إستفسار بخصوص عدة نباتات
صباح الخير يا المنتدى ... هذي أول مشاركة ليا وأتمنى تجاوبوني وتفيدوني ...
بداية أنا عندي بالبيت حديقة صغيرة زارعة فيها كم نوع من أشجار الفاكهة والحمضيات وعندي كم إستفسار بخصوصها
1- شجرتين رمان صارلهم مزروعين فوق الـ 6 سنوات وللآن ما أزهروا ولا مرة والمسافة بين الشجرتين تقريباً متر ... وينموا أسفل الشجرتين هذيك الفروع الصغيرة من الجذر اللي يسمونها سرطانات هل لازم أشيلها مع العلم إن طول الشجرتين تقريباً 3 أمتار
2- شجرة الليمون عمرها عندي كمان فوق الست سنوات بأول سنة طلعت ليمون بكمية حلوة بس ومن بعدها ماطلعت ولا أزهرت وإجاها ف بداية هذي السنة جفاف للجزء العلوي منها قطعته وذلحين نامي الجزء اللي تحت طوله تقريباً متر
3- عندي كمان شجرة الجوافة هذي كانت تثمر على طول بس السنة الماضية كان محصولها جداً صغير وماكبر حجم الجوافة وظلتها خضرا لفترة طويلة على الشجرة أما هذي السنة فهيا ما أثمرت نهاااائي
4- شجرة البرتقال هذي تزهر بكميات كبيرة يا إما الأزهار تسقط أو إذا أثمرت أبداً مايكبر حجم البرتقاله وتظل لفترة كذا شهر خضرا وخلاص
آآآآسفة جداً على الإطالة بس بتمنى تفيدوني بالتفصيل لأن معلوماتي عن الزارعة محدودة
|