[فلنـت]

اولاً هلابك يابعدي ..!
ثانياً . الف مبروك الطير ويتربى بعزك ..!
خامس عشر .. انا رجال اولف الطيور الوحشيه . خصوصاً الببغاء الافريقي الرمادي .. جرّبت طرق كثيره .. هالطرق ياحلو فيها الزين وفيها الشين . لكن فيه طريقه جميله جداً جداً بدون اي مشاكل . بس هالطريقه يبي لها صبر وطولة بال ويبي لها بعد اهتمام كثير من لدن سموكم الكريم .. يعني تجيب الطير اللي بالقفص وتحطه بزاوية الغرفه ويكون القفص مرتفع عن الارض حوالي مترين عشان يكون المكان مكشوف للببغاء ويكون مرتاح نفسياً وهالنقطه مهمه جداً .. ولازم ياحلو تحط له " حب شمسي " يمكن عشر حبات او خمسطش حبه .. عشان يكون شبعان وجوعان وينتضر وجبته منك .. انتبه تخلي احد يطعم الطير .. لايطعم الطير الا انت .. عشان يتعرف عليك . عشان كل ماشافك عرف ان وجبته راح تجيه عن طريقك ..!

مثااااال . لما تعطيه الصباح الساعه تسع خمسطعش حبه من " الحب الشمسي " تجي الساعه ثنتين الضهر او ثلاث وتعطيه عشر حبات .. تخليه يجوع ويشبع بنفس الوقت ويصير متعلق بالاكل ومتعلق فيك ..!

لابد تجلس مع الطير لمدة ربع ساعه على الاقل تحاكيه كأنك تسولف مع ولد جاركم يعني طيّح الميانه سولف عن اي شي .. سولف عن وضع الشرق الاوسط وتخبطات فريق ريال مدريد .. صحيح الببغاء ماراح يعرف وش تقول لكن يرتاح لك نفسياً .. يحس انك تلاعبه .. يشعر الطير بأنك انسان اليف ماتبي تضرّه .. صدقني خامس يوم بالكثير راح تلاقي تجاوب من الطير معك .. يمكن تسولف عن ريال مدريد وزين الدين زيدان والطير يصفر لك لانه ارتاح لك ..!

حاول انك تغير مكانه .. يعني تحطه بصالة بيتكم بزاوية مرتفعه عن الارض مترين . حاول انك تشيله لغرفه ثانيه لمدة ساعه وتكون جالس معه . منها الطير يتعود على الاماكن وتغيير المحل ومنها يعرف انه وين ماراح يلاقيك قدامه .. على فكره الطير لما يكون في محل وتغير محله يصاب برهبه وخوف .. تلاقيه متعلق بالقفص ومايتحرك لانه خايف لذلك انصحك من البدايه بتغيير اماكنه وتنقله من محل لمحل عشان يتعوّد ..!

نجي للكلام المهم .. لما تخلي الطير بمكان في بيتكم مرتفع عن الارض لمدة " ثلاث شهور او شهرين " عشان يتعود على الاهل ويتعود الاكل عن طريقك وتنقله من محل لمحل عشان يتعود على التغيير .. بعد هالفتره ياحبيبي بتلاحظ ان الطير يعرفك .. من نضراته تحس انه خلاص يعرفك .. فـ هنا لابد تقص جنحانه وتطلعه على الستاند وتأكله من يدك .. وحاول تكون صاحب يد ثقيله عشان الببغاء مايرتاع .. لو حركت يدك بسرعه راح يخاف الطير على كذا ويبدى يصاب بالخوف ويجعر ويمكن يصير بينك وبينه حواجز .. يعني لابد يدك تكون ثقيله عشان يرتاح الطير .. لمدة اسبوع تأكله على يدك وماتخوّفه ولا اي شي . صدقني الببغاء من نفسه يجيك وتحك راسه ولايسوي اي شي بالعكس راح يكون موالف لك اكثر من اي شي ثاني .. يكون موالفك بطريقه حلوه اكثر من التوليف بالقوه والتجويع والتخويف ..!

اتمنى اني افدتك لو بشي بسيط .. وشكراً ..!