اشترك في نشرتنا البريدية ليصلك كل جديد

صمت الأمل · 05-12-2009, 01:30 PM

السلام عليكم ..

طبعا الواحد وهو يخوض غمار النت يلقى أشياء كثيرة ومميزة ..

وكنت أبغى أصنع لي فقاسة للبيض بطريقة سهلة وبأدوات تتوفر في كل بيت .. لقيت الموضوع المثبت للعضو الرائع عبيد العباسي لكنها كانت صعبة علي شوي ..

ولا أفهم شيء في النجارة .. أو التسليك .. أو أي شيء الكتروني .. للأسف ..

عشان كذا حبيت أسوي موضوع لصنع فقاسة أرخص وأسهل للي مثلي ..

يبغون فقاسة ولا يقدرون يشترونها ولا عندهم وقت للنجارة أو الأدوات المطلوبة .

نجي لطريقة صنعها :

أول شيء نجيب الحافظة حقت المشروبات اللي كنا نستخدمها من زمااان في النزهات البرية

غطاء بلاستيكي شفاف >> اذا ماعندكم تقدرون تاخذون صينية بلاستيك شفافة بعد ازالة اطرافها

مشرط أو آداه حادة للقطع القوي .

مصباح بقاعدته البلاستيكية بقوة 60 فولت .

مقياس لدرجة الحرارة أو ترمومتر > وهذي أتوقع أغلى قطعة وتفضل تكون تلقائي

صحن معدني >> مثل علبة تونا كبيرة عشان الموية >الرطوبة .

سلك معدني >مثل اللي يبيعونه في محلات السباكة اللي فتحاتها صغيرة .

مروحة كمبيوتر >> مشكلتها انها ضعيفة 12 فولت وممكن تحل المشكلة انك تاخذ شاحن قديم للجوال أو أي جهاز يحول من 12 فولت الى 110 فولت ((راح تلقاة مكتوب خلف الشاحن )) وتروح لسباك يوصل المروحة للشاحن أو تشبكة أنت اذا تعرف .السالب مع السالب والموجب مع الموجب .

نبدأ في التركيب ..

أول شيء نزيل الغطاء العلوي ونثبت الغطاء البلاستيكي من داخل الحافظة >> عشان المنظر وماتضطرون تفتحونها كل شوي أو البزران يبون يشوفون .

ويفضل تثبيتها بالبراغي عشان الصمغ مع الوقت والرطوبة والحرارة راح يتأثر بها وممكن يطيح .

ناخذ لفة من السلك ونحطة أسفل العلبة . ونثني الجوانب للداخل عشان يرفعة لوضع صحن التونا وعشان أطرافة الحادة ما تمخش البيض ويخرب .

سويت رسمه توضح أكثر :

نثيت اللمبه في الزاوية والمروحة في زاوية ثانية وناخذ أسلاكهم ونثبتها داخل الحافظة ونفتح فتحة لسحب الأسلاك خارج الحافظة ...

ونثبت الترمومتر أو تبي تجلسة عادي مافيه مشكلة .

في أي جهه من الحافظة نفتح فتحات صغيرة بالسكروب أو اداه صغيرة عشان يطلع الهواء الحار والرطوبة ويتجدد الهواء .ولاتكثرون منها يمكن 10 كفاية .. واذا الهواء يتسرب بزيادة وتبغون درجة الحرارة ترتفع شوي ممكن تحطون شريط لاصق على الفتحات (( بس لاتنسونها .)) عشان كذا لا تكثرون الفتحات .

آخر شيء وأهم شيء .. البيض .

لازم يكون البيض مخصب ونظيف وانا ماأطهره ..

نجلس البيض في القاعدة ونضع علامة عشان يبين لنا من اللي حركتة أو اللي ما حركتة . او اذا تبغى تضيف قواعد ثابتة ممكن تضيف كرتون البيض تقصصة وترتبة على حجم الفقاسة .

وممكن تكتب التاريخ اذا كنت تضيف بيض يوم ورا يوم عشان تعرف كم مر عليها .

نقلب البيض من 3 الى 5 مرات يوميا الى اليوم ال18 ونوقف التقليب لين يفقس ..

اذا فقس البيض وتبغى تخلي الفروخ في الفقاسة لازم تحط حماية على المروحة بانك تثبت الشبك المعدني حوالينها ويكون المصباح بعيد شوي عشان ما يحرقهم .

كل الموضوع من كتابة وتنسيق وصور ومعلومات من تعبي واجتهادي وحصري لمنتدى تو زوو ماراح تلقونه عند أحد ثاني .

الرجاء ذكر المصدر عند نقل الموضوع .

واتمنى تثبيت الموضوع ولو لفترة عشان الأعضاء يستفيدون .