معاناة ببغائي وقصتو المحزنه ويارب لها حل

[roba_abid]

السلام عليكم ورحمة الله وبركاته..

ياجماعة انا عندي مشكلة مره كبيره وموضوعي يمكن يكون طويل بس بقولو من واقع تجربة وعشان ابغى حل والكل يستفيد

عندي ببغاء افريقي غيني اللي يجي لونو رمادي غامق
من قبل عشرة سنين ماما جابتو ةاحنا فعلا مانعرف ولاشي عن الطيور او البغبغانات بشكل عام
والله انو ربيناه كدا على البركة يتكلم ماشاء الله تبارك الله ماحرمناه من اي شئ ولله الحمد
يعني اي شئ كنا ناكلو كان ياكل معانا .. ولو شافك تاكل قدامو ماشاء الله عليه يتجنن ويبدا يناديك يادبه تعال ههههههههه
المهم طبعا الرجال اللي اشتريناه منو قلنا بس اعطوه الفصفص وفلفل
كل المحلات تقولك بس اديه فصفص واديه فلفل راح يتكلم ..
طبعا زي ماقلت كان ياكل معانا كل شئ الحمدلله بس كان فعلا اكلو الاساسي فقط فصفص والفلفل بصراحه مااعطيناه ابدا كتير كنا نخاف عليه وقلنا بلاشي
على فكرة الببغاء اسمو حمودي مدري كيف جا معانا دا الاسم وللاسف مااعرف كم عمرو ولا اعرف كم كان عمرو لمن جبناه لانو محد قلنا ونفسي اعرف لو في طريقه !

مع الوقت والسنين على سنة 2007 اتوقع ودينا حمودي عيادة --- البيطريه مااعرف عنوانها بس اعرف انها ورى الصبان والناحيه هديكا
ماني فاكره ليش وديناه بس عرفنا العياده دي كويسه والدكتور كان برضو كويس امريكي اتوقع بس انو اسمر وقلنا انو عندهم ابر فيتامينات للببغانات وانو يجلس عندهم حوالي 4 او 5 ايام عشان ياخد كل يوم ابره
المهم والله للامانه كان كويس وعادي بعد الابر حسيتو اتفتمن على قولهم انو ماشاء الله استصح جسميا

نجي للمعاناه دحين حوالي قبل سنة او سنه ونص كنا نلاحظ حمودي يعطس ومعاه رشح جدا بسيط وقررنا نوديه العياده
بس كل مانبغى نوديه يطلع لنا طرف ونكنسل
الين قبل يمكن 8 شهور خلاص قررنا نوديه مع اننا والله كلنا مو مرتاحين بس قلنا عشان حمودي نرجع نوديه العياده هديكا
وياريتنا ماوديناه بجد ندمانين بشكل مو طبيعي
نفس نظام العياده يجلس 4 مدري 5 ايام وكل يوم ابره الدكتور اتغير اللي موجود كان واحد بريطاني
وخلاص ودعنا حمودي واخدو العامل ودخلو مكان جوا اللي المفروض يكون زي الحضانه للحيوانات
تالت يوم رحت ازور حبيبي اصريت ادخل جوا عشان اشوفو مع انهم كانو رافضين وسويتلهم مناحه المهم ودخلت
لمن دخلت انا انصدمت مررررره كنت مصدومه من المكان المعفن وللاسف زريبة ريحة معفنه مكان وسخ ايش اتكلم ولا ايش اقول
سالت العامل يقولي لا دا بس اليوم كدا وانهم قاعدين ينظفو
شفت حمودي والله حالو يسكر الخاطر جالس زعلان في ركن القفص وخايف
الدكتور صمم اني اخليه وانو لازم يكمل علاجو اللي مدري علاج ايش بالزبط حسبي الله بس
اخر يوم راحت ماما تستلمو وتجيبو وقالت لي نفس الكلام اللي كتبتو فوق والله لسه المكان وسخ بشكل مو طبيعي والله بدون اي مبالغه

اول تلانه ايام من رجعتو كان عادي واقل من عادي ماني حاسه انو طبيعي
بعدها راح صوتو اتكلم معاه احاول اتحركش معاه ولا حركة ولا صوت قلت يمكن مالو نفس
تاني يوم نفس الشي تالت يوم برضو بس قلت الا اكون معاه وسرت انام بالصاله معاه مدري ليش
والله يااني بكيت بكا داكا اليوم مو طبيعي كان لمن يجي وقت النوم واغطيه ويستكن كان يون
والله العظيم زينا احنا البشر لمن نتالم من شئ و نون انين .. مدري لو الكل يعرف ايش يعني يون .. المهم هوا زي الاهات لمن تتعور بس انين اءءءء زي كدا مدري كيف اوصف
اتجننت وجلست ادور عيادات الين لقيت العياده ---- في التحليه الدكتور اسباني كان كويس احسن من السفاح اللي قبلو
لمن شافو فال دا معاه التهاب رئوي وادانا علاجات وقال لو مااتعالج يمكن يموت
قال انو لقط عدوى من مكان وسخ قلتلو الحكايه كلها قال كتير ناس يجو يشتكو من نفس العياده
بس استمرينا على العلاج ومافي فايده بصراحه كل اسبوع او اسبوعين انا ناشبه في حلق الدكتور عشان حمودي مو راضي يتعافى
قلي ياخد وقت بس يبغالو اهتمام .. بس الين دحين ولا شئ وكل مالو من سي لاسواء
اخر مره قبل شهر رحت الدكتور بجد خاصمني قلي علاج اكتر من كدا مقدر اديكي المفروض ماياخد ادويه ومضادات بالكتر دا
بس اصريت الا يعطيني اي شئ اداني مدري ايش بس مو نفس الكورس اللي اول اداني هوا قلي دا اخف وماهو مضاد
برضو مافي فايده .. الفتره دي الاخيره فتحت خشمو اليسار احسها انسدت مافي شئ بارز ومافي شئ طالع برا بس من جوا
احس كدا زي الحاجز وسار يتنفس من فمو دا اكتر شئ عور لي قلبي طول وقتو نفسو من فمو ويطلع صوت وجناحو مرخي وماينام
مااعرف كيف ممكن انظف خشمو لانو حمودي ماشاء الله عليه عنيد ويتعفرت كتير مااقدر اتحكم فيه
وكمان مااعرف عيادات ممكن تكون كويسه خلاص انا طفشت من العيادات والدكاتره السيئين
احنا الحمدلله اكلو ونظافتو وتدفئتو كلها مهتمين فيها حتى انو طلبنالو الزوبيريم يقولو جدا كويس بس الين دحين ماوصل من امريكا للاسف

ماني عارفه من جد ايش اقدر اسوي ايش ممكن يكون حل !!
خشمو ايش اسوي فيه هل في قطرات !
هل في ادويه غير التيلان مدري التايلان ممكن يفيدني !
احسن عياده للطيور فين القاها !! احد مر بتجربة زي كدا !

بجد اتمنى احد يفيدني وبجد اكون مشكورة لكم .. سجلت وكتبت موضوعي وعندي امل اني ان شاء الله القى حل عندكم
فكرة اني افقد دا الكائن تخليني اموت والله لايقولها ويارب يتعافى ويرجع زي اول واحسن

انصحوني ساعدوني عاونوني الله يرزقكم الجنه والله تعبت وانا ادور وانا ابحث وانا اسال