كم سؤال بخصوص قط ذكر بالغ بعمر سنتين وشهرين

[أنا وأسيد]

السلام عليكم ورحمة الله وبركاته

عندي قط ذكر عمره سنتين وشهرين بدأت عليه اعرض الانفلونزا كحة وعطاس وحرارة وصعوبة في التنفس وخروج شيء مخاطي من الأنف ولما بنام يشخر ويتنفس مع فمه طبعا جبت له مضاد بيتاموكس وما تحسن إلا شوية بس .. رحت جبت له اجمنتين مضاد للاطفال من الصيدلية البشرية .. لكن مو راضي يأخذ العلاج ابداً ولما اعطيه اياه بالغصب يبدأ يزبد ( يخرج الدواء من فمه ويخرج معه شيء ثخين مثل اللعاب بس ثخين شفاف ورغوة ويصير كأنه بيستفرغ)
وصار يهرب لما يشوف العلاج يهرب برى البيت وما يرجع إلا اليوم الثاني والمشكلة ما أقدر أحبسه في غرفة .. أحاول أهديه والاعبه قبل لا اعطيه العلاج لكن ما فيه فايدة إذا مسكته خدشني وعضني ما يبغى العلاج .. حاولت اعطيه العلاج مع الأكل وما رضى يأكل وهرب برضه مدري كيف بيتحسن وهو ما ما يبغى العلاج كيف اتعامل مع هذا القط المشاكس.
وهل عادي أعطيه مضاد الهستامين للأطفال عشان يخفف من آثار الانفلونزا مع المضاد أو بيضره لأن قرأت في أحد المنتديات أنه يعطى لهم ..
القط شهيته جيدة جدا الحمد لله وبيأكل دراي فود وويت فود ودجاج ولحم وسمك وبيشرب ماء عادي جدا .. وحركته عادية ونومه برضه عادي عدا أنه أحيانا بيصحى بيكح ويشهق كم مرة ثم يرجع ينام...

واليوم قبل يهرب شفت مثل الحبيبات بيضاء على شعر القط تحت الذيل حوالين منطقة الاخراج .. ويوم تبرز القط وأنتم بكرامة شفت نقط بيضاء في برازه فهل هذه ديدان أو قمل أو أيش بالضبط .. أنا ما اعطيته أي شيء للوقاية من الديدان لحد الآن وكنت راح أجيب له حبوب الوقاية من الديدان لكن خفت تتعارض مع الدواء الانفلونزا ويتأثر القط عكسي

وودي اخصي القط لكن ما فيه عندنا عيادة بيطرية .. وأهلي مرة متضايقين من شغلة الرش على الاثاث وكالتضارب مع الذكور في الحي وهو اصلا جسمه كله اثار معارك ضارية وبالأخير لا يتزاوج ولا شيء.. عنده قطة أنثى لكن ترفضه و وتتزاوج مع قط ثاني من خارج البيت ..هل يوجد حل ثاني غير الإخصاء أقدر أسويه بالبيت .

مرة شفته مع قط ذكر بيتزاوج لكن هو مكان الأنثى إن شاء الله تكونوا فهمتوا علي .. طبعا بعدناهم عن بعض بس مرة استغربت انه كيف يتزاوج الذكر مع الذكر. هل هذا عادي بالقطط أو قطي منحرف

على فكرة أنا أحاول قدر الإمكان اهتم واعالج القط لكن زي ما قلت لكم لا عيادة بيطرية موجودة عندي ولا الأهل متفهمين وأبسط حل عندهم نرمي القط برى لما يمرض وخلاص .. ارجوكم لا أحد يتهمني بالأهمال و أني مجرمة في حق القط أنا بيتقطع قلبي عليه لكن ما لي حيلة غير أكتب حالة القط في المنتديات وأبحث عن حل وعلاج لكل مشاكلة واجيب علاجاته واكله وكل شيء من مصروفي الشخصي بعد ما آكل تريقة من أهلي انه ضيعت وقتي وجهدي ومالي على حيوان يمكن يموت أو يهرب ويتركني...
وأنا ما اشتريته أو تبنيته وأهملته ... هو امه قطوة من الشارع ولدته عندنا وأنا صرت أهتم فيه من يوم فطمته أمه ...

إذا ممكن تساعدوني حتى القى حل لمشاكل قطي اللي كتبتها فوق أكون شاكرة لكم .