آستشاره عن اكل الهامستر الام + هامستر مريض :(

[MR-MEDO7]

السلام عليكم

اخباركم ان شاء الله طيبين

يوم الخميس الماضي هامستري ولدت

جابت 9 او 10 < ماشاء الله

عمرهم الان 7 ايام

استفساري عن طريقة الاهتمام بهم

علمنا اني مالمستهم ولا اعطيتهم مويه

بس امهم كل يوم اعطيها اقل من ربع بيضه < بدون صفار

واعطيها قطع تفاح وخس وطماطم وخيار وبطاطس < بس مو مع بعض

واعطيها حليب سعودي قليل الدسم مخفف بالماء لكن ماتحبه

واليوم مسكت الام وحاولت اشوف حلماتها , مو واضحه ! هل هذا يدل على نقص الحليب ؟

ايش رايكم عن قدر الاكل الكافي

وياليت تعطوني جدول غذائي بسيط

لني متعقد من الفواكه والخضروات

كل ما كثرتها صابها اسهال

,,

وعندي هامستر انثى حامل كنت مخليها مع الذكر

وتضاربو وجرحها الذكر في بطنها

وبطنها متحجر مدري من الحمل والا من الجرح

وتفرز من عضوها التناسلي سائل مثل الصديد وانتم بكرامه

وصارت هزيله وقل نشاطها بالمره

لها حوالي خمس الايام على هالحال

[MR-MEDO7]

!!!!!

[Mad Mood]

اهلين ميدوح كيفك

انا كنت مثلك ادور احد يعطيني نظام كويس للحامل والمرضعة ما لقيت وصرت اخترع من راسي وادور في المواقع الاجنبية لين عرفت احسن نظام والحمدلله هامستراتي صحتهم ممتازة امهات وصغار.. واللي يثبت لي هالشي ان الامهات ما ينحفون والصغار تمتلي اجسامهم بسرعة ويفتحون عيونهم بدري

بالنسبة لبياض البيض اعطها كل يوم نص بيضة.. واذا كانوا عيالها فوق 8 ايام وبدأوا ياكلون اعطها بيضة كاملة طبعا مقطعة قطع صغار وهي رح تاكل شوي وتخزن الباقي لها ولعيالها وبتلاحظ انهم بيخلصونها في نفس اليوم

الخضار والفواكه لا تشكل لهم كثير لأن الصغار اجسامهم رخوة ما يتحملون التنويع الكثير وممكن يموتون مو بس يصيبهم اسهال! .. خس وتفاح يكفون.. وطبعا مو مع بعض.. يوم نص ورقة خس.. ويوم ربع تفاحة.. وهالشي لمدة خمس ايام وتوقف عنه.. اما اذا كانت بس مرضعة وعيالها باقي ما بدأوا ياكلون اعطها يوم نص ورقة خس واليوم الثاني ماتعطيها شي والثالث أقل من ربع تفاحة والرابع ماتعطيها.. وكذا لين يبدأون عيالها ياكلون

الحليب هذا مشاكله كثيرة.. افضل شي انك ما تشربهم.. الطريقة الصح هي انك تعطيهم قطع صغار خبز او شابورة بر تغمسها بحليب قليل الدسم وتنشفها بمناديل لين تقل ليونتها.. وتعطيهم مرة في اليوم اذا كانت مرضعة ومرتين او ثلاث اذا عيالها ياكلون

وطبعا اهم شي الجبن.. شرايح قليلة الدسم.. اذا مرضعة ربع شريحة في اليوم.. واذا الصغار ياكلون نص شريحة يوميا وتكون مقطعة صغار

عدم وضوح الحلمات مو دليل ع انتهاء الحليب.. الدليل هو نحف الام الواضح.. وبعض الامهات بالغريزة يسقطون الفرو حول الحلمات وبعضهم ما يسقطونه فتصير الحلمات مو واضحة


..


بالنسبة للحامل غلط حبيبي انك تخليها مع الذكر.. سواء كانت روسي او سوري.. لأن الهامستر مثل ما انه يحمل بسهولة يسقط الحمل بسهولة

السائل الحليبي هذا هو الأجنة اللي ع وشك تتكون.. وخروجه يعني ان الام سقطت.. ومشكلته يخرج لأي سبب سواء طاحت من الدور الثاني في القفص او حتى من مضاربة بسيطة وعشان كذا لازم تعزل الحامل بمجرد ما تعرف انها حامل

بالنسبة للتحجر في بطنها ما ادري مامر علي مثل هالشي.. يوجد احتمال ان واحد او اثنين من الأجنة تكونوا قبل ما تسقط الباقي.. وهذا يرجع لتاريخ الحمل.. كم عمر حملها؟

احتمال ثاني ان الرحم تضرر من الجرح

وع كل حال انصحك توديها البيطري يعالجها او ع الاقل يفسر لك سبب هالتحجر

واذا في شي يمنعك توديها بيطري اعطها من فيتامين الحيوانات قطرة واحدة في الفم مرتين يوميا لمدة خمس ايام.. تلاقيه عند البيطري اسمه (فورتانار) سعره 10 ريال ويكفيك شهور

ممكن تضيف له مُرة مخففة.. قطرة وحدة في الفم مرة يوميا لمدة خمس ايام.. طريقة التحضير: حبتين مُرة تحطها في كوب ماي وتنتظرها ساعة او ساعتين تذوب وتتحلل وتستخدمها.. وخلها في الثلاجة على طول.. مدة صلاحيتها شهر واحد

موفق.. وخبرني وش يصير معك

[MR-MEDO7]

هلا بك Mad Mood

منور يالغلا

,,

صغار الهامستر الى الان مايكلون ولا يتحركو من زاويتهم

عمرهم الان 10 ايام

الام صحتها عال العال وسمينه ماشاء الله

وطريقتك بالاكل بطبقها من بكره

,,

الهامستر المريضه الى الان حالتها تعبانه ما ادري الحمل اثر عليها والا السبب الجروح الي بالبطن

وابي اعطيها مره وان شاء الله تنفع معها

,,

عندي ذكر طفشني , بس يتهاوش مع الاناث

وحطيته في قفص لحاله

وجيت اليوم دخلت عليه انثى صغيره ابيه يلقحها

وعلى طول تهاوش معها وجرحها

متوحش ما ادري كيف يهدى مع الاناث

ياليت اذا عندك خبره مع الاشكال ذي تسعفني بحل

ويعطيك ربي العافيه على الافاده

[Mad Mood]

هلا فيك النور نورك حبيبي

إذا عمرهم 10 ايام وما بدو ياكلون معناها نوعهم سوري.. ولا انا غلطان؟

لأن الروسي عندي ياكلون من عمر 7 او 8

والسوري من 9 او 10

ترى احتمال هم ياكلون ومو شرط يتحركون من مكانهم.. ممكن الام تعبي جيوبها وتودي الاكل لهم

غير مكانهم وراقبهم

بالنسبة للمريضة اكيد الجرح اللي أثر عليها مو الحمل.. الحمل ما يتعبهم كثير إلا في اليومين الأخيرة قبل الولادة بس مايضعف صحتهم اللهم تعب عام وقلة نشاط

المرة لوحدها ماظن تكفي.. قطرة الفيتامين علاج ممتاز لأنه مقوي ومنشط عام والقطرة الوحدة فيها تركيز فيتامينات ومعادن يعادل الموجود في عدة وجبات.. وتعتبر ضرورية جداً للهامستر المريض والحامل والمرضعة

المرة تعطيها لأنها مضاد حيوي وبنفس الوقت مطهرة للجهاز الهضمي ولو فيه جروح داخلية او نزيف داخلي أو جنين ميت المرة رح تنظف وتفيد كثير

..

بالنسبة للذكر المتوحش المفترض ان الذكر ما يضرب الانثى إلا إذا أظهرت عنف معاه.. أو حس انها بتستولي ع أكله ومنطقته والاحتمال الثاني ذا نادر إلا إذا كان الأكل فعلا قليل

تأكد ان الانثى اللي دخلتها أنثى مو ذكر.. بعض الذكور الصغيرة في العمر أعضاءهم التناسلية تخدع فتشوف الفتحتين قريبة من بعض أكثر من الذكور الواضحة لأن عمره صغير والخصيتين لسه ما كبرت فتظنه أنثى.. أنا كان عندي ذكر ع بالي أنثى لين صار عمره 25 يوم ومادريت الا هذا يركب اخته ويحاول يلقحها ويوم رفعته إلا الفتحتين قريبة كأنه أنثى! وتوها الفتحتين بدأت تبتعد والخصيتين تكبر مع ان واحد من اخوانه ذكر لاحظت ان فتحاته بعيدة من يوم عمره 10 ايام!

عموما مشكلتك ذي واجهتني قبل كذا مع ذكر سوري.. جسمه قوي وطبعه عنيف الزبدة عربجي نمرة واستمارة وأي ذكر تحطه قدامه مليون في الميه رح ينجرح منه جرح خطير في غضون 5 ثواني! لكن مع الاناث يكون راغب في التزاوج بس لو رفضته انثى يتوحش عليها كأنها ذكر!

فيه حلين.. الأول انك تقص أسنانه ثم تحطهم مع بعض وانت مطمن بس ماتخليهم كثير.. بس ما انصحك فيه كبداية لأن قص الأسنان يحتاج تعلم ودقة وحذر.. إلا إذا انت مستعد تجرب خبرني واعلمك الطريقة

الحل الثاني وهو الأضمن.. انك تمسح اجسامهم بمرة مخففة.. أولا المرة مفيدة للجلد والفرو.. ثانيا بتطغى ريحتها ع اي ريحة ثانية موجودة في الانثى وما عجبت الذكر او العكس.. ثالثا وهو الأهم ان الريحة بتكون معلمة في الاثنين وهذا يقلل الشعور بالخطر والتهديد

اول شي لازم يكون المكان دافي.. خذ لك منديل وبلله بموية المرة وامسح جسم الهامستر في كل مكان لين يصير شكله كأنه متروش.. وبسرعة نشفه بمنشفة ناعمة عشان مايصيده برد

امسح الاثنين بالمرة وبعد ما ينشفون وينتفش فروهم يعني بعد حوالي نص ساعة حط الانثى والذكر بمكان محايد مثل كرتون كبير يكون ع الاقل نص متر في نص متر.. وراقبهم لو لقحها كان بها ما لقحها رجع الذكر لقفصه وحط الانثى معاه ووفر لهم أكل متنوع.. حبوب وخس وتفاح وجبن مثلا عشان يحسون ان الوضع اوكيه.. وراقبهم واهم شي تكون مستعد لفصلهم بسرعة لو حسيت الذكر ناويها بشر

اهم شي قبل ما تحطهم مع بعض سواء في الكرتون او بقفص الذكر.. امسك الذكر بيد والانثى بيد وقربهم من بعض بحيث يكون الفارق بين أنوفهم قليل جدا حوالي ربع سم! وخلهم يشمون بعض لمدة خمس ثواني مو اكثر.. ثم اقلب الانثى وخل الذكر يشم مؤخرتها بتلاحظ انه بيقرب اكثر وهو يشم لين يلصق انفه بعضوها التناسلي.. خمس ثواني كمان ع هالحال ثم حطهم مع بعض

وخبرني وش يصير معك

[Mad Mood]

شكرا مارشي انتي كريمة وهذا واجبي =)

[MR-MEDO7]

هلابك اخوي

ايه نوعهم سوري

مشيت على طريقتك بالاكل وماشاء الله شفت نتائج حلوه

وصغار الهامستر صارو يتحركون ويتمشون بالقفص وشهيتهم مفتوحه


..


اما الهامستر المريضه حالها ما تغيير رغم اني اعططيتها مره

اليوم اعطيتها حوالي 5 ملي وامس كذالك

,,

الذكر المتوحش ما دخلت عليه اي انثى

ثنتين مجروحات منه وحده توها ولدت ووحده صغيره

وابي اجرب طريقة مسحهم بالمره


,,


يعطيك العافيه يالغلا علىا الافاده , تعبتك معي

[Mad Mood]

شي يفرح والله

يتربون بعزك ودلالك يا رب =)

بالنسبة للمريضة.. الهامستر مهما كان مرضه يلزمه من بضعة أيام إلى اسبوعين حتى يتحسن.. اعطها فرصة.. وأتوقع في هالمدة رح يقل أكلها وتنحف وتضعف كثير بس معليش بإذن الله تتحسن.. ولا اوصيك لا تنسى الفيتامين لأنه بيكون في هالفترة العنصر الأهم وممكن بدونه ما تستعيد صحتها وتموت

المُرة أكثر من قطرة وحدة في اليوم بتكون مضرة لأن كثرتها تدمر الجسم من الداخل!

لا تعطيها بالملي.. قطرة وحدة يومياً لمدة خمس ايام.. ودامك عطيتها امس واليوم استمر ثلاث ايام على قطرة وحدة صغيرة بالقطارة اللي تستخدم للعين أو للأنف

بالنسبة للمرة والذكر العربجي تبعك تراني مستني النتيجة.. طبعا الطريقة مو مضمونة 100% لكن نجاحها اتوقع فوق الفيفتي فيفتي.. انا جربتها مرة وضبطت معي.. خبرني وش يصير معك

ملاحظة مهمة.. توي انتبه انك كاتب تعطيهم طماطم.. اللي اعرفه ان الطماطم مضرة للهامستر

ولا في اي تعب حاضرين للطيبين

[MR-MEDO7]

للاسف الانثى ماتت


والذكر المتوحش حالت النفسيه سيئه ما ادري ايش حاصله مايتحرك كثير بس نايم