بالنسبه للتزويج اسا ما بينفع عند السلاحف المائية, لانو موسم التزاوج عند السلاحف بيبدا بفصل الربيع, وبيكون بكيفهن بدون ما تتدخل انت, بس انت بتهيئلهن الشروط ممكن يصير.
- عند السلاحف المائية يكونو الذكر والانثى بالغين من ناحيه جنسيه, والذكر والانثى ما بيوصلو للبلوغ الجنسي قبل حجم 12 سم!! الذكر بيوصل للبلوغ الجنسي بجيل 2-4 سنين والانثى بتتأخر شوي لجيل 5-7 سنين, وادا كانت تغذيتهن منيحه بيوصلو للبلوغ بجيل ابكر.. ( كتييير رح تلاقي الذكر والانثى بنفس الجيل بس حجم الانثى أكبر من حجم الذكر).
- التزاوج بيصير عندهن دايمن جوات المي عنشان هادا الاشي اللي بيحفز الذكر... قبل التزاوج الذكر بيصير بأظافرو الطويله يدغدغ الانثى ويعضها من رجليها, ادا هي هربت منو وكانت عدائيه معناتو ما بدها, بس ادا وافقت بتسمحلو انو يطلع عظهرها وبتشوفهن بلشو التزاوج
بالصيف الانثى بتبيض بس برات المي (عدد البيض بيكون حسب نوعها وانت ما حددت نوعها) وممكن انها تبيض 1-3 مرات, بتكون حاططلها رمل-عمق 10 سم- بتحفر وبتغطي ويعد 2-4 شهور بيفقس البيض وبيطلعو الصغار مستقلين وبتبعدهن بحوض لحالهن.
وبالنسبه للسلحفاة البريه كمان موسم التزاوج بالربيع بيبدا والبلوغ الجنسي عند الذكر 13+ وعند الانثى 15+, وكمان بكيفهن, الذكر بيضرب درع الانثى بس ادا رفضت بتهرب منو وادا قبلت بطلع عدرعها ووضع البيض بيكون بالصيف.
بالاسر بيصير حالات تزاوج, بس اوئات ادا كانت الاولى عند الانثى ممكن انها ما تعرف شو تعمل, او انو ادا ما كان تراب او مساحه واسعه ممكن انها تكسر البيض...