عمود خدش لا يتكلف 10 جنيه

[نوديوس]

بعد ما شفت طريقة عمل عمود الخدش هنا فى المنتدى عجبتنى
المهم الصدفة هى اللى جابتلى فكرة محاولة جعله لا يأخذ وقت فى صنعه
ماشية جنب محل موكيت كدة و مشايات، لقيت بيبع بواقى موكيت أو سجاد مقصوص بسعر وهمى المهم أخدت قطعة ، و قلت أغطى بيها العمود بدل م أقعد ألف خيط، و بصراحة ما لقيتش نوع الخيط اللى كنت عاوزاه
رحت للنجار ووصفتله الخشب اللى عاوزاه قاعدة 30*30 ، و العمود 45 سم، هو عشان أنا بتعامل معاه كتير عمللى العمود و ثبته كويس بمساند خشب(بصراحة كنت نفسى أقعد أدق الخشب بنفسى)، و رفض ياخد فلوس قاللى ما إتكلفتش حاجة هو بصراحة قص الخشب و ركبه عشان المقاس ما كانش موجود عنده المهم إداهالى بعد 5 دقايق
المهم الطريقة:
1- الأدوات كما فى الصورة



2-الكرة لفيتها بشريط ساتان لونين بعد دهانها باللاصق

3-و بعد ما خلصت لف حطيت طرفين شريط مع بعض فبقى عندى 3 أطراف عملتهم ضفيرة

4- قيست القطعة المطلوب لفها غلى العمودو قصيتها، و غطيت ضهرها باللاصق

5- لصقتها مع مراعااة تثبيت الكرة على العمود ، و لف الموكيت عليها فتثبت باللاصق
6- قصيت مربعات صغيرة للقاعدة، و تلصق بنفس الطريقة، و ده الشكل النهائى

7- لفيت شريط الساتان حوالين القاعدة من تحت عشان ما يعورش حد مكان قص الخشب، و تترك لتجف

والقطط عجبنهم فعلا و إبتدوا يلعبوا بيها النهاردة بعد ما نشفت

و فكرت لو باظ فى أى وقت ( أعتقد بعد فترة، ممكن أغطيه من أول وجديد بخامة تانية)