قصتي مع القط الوردي

[الرواي]

السلام عليكم

انا عضو جديد وحبيت اقولكم قصتي مع القط الوردي

منذ سنوات كنت اعشق القطط وكنت اربي فوق الخمسة عشر قطه تقريبا
وكلهن من قطط الشوارع ما فيهن ولا وحده من سلاله معروفه بس كنت احبهن ومهتم فيهن
وكنت مخليهن في الحوش طبعا.

ومره من المرات سمعت صوت قطاو يتضاربن فخرجت بسرعه وشفت قطو وردي شكله حلو ومبين
من سلاله معروفه جالس يتضارب مع قطوي الاسود (قطو الشوارع) والغريب ان القطو الوردي هو
الغالب وقطوي جالس يستغيث فطردت القطو الوردي .

بعد فتره صار نفس الشي وطلعت من شافني القطو الوردي هرب وتكرر هذا الشي مره ومرتين
وثلاث واكثر لين ما هذاك اليوم سمعت صوت يقطع القلب ولما طلعت شفت القطو الوردي منتف
قطوي تنتيف شعر قطوي على الارض واثار دم وجروح وعضات على رقبته هنا انا قلت خلاص انا ذابحه ذابحه وحطيته في بالي.

المشكله كل ما اقترب من القطو الوردي يشرد لين ما هذاك اليوم اغريته بالاكل وتقرب مني مسكته وما هان علي اسوي فيه شي بس حطيته في كيس وطلعت بالسياره رميته في منطقه بعيده ومن هذاك اليوم ما شفته .

انا كنت ادري ان القطو الوردي من قطاو الانجليز لانه جنب بيتنا مجمع فلل انجليز بس ما كنت اعرف مين فيهم صاحبه بالضبط بس محد قال لصاحبه ما يمسك قطوه كل يوم والثاني ناط في بيتنا ويعض قطاوي.

المهم الان بعد سنوات خطر القطو الوردي في بالي وحبيت اعرف شو سلالته دورت في المواقع الي تهتم بالسلالات وما لقيته والاهم اني ما لقيت قطو مثل لونه.

طلع قطو نادر ولونه نادر وانا رميته بعيد عشان قطوي الاسود قطو الشوارع السبال في عين امه غزال.

هو قطو وجهه مش عريض ولا ضعيف يعني متوسط ,وشعره مش كثيف مثل الشيرازي واهم شي لونه وردي .

فممكن احد يساعدني في معرفة نوعه من الوصف وياليت لو يقدر يحط صوره.

[Elham]

قطـــــو وردي ..

اول مــــــرة اسمع انه في قطو لونه وردي غير ذيج لي صبغت قطوتها بالوردي

عموما .. مافي قطو طبيعي لونه وردي .. عشان جذيه لمن بحثت مالقيت مثل لونه

يمكن صاحبه صابغه ..

تحيــــــــــــــاتي

[سمكه فوشيه]

متأكد لونه وردي

!!!!!!!!!!!!!!!

.

[abdullh70]

اتوقع مصبوغ

لان اذكر فيــــه واحد صبغ القطـــو حقـــه ازرق فاتح بس بالوان طبيعية

مادري شلون لو ادري شلون كان كتبت .

[ala7med]

هذي القطط يصبغون شعرها واكثرها صبغ (ورد) يصبغ ولا يطير حتى الارانب يقومون بصبغها بالورد وللاسف هذا اللون مايطير من شعر القطط
ولا يغير في DNA القطط يعني لو تزاوجت بيطلع اللون الاصلي في الاولاد

[صديقة تاكي]

لونه تقريبا وردي إذا كان القط اللي أعرفه

و أنا بعد عندي قصة أخرى عن القط الوردي

بعد أيام من موت قطي الصغير توتو الذي تأثر من السم بسبب شربه لحليب

أمه الذي تناولت سما عن طريق إهمال أبي في وضع سم للفأر

طبعا الأم و ولدها توتو ماتوا


و بعد أيام مثل ما قلت و في حديقة بيتنا

و في المكان الأخير الذي كان فيه توتو. شفنا القط الوردي

كان أليف و من أول يوم صار هو قط البيت

القط شكله تربية بيوت مؤدب و نظيف

حتى و الله كان ما يأكل إلا في أطباق مثل اللي نستخدمها

طببعا خصصنا له بعض الأطباق


عندي له صور مضحكة بحطها في جهازي و برفعها لكم


أنا ما كنت أحبه كثيرا لأن قطي توتو مات و كنت أشعر انه أخذ مكان

الصغير توتو

بس عموما هو اعتبر نفسه قط البيت و تصرف على هذا الأساس

مع القطط الأخرى

هو كان قط أمي أنا كنت أقولهم أنا قطي توتو

و بعيدا عن أعين القط الوردي كنت أربي قط صغير يشبه توتو

خارج المنزل و بدون علم أحد في غرفة قديمة كان يستخدمها أحد إخوتي

بس كشفني القط الوردي و تخلصوا من القط الصغير

حتى يرتاح القط الوردي !!

و للآن إذا بجاوب على سؤال

من تحبين أكثر القط الوردي الذي يبدو انه من سلالة معروفة

أو القط الصغير توتو ؟

سأختار توتو

[صديقة تاكي]

القط الوردي على السجادة يصلي ! هههههههههههه



أنا وضعته فيها و هي خاصة بالأطفال أهديت لأختي و استخدمتها أنا كلعبة لي

[genan]

اكيد صبغه مافيه هالالوان طبيعيه

[أحبك توتو]

أكــييد مصبـووغ

[الرواي]

مرحبا اشكر جميع الي شاركوا في الموضوع

الصراحه شككتوني في نفسي حتى رحت اسأل اهلي قلتلهم تذكرون القطو الي كذا كذا مواصفاته بس ما قلتلهم الوردي ابي اسمعها منهم, قالولي تقصد الوردي

يعني بصراحه ما اعرف شو اسميه ما اقدر اقول القطو البرتقالي لانه كان عندي قطاو برتقاليات وهذا مش برتقالي , ولا اقدر اقول القطو البني لاني شفت قطاو بنيات وهذا مش بني , فأقرب لون له هو الوردي.

اما الي يقولون مصبوغ فهو مش مصبوغ لانه تزاوج مع وحده من قطواتي وجابت عيال مثل لونه بس لون الابو احلى طبعا في حياتي ما شفت مثله , وبعدين معقوله ما اقدر افرق بين القطو المصبوغ والطبيعي

حبيت اشكر العضوه صديقة تاكي على الصوره الي حطتها لانه هذي اقرب صورة شفتها لحد الان من لون وشكل القط الي انا اقصده مع انه هذاك لونه اغمج واحلى بس تقريبا يشبه هذا.

شباب شوفوا الصوره الي حطتها صديقة تاكي, هذا اللون الي انا اقصده وش اسمه اللون بالعربي والانجليزي؟ وممكن احد يقدر ينزل صور لقطط مثل هذا اللون ؟

وشكرا