رد: أسئلة عن زوج البادجي الجديد
وعليكم السلام
مبروك عليك الطيور
ماشاءالله الطيور حلوة وصحتها ممتازة
أول شيء عندك الدكرين بالغين وجاهزين والأنثى نفس الشيء
بس الدكر الأزرق أكبر في السن من الدكر الأبيض
إنته أخترت الأزرق والأخضر يكونوا زوج
خلاص إعزل التاني وجبلو أنثى جاهزة لأن الدكر جاهز
وخلي الأقفاص متقابله لأن البادجي بطبعو يقلد ودا يحفز على الإنتاج
ولو عندك قفص كبير عادي تخليهم سوا بس أهم شيء تركب 3 بياضات
دا بخصوص الطيور نيجي للدوا الإتنين نفس العناصر شوف المتوفر عندك
بس لو تبغى نصيحتي حالياً إنته مومحتاج الطيور عندك جاهزة ومتوالفه الحمدلله
أعطيهم الجرجير والبيض بالبقسماط ودي حاجات طبيعية منها محفزه
ومنها وجبات تغدي الزوج وتجهزوا للمراحل الجايه من تزاوج وحضن وتفريخ إن شاءالله
بجنب التنوع في الأكل تعلق عظمة الحبار ودي ضرورية ولازم تتوفر على طول في القفص
عشان تمد الطيور بالكالسيوم لصحة عظامهم وكمان عشان تكوين قشرة البيض في الأنثى
نيجي للقفص تركيب البياضة ممتاز بس هيه لها باب جانبي وعلوي ؟
لو مالها يصير لازم تعدلها أو تغيرها الزوج عادي ممكن يبيض فيها
بس إنته ماحتقدر تتابع البيض ولا الفروخ ولا تنظف ولا حتقدر تطلع الفروخ لو أحتاج الأمر
عندك المراجيح في وقت التزاوج شيلها من القفص
وغير المجاثم البلاستيك للخشب ممكن تشتريها وممكن تجيب أغصان شجر تكون متينه
بخصوص التقسييم دا يختلف ومانقدر نتعامل مع الطيور بمبدأ القاعدة 1+1=2
بس حقولك وقت تغيير الريش دي تكون مرحلة صعبة عالطيور وتختلف من بادجي لتاني
في اللي يغير مرا واللي مرتين واللي تلاتة في السنة
وقتها يلزمها الهدوء والتنويع في الأكل وأهم شيء ماتزاوج الطيور
تجهيز الزوج يكون قبل العش بشهر تركز على الوجبات المغديه والمفيدة
أما عن الإنتاج أنا أفضل بعد كل عشين راحة للطيور دا لوكان الإنتاج سهل
أما لو الأنثى تعبت بنزيف أو إنحصار البيض
خليها ترتاح ولا تدخلها دورة إنتاج جديدة قبل ماترجع لها عافيتها
أو لوكان عدد الإنتاج الأول كبير لازم راحة بين العشين أقل شيء شهر
يعني الصور زي دي مجرد فكرة أو نمودج فيك تعدل عليه باللي تشوفو مناسب لطيورك وراحتها
وإن شاءالله في القريب العاجل تبشرنا بإنتاج طيورك
وبالتوفيق يارب
__________________
سبحــان الله وبحمده سبحــان الله العظيم
شكراً " رونق حجازيه " على التصاميم الحلوة ♡♡
|