●|[ تَربِيةٌ عَنآكِبْ التَرآنتِولآ [ Tarantulas Care ] ]|●

[|| PyTHoN ||]

[ بسم الله الرحمن الرحيم
السلام عليكم و رحمة الله و بركاته ]



نبذه بسيطة



تربية المفصليات ممكن ما تكون شائعه عندنا و غريبه ؟ لكنها بالفعل ممتعه و مسليه و سهله ماهي محتاجه لعنايه كبيره و كشكل تعتبر جميله ولو ان في ناس عندهم خوف منهم ، اكثر سؤال ينسأل للي وده يربي عناكب ، شنو أفضل نوع ؟ و هل سهل العنايه فيهم ؟ ، تربيتهم متشابهه جداً لكن تختلف من حيث سمية كل وحده ، لكن أفضل نوع ولي سمه ضعيف و ما يأثر بالأنسان السليم هو الـ Rose Hair Tarantula ، لكن تذكرو تعتمد على مناعة الجسم أيضاً =)



رعايتهم و التعامل معهم ؟



رعايتهم ماهي مثل الحيوانات الباقيه الي ممكن تعودتوا تربونها ، يحبون الهدوء ، يعني كثر ما يبقون بحوضهم بكون افضل ، و يحتاجون درجة حراره و رطوبه معينه ، و كم شغله للحوض .. ، هذا بإختصار ، التعامل معاهم سهل بعد ، و كأي حيوان تأذيه يأذيك ، فشوي شوي معاهم و للأطفال يفضل ما يشيلونهم و لو انك تكون وياهم ، و الشيل باليد خل إيدك جدامه و المسها من وره و اهي بتتحرك إلين تصعد ، و يفضل بين فتره و فتره تعرضونها للشمس..



مكونات الحوض



هذول صور لأحواض فوق ممتازه ، ببساطه الي تحتاجه حوض مناسب نظيف و تفرشونه بتربه زراعيه " الي لونها غامج نفس الي للنباتات الداخليه خاليه من الكيماويات " تنباع بالمشاتل ، بعدها ماعون للماء مو عميق ، و كهف و ممكن يكون شي بسيط ، مثلاً الي يبيعون الورود الي تحت مادري شسمه ، تقصونه نصين و تخلونه او كوب بلاستيك او كرتون او ممكن شي جاهز ^^ ، الشي راجعلك بحيث فكرة الكهف .



حجم و درجة الحراره و الرطوبه ؟



حجم الحوض صغير و ما يحتاج كبير مثل ما انتو شايفين الصوره ، و تتربى بالأحواض البلاستيكيه رخيصه و خفيفه ، و ممكن الزجاج بس تأكدو مسكر عدل ، درجة الحراره حافظو عليها تكون 25-30°C ، و الرطوبه يعتمد عالنوع ، بالنسبه للـ Rose Hair يفضل رطوبه منخفضه ، في بعض يحتاج رطوبه عاليه تكون 70% و فوق .



الأكل و الشرب



تتغذى العناكب عالكائنات الي اصغر منها ، لكن بالتربيه أفضل شي هم الكركت " صرصار الليل " و تقدرون تصيدونه بنفسكم و سهل تلقونه بس تسمعون ويص ويص و روحوله ، و ممكن الجراد و العث الي يفرفرون حول اللمبات بالحوش ، و ممكن دود " القبابي " اهم شي مو راشينها بفليت او شي && ، و ممكن تاكل السحالي الصغار مثل البريعصي او القوارض لكن يفضل ما يزيد عدد مره الي توكلونها قوارض بالسنه عن 3 - 5 مرات لأن ممكن يسبب مشاكل وقت تبديل القشره ، توكلونها مره كل اسبوع او اسبوعين مرات من نفسهم ما ياكلون لا تخافون يتحملون سنه بدون اكل مافي اي مشكله ، و حالهم حال اي حيوان يشربون ماي ، ماعون ماي لكن مو عميق .



الإمتناع عن الأكل



حبيت أذكرها كنقطه لأن اكيد احد بواجهه هالمشكله ، اول سبب انه ما تكون مرتاحه بالحوض ، مثلاً اضاءه او شي ، فتكون خايفه و ما تاكل ، و ممكن من كثر الحركه جدامها او انك تشيلها وايد او انها يديده عالحوض فما راح تاكل و هالشي طبيعي ، و الشي الثاني الي من هو من درجة الحراره ، لو ما كانت مناسبه بتمتنع عن الأكل او يكون وقت تبديل القشره الخارجيه او اخر شي ولي هو نادر انه يصير ولي هو انها مريضه .



تبديل القشره ؟



البعض ممكن ما يعرف هالمرحله من حياة الحشرات و المفصليات ، ولي هي بعد النمو تفصخ القشره القديمه ، بهالوقت و ممكن قبلها بأسابيع راح يمتنع العنكبوت عن الأكل ، و راح تلاحظون من ورا اللون بدى يصير أزرق غامج ، هالوقت لا تشيلها و يفضل انك ترفع الرطوبه لها و تخليها بحالها ، لما يقرب الوقت راح تبدي تحط شبك وايد و تلقونها منبطحه فوقه و البعض عباله ميته و يحذفها ، لا هي تقعد مده لا تمسكونها او شي ، و راح تفصخ القشره بروحها ، اتركوها لـ 4 - 5 ايام بعدها وكلوها =)



أول موضوع لي هني و اتمنى يحوز على رضاكم
الموضوع حصري على 2Zoo و ممنوع النقل
|| PyTHoN || ©

[شاهستا]

وعليكم السلام ورحمه الله
الموضوع رائع ومتكامل تنسيق ومعلومات
طبعا الصور كنت بخبى عينى عشان اكتر حاجه بخاف منها العناكب
شكرا ليك وفى انتظار جديدك

[العقرب الامبراطوري]

و عليكم السلام و رحمة الله و بركاته
ما شاء الله موضوع رائع من مواضيعك و هذا فقط اول موضوع
للاسف ما تكلمت عن كيف تدفي الحوض <~ لمبة لمبة لمبة
كهف و ممكن يكون شي بسيط ، مثلاً الي يبيعون الورود الي تحت مادري شسمه
كهف فخاري ؟
يعطيك الف عافية على الموضوع
و تقبل مروري اخي ~

[|| PyTHoN ||]

المشاركة الأصلية كتبت بواسطة شاهستا

وعليكم السلام ورحمه الله
الموضوع رائع ومتكامل تنسيق ومعلومات
طبعا الصور كنت بخبى عينى عشان اكتر حاجه بخاف منها العناكب
شكرا ليك وفى انتظار جديدك

و السبب الفكره الي الناس ماخذينها عنهم ^^"
العفو ..

المشاركة الأصلية كتبت بواسطة العقرب الامبراطوري

و عليكم السلام و رحمة الله و بركاته
ما شاء الله موضوع رائع من مواضيعك و هذا فقط اول موضوع
للاسف ما تكلمت عن كيف تدفي الحوض <~ لمبة لمبة لمبة
كهف و ممكن يكون شي بسيط ، مثلاً الي يبيعون الورود الي تحت مادري شسمه
كهف فخاري ؟
يعطيك الف عافية على الموضوع
و تقبل مروري اخي ~

ما انصح لمبه لهم بسهوله يصعدون عليها و ينشوون
هالشي راجع للي حاب يربي ممكن يغطي الحوض
بشي او يخليها بمكان دافي بالأساس او مسكر يكون
احسن ^^
قلنا كلمة " مثلاً " ، يعني ما راح اقول كل شي في اكثر
من 100 شي تقدر تستخدمهم لهالشي ^^

الله يعافيك ولو ان مرورك ثقيل



< اتغشمر ههههههههههههههههههههههههه

[دلوعةقطوتي]

ماشاءالله عليه اللي ماسكه بيده
تسلم يدك عالموضوع

[الكلاسيكي]

يامبدع يامتألق موضوع جدا جميل وقوي ومفيد

وبصراحة اعجبتني كثيرا هذي المعلومات والاعجب منا ترتيب الموضوع وتنسيقه وطريقة الصياغة للشرح

تقبل مروري وبالتوفيق

اخوك ابومحمد

[LiLi]

ما شاء الله ما شاء الله

يعطيك ألف عافية ع المجهود

[صمت الأمل]

وعليكم السلام ورحمة اللهـ وبركاتهـ .


يانااااااس ايش هالموضوع الفظيع (( بحسن نيهـ ))


روووووعهـ وابداع ,, ماشاء اللهـ تباركـ اللهـ عليكـ ..


ياللهـ نفسي أجرررررب امسكـ واحد .. وآخذ المشط وأزبط لهـ الشعر والربطات ..


راح نخليهـ ترانشيلا ولا أحلى ..


المعلومات والتنسيق والصور أعطت جو خاص للموضوع .


تسلم ايديكـ اخي .


وكل التوفيق لكـ .

[الآسطورهـ]

يعطيك العافيه اخ بايثن ع الموضوع الجميل

تربية هذا النوع من العناكب جدا ممتعه

خصوصاً النظر إليها وهي تنقضّ على فريستها

والغريب كذلك ان للـ"ترانتيلا" انواع كثيره

يندرج منها السام المميت إلى الضعيف السميّه ,,

مثل التشيليان روز Chilean Rose

شاكر لك مرةً اخرى

[أحبك توتو]

الموضوع رووعه ، و هالعنكبوت من يوم عرفته ودي اشتريه و كذا مرة شايفته بموقع كويتي و سعره رخيص و ودي اربيه وواشيله بس ما راح يرضون امي او ابوي*