جميع مربين الدجاج مهم جدا *********

[الحمدلله]

بسم الله الرحمن الرحيم

السلام عليكم اخواني حبيت اشكر اعضاء وادارة هذا المنتدى الاكثر من جميل وجزاكم الله خير على اعمالكم وتثقيفكم للناس بخصوص تربية الحيوانات وجعلها جزاء لكم وفي ميزان اعمالكم اخوني فا تثقيف الناس في هذا الشأن يدخل تحت باب مساعدة الناس على تطبيق الرفق بالحيوان على افضل شكل والحمدلله

اخواني انا عندي كم اسفسار جزاكم الله خير ومعهم قصة بسيطة توكلت على الله وأسأله المعونه ثم ارغب الاستفادة من خبراتكم بسم الله نبدأ :

انا عندي قفص في الحوش كبير نسبيا يعني متر ونص في مترين قل او زاد قليلا تقريبا هذا حجم الدور الواحد والقفص دورين دور علوي ودور سفلي المهم والشاهد اني شفت الخدامة ترمي الاكل في الزبالة الله يكرمكم عسى ربي يسامحنا ويغفر لنا بس ....المهم وقعدت افكر قلت الحين الله رازقني قفص جيد نسبيا وفلوس الحمدلله وعندي حديقة جميلة مشاءالله وعامل للحديقة ليش ماتجيب دجاج وتخليهم وياكلون الاكل بدل الزبالة .... بناء على كذا رحت لسوق الطيور وقعدت ادور واشوف ومدحو لي محل يقولون دجاجه ممتاز رحت وشريت من عنده 10 ازواج اكبر من الصيصان بشوي واخذت الي ينحط الماء فيها ووحده من الي ينحط الاكل فيها ونشارة خشب وكيس اكل حبوب مخلوطة ..... وبعدين بفضل الله جيت وخليتهم ينظفون القفص وحيطيت نشارة الخشب والاكل والمويه وحطيت الصيصان والحمدلله هذا الي صار والعذر على الاطالة ولاكن ليتم توضيح الاتي :

1 - بعد التفكير حسيت اني غلطان شريت 10 ازواج ولا لأني اعرف انه لازم مايكون فيه اكثر من ذكر واحد واذا كلامي صحيح وش تنصحوني اسوي

2 - نصحوني بالحبوب المخلوطة يقولون هي افضل شي صحيح ولا لا ... وهل في شي من أكل البيت ماتنصحون اعطيهم اياه اقصد شي معين يظرهم

3 - وش رأيكم وش اخلي الاسفادة منها يعني انا شريتها بس عشان تاكل البواقي هل في طريقة ثانية للأستفاده منها
4 - هل افضل اني اخليها تتمشى بالحديقة لفترة معينة يوميا ام لا

5 - الدور الثاني فاضي هل احط فيه شي ولا اخليه ولا وش رأيكم

6 - هل ازيد العدد ولا وش رأيكم

7- انا شريت 10 ازواج ب 105 ريال وعلى قولت الناس الدجاج الي شريته كويس فهل السعر مناسب وكم السعر المناسب للبضاعة الكويسه بنظركم ( حجمها اكبر من الصيصان بقليل )

8- هل في اي شي لازم اعرفه لازم اسويه شي فاتني

ارجو منكم نصيحتي وافادتي بخبراتكم جزاكم الله خير وجعله في مزان حسناتكم يااخون وآسف على الاطالة ولاكن احببت التوضيح التام لكم لكي يمكنكم افادتي قدر الاستطاعه

والشكر مقدما والسلام اخيرا

اخوكم مشاري

[°•»X«ζ͡ĄβąĐy»X«•°]

1 - بعد التفكير حسيت اني غلطان شريت 10 ازواج ولا لأني اعرف انه لازم مايكون فيه اكثر من ذكر واحد واذا كلامي صحيح وش تنصحوني اسوي

صحيح انت غلطت غلط كبير جداً في شرائك 10 ديكة و 10 دجاجات
بصير هواش وايد عندك
انصحك انك تبيع 8 وتخلي 2

2 - نصحوني بالحبوب المخلوطة يقولون هي افضل شي صحيح ولا لا ... وهل في شي من أكل البيت ماتنصحون اعطيهم اياه اقصد شي معين يظرهم

عطهم اي شي يبقى من الطعام وهم بياكلواه واذا ميزانيتك تعبانه روح السوق وييب لهم خضرة ( هم يرمونه في صناديق)


3 - وش رأيكم وش اخلي الاسفادة منها يعني انا شريتها بس عشان تاكل البواقي هل في طريقة ثانية للأستفاده منها

تقدر تستفيد من بيضهم
واذا تكاثروا تقدر تبيع فروخهم
وتقدر تونس الجهال ابهم ^^

4 - هل افضل اني اخليها تتمشى بالحديقة لفترة معينة يوميا ام لا

اي يفضل لان الدجاج لازم بين فتره وفتره يتحممون بالرمل ويحتاجون يتحركون شوي

5 - الدور الثاني فاضي هل احط فيه شي ولا اخليه ولا وش رأيكم

جهزة بنشارة الخشب وبيكون افضل مكان حق يبيضون فيه الدجاج وينامون فيه

6 - هل ازيد العدد ولا وش رأيكم
بدل الـ8 ديكة بـ 8 دجاجات


7- انا شريت 10 ازواج ب 105 ريال وعلى قولت الناس الدجاج الي شريته كويس فهل السعر مناسب وكم السعر المناسب للبضاعة الكويسه بنظركم ( حجمها اكبر من الصيصان بقليل )

السعر جيد نسبياً

8- هل في اي شي لازم اعرفه لازم اسويه شي فاتني

لا على مااعتقد انت افادة باقي الاعضاء
وشكراً

[الشرف]

المشاركة الأصلية كتبت بواسطة °•»X«ζ͡ĄβąĐy»X«•°

1 -

هل افضل اني اخليها تتمشى بالحديقة لفترة معينة يوميا ام لا

اي يفضل لان الدجاج لازم بين فتره وفتره يتحممون بالرمل ويحتاجون يتحركون شوي

اً

من جهتي ما أنصحك تهدهم بالحديقة

اللي عندي على قلتهم

ما تركوا لي ورقة خضراء

وجهة نظر

[الحمدلله]

اخوي °•»X«ζ͡ĄβąĐy»X«•° جزاك الله خير يارب ماقصرت والله كفيت ووفيت بس سؤال هل يكفي ديكين لي 18 دجاجه ؟؟؟

الاخ الشرف وجهة نظر صحيحة تماما لاكن اذا حطيتهم بعيد عن الورد وماشابه مااعتقد في اشكال


جزاكم الله خير اخواني وفي انتظار ردود باقي الاعضاء انشاء الله

[بادجي 2009]

هلا اخووي

نصيحه مني اول شف الديكين الي انتاجهم عالي يعني اذا خليتهم كم شهر وينتجوا واذا انتجوا اختار منها 2

يكفي حتى واحد

اايه فكهم

وبعدهم عن المسطحات الخضراء

[الحمدلله]

المشاركة الأصلية كتبت بواسطة بادجي 2009

هلا اخووي

نصيحه مني اول شف الديكين الي انتاجهم عالي يعني اذا خليتهم كم شهر وينتجوا واذا انتجوا اختار منها 2

يكفي حتى واحد

اايه فكهم

وبعدهم عن المسطحات الخضراء

جزاك الله خير اخوي بس مافهمت كيف اعرف احسن 2 فيهم كيف الطريقة يعني ووش قصدك ابعدهم عن المسطحات الخضراء لأني ماعندي الا مسطحات خضراء وبلاط ياليت توضح الله يجزاك خير انشاءالله

[*waleed*]

سلام عليكم كيفك اخوى الغالي اتمنى انك بخير وعافيهـ يااارب

بصراحهـ انتا غلطان واستعجلت يعنى ماكان لها داعى انك تاخذ 10 ازواج , راح يكون فيه ازعاج وماراح يكون فيهـ تأقلم انتا كذا راح تسبب فوضه بين الادياك والدجاج وممكن يتضاربون ويموت حد فيهم وهاذى كثير تصير

" الافضل انك تاخذ ديك واحد و5 دجاجات او 6 وبتشوف الفرق وراح يرتاحون بس انتا كذا راح تسوى مشكلهـ كبيره وممكن تخسرهم "

بالنسبهـ للمكان عادى خليهم يتمشون في الحديقهـ مثلا الصباح , او العصر ياخذون كم لفهـ لأنهـ الدجاج لما ياكل , اكل كثير لازم يتحرك , الافضل تخليهم على راحتهم دام عندك حديقهـ

بس ماانصحك تعطيهم باقي الاكل من البيت ممكن يسبب لهم اضرار لأنه بيكون فيه كميهـ من الدهوناات , وهاذا مو كويس لهم وبيسبب خراج في البيض ماراح يكون صحى لهم ,

انا انصحك في رز ابيض من غير بهار مجرد بس شوى زيت وملح فقط , وعندك الله يسلمك , كراث كويس لهم

وكمان البذور الاكل مخصص لهمـ , بتحصلهـ في سوق تبع الدجاج , الاكل مطحونـ ومكون من جميع البذور , افضل لهم

والله يوفقك يالغالي فديتك , ويوفق الجميع

تحياتى لك

اخوك " ولوودي "

[هاوي الطيور 2010]

والله ودي افيدك بس كل الي ابي اقولة قالوة الاعضاء ماشاء الله

[الحمدلله]

الله يجزاك خير اخوي *waleed* وماقصرت بس هل اشيلهم الحين ولا انتظر لما يكبرون عشان اعرف وين احسن 2 فيهم وش رأيك ؟؟

اخوي هاوي الله يعافيك ويجزاك خير اعتبرها واصلة ياحيي

[*waleed*]

الله يجزاك خير اخوي *waleed* وماقصرت بس هل اشيلهم الحين ولا انتظر لما يكبرون عشان اعرف وين احسن 2 فيهم وش رأيك ؟؟

والله يالغالي افضل تخليهم لما يكبرون , اول شي عشان تشوف الشكل الى يعجبك تخليهـ

ثانى شي تصرفات الديكه, بعض الديكه تصرفاتها تكون سيئهـ مع الدجاج , يكون شرس في تصرفات وممكن يقتل الدجاج , صارت مع واحد من اصحابي يموتهم بطريقة , تنقير بمنقارهـ , الافضل لما يكبرو شوف الزين خليهـ , والشين , بعهـ في السوق او اعطيهـ اذا تعرف حد من المزارعين ياخذونه

والله يوفقك يارب , ويزودك ويهنيك