سلسلة خبراتنا : الجوع

[Dominique]

مرحبا مجددا



واجتمعنا لطرح الجزء الثالث من السلسلة

الجوع




كل قطة لما تحس بالجوع تكون لها طريقة للتعبير عنها

وانا عندي دمدم المفجوع ( اسم الله عليه )

اخترع الف طريقة وطريقة للتعبير عن جوعه

دمدم متعود ياكل الوجبات الرئيسية الثلاث مع سناكس بينهم ( وهذي على المزاج )

الوجبات الرئيسية تكون لاشباعه

والسناك لتحريك معدته بين الوجبات


بالنسبة للوجبات الرئيسية الثلاث لو تأخرت عن موعدها دمدم شيسوي :


انا عندي ثلاجة صغيرة في غرفتي احط فيها المعلبات المفتوحة لاكل دمدم

وعندي صحن صغير للاكل في غرفتي

دمدم لما يحس بالجوع واهوا عندي بالغرفة يا اما :

1- لو كنت انا نايمة ينط على سريري ويماوي ويلصق انفه بخدي علشان اقوم واحطله اكل .

2- اذا كنت مستيقظة يوقف عند صحنه ويماوي لما احطله اكل .

3- يروح للثلاجة ويرفع جسمه ويحاول يفتح الباب بايده ويماوي .

بهالطريقة اعرف انه يوعان .



تحت بالصالة عنده صحن ثاني، ونخزن المعلبات الصغيرة في خزانة المطبخ التحضيري والمعلبات الكبيرة المفتوحة بالثلاجة الداخلية .

لما يحس بالجوع تحت يا اما :

1- لو كنا بعيدين عنه يركض ويوقف عند صحنه ويماوي لمن احد يحطله اكل .

2 اي شخص فينا يقوم من مكانه يبي يتحرك بالصالة دمدم يسبقه ويركض لعند صحنه ويوقف واهوا ساكت وينتظر الوجبه .

3- اي شخص يفتح الثلاجة دمدم يركض مثل الاهبل ويدخل راسه بالثلاجة ولو زفيناه او قلناله وخر يتم واقف بمكانه ما يتحرك .

4- اي واحد فينا يوقف عند المطبخ التحضيري بيسوي شي ياكله دمدم ينط على المطبخ التحضيري ويحط راسه بالصحن او الساندويتش او اي شي محضرينه .




اما بالنسبة للسناك :


مرات احنا نحس بالجوع فنقلي فرايز او نسوي ساندويتش او ناكل شي على الماشي

دمدم لازم يذوق من اللي عندنا


من الفرايز المقلي لازم نعطيه حبتين او 3 بعدين يتركنا ويسكت .

من المرتديلا لازم نعطيه شريحتين .

من الناجتس لازم ياخذ حبة وحدة بدون البقصمات

من الروب بالمشمش لازم ياخذ مقدار ملعقتين شاي

المهم لازم ياخذ شي عن خاطره



ولآنه قليل ادب

لما ارفع ايدي بحط اللقمة بفمي يرفع جسمه ويمد ايده ويطق ايدي

يعني عطيني




نبي مواقفكم



ميرسي
.
.
.