اكثر من 6 شهور لكي يسقط الريش المقصوص ويخرج بداله ريش جديد .. ف انتف الريش المقصوص وقدم له الأكل الممتاز لأن نمو الريش رح يتعبه . وأنشاء الله 3 اسابيع ورح يكون يطير .

[رائد ملكاوي]

الريش المقصوص ما يطلع الا بعد غيار الريش ويحتاج فترة طويلة

وكلام بيرد صحيح

والله يوفقك

[abu hasan]

مشكورين يا إخوان على الرد والإفادة

لكن عدم المؤاخذة ما جاوبتوني على سؤالي الرئيسي في هذا الموضوع .. سؤالي ليش هذا الفرخ من دون الفراخ ما رمى ولا ريشة بعد كل هذه المدة ولغاية الآن مع إنه يعيش في نفس البيئة من تغذية وتحصين وأدوية مثل باقي طيور الحمام عندي وزي ما خبرتكم سابقاً هذا الفرخ ليس من إنتاجي وما هو الأفضل في مثل هذه الحالة .. هل أنزع الريش أم أتركه على حاله وإلى متى

أنا عارف إنه إذا سحّبت الفرخ رح يطلعله ريش جديد .. لكن كان الوضع الطبيعي إنه يرمي الريش المقصوص ويطلع بداله ريش جديد .. والمتعارف عليه إنه الطير بده 40 يوم (مش 3 أسابيع فقط!!!) لما يجنح تماماً ويصير قادر على الطيران وقبل هيك بكون لسة نَسِل (يعني ريشه غير مكتمل).

مع خالص الشكر والتقدير

[bird96]

اسحب الريش وأنتفه للريش المقصوص فقط .

اعتقد سبب عدم رمي الريش هو انه مقصوص ف وضعه غير طبيعي .. غير هذا الجواب ما عندي صراحة .

ونا قلت 3 اسابيع لأنه جسم الطير يكون مهيأ تماما يعني الجسم يكون عارف انه فيه شي خاطيء الريش مقصوص وليس كامل ف لما تنتفه يكون سريع في النمو ف بدو 3 اسابيع او 40 يوم .. واذا قلنا 3 اسابيع يعني مستحيل يكون 21 يوم المقصود انه عال3 اسابيع الريش يكون نصف نمو او 70% من النمو .

بالتوفيق .

[abu hasan]

شكرا حبيبي بيرد .. ما قصرت في التوضيح .. الله يعطيك الصحة يا طيب

[abu hasan]

السلام عليكم

أعزائي نحن نهدف جميعا طبعا من تبادل الأرآء ووجهات النظر والنقاشات الوصول إلى المعلومة الصحيحة قدر الإمكان .. وأنا من هذا الباب حبيت أخبركم ما وصلت إليه من معلومات بخصوص هذا الفرخ اللي ما رمى ريش الجناح .. طبعا بعد ما سألت واستفسرت .. وصراحة اللي توصلتله لا يعد حقيقة علمية بقدر ما هو كلام وآراء متداولة بين مربي الحمام .. لكن مع هيك حبيت أخبركم بهدف الإستفادة الجماعية.

يقال أن بعض فراخ الحمام في فصل الشتاء بتدفن .. يعني بنقول هذا الفرخ دفن أو دافن .. يعني ما رمى ريش الجناح ومش مبينله بواقي .. وبما أن هذا الشئ يحصل فقط في فصل الشتاء معناته السبب هو انخفاض درجة الحرارة وبرودة الجو .. ثم أن الفراخ الدافنة (أو البعض منها) ترمي آخر ريشتين فقط .. التاسعة (الردّاي) والعاشرة (الصمّاي) .. عموماً أنا قمت بتسحيب ريش الجناح المقصوص لهذا الفرخ حتى ينبت مكانه ريش جديد .. مع تمنياتي للجميع بالتوفيق وأن يستفيد البعض من هذه المعلومة.